Utshovঅধ্যায় 45
45.1
বৈশংপায়ন উবাচ
অনুভূয় তু রাজ্ঞস্তং রাজসূয়ং মহাক্রতুম্
যুধিষ্ঠিরস্য নৃপতের্গান্ধারীপুত্রসংয়ুতঃ
45.2
প্রিয়কৃন্মতমাজ্ঞায় পূর্বং দুর্যোধনস্য তৎ
প্রজ্ঞাচক্ষুষমাসীনং শকুনিঃ সৌবলস্তদা
45.3
দুর্যোধনবচঃ শ্রুত্বা ধৃতরাষ্ট্রং জনাধিপম্
উপগম্য মহাপ্রাজ্ঞং শকুনির্বাক্যমব্রবীৎ
45.4
দুর্যোধনো মহারাজ বিবর্ণো হরিণঃ কৃশঃ
দীনশ্চিন্তাপরশ্চৈব তদ্বিদ্ধি ভরতর্ষভ
45.5
ন বৈ পরীক্ষসে সম্যগসহ্যং শত্রুসংভবম্
জ্যেষ্ঠপুত্রস্য শোকং ত্বং কিমর্থং নাববুধ্যসে
45.6
ধৃতরাষ্ট্র উবাচ
দুর্যোধন কুতোমূলং ভৃশমার্তোঽসি পুত্রক
শ্রোতব্যশ্চেন্ময়া সোঽর্থো ব্রূহি মে কুরুনন্দন
45.7
অয়ং ত্বাং শকুনিঃ প্রাহ বিবর্ণং হরিণং কৃশম্
চিন্তয়ংশ্চ ন পশ্যামি শোকস্য তব সংভবম্
45.8
ঐশ্বর্যং হি মহত্পুত্র ত্বয়ি সর্বং সমর্পিতম্
ভ্রাতরঃ সুহৃদশ্চৈব নাচরন্তি তবাপ্রিয়ম্
45.9
আচ্ছাদয়সি প্রাবারানশ্নাসি পিশিতৌদনম্
আজানেয়া বহন্তি ত্বাং কেনাসি হরিণঃ কৃশঃ
45.10
শয়নানি মহার্হাণি যোষিতশ্চ মনোরমাঃ
গুণবন্তি চ বেশ্মানি বিহারাশ্চ যথাসুখম্
45.11
দেবানামিব তে সর্বং বাচি বদ্ধং ন সংশয়ঃ
স দীন ইব দুর্ধর্ষঃ কস্মাচ্ছোচসি পুত্রক
45.12
দুর্যোধন উবাচ
অশ্নাম্যাচ্ছাদয়ে চাহং যথা কুপুরুষস্তথা
অমর্ষং ধারয়ে চোগ্রং তিতিক্ষন্কালপর্যয়ম্
45.13
অমর্ষণঃ স্বাঃ প্রকৃতীরভিভূয় পরে স্থিতাঃ
ক্লেশান্মুমুক্ষুঃ পরজান্স বৈ পুরুষ উচ্যতে
45.14
সংতোষো বৈ শ্রিয়ং হন্তি অভিমানশ্চ ভারত
অনুক্রোশভয়ে চোভে যৈর্বৃতো নাশ্নুতে মহৎ
45.15
ন মামবতি তদ্ভুক্তং শ্রিয়ং দৃষ্ট্বা যুধিষ্ঠিরে
জ্বলন্তীমিব কৌন্তেয়ে বিবর্ণকরণীং মম
45.16
সপত্নানৃধ্যতোঽঽত্মানং হীয়মানং নিশাম্য চ
অদৃশ্যামপি কৌন্তেয়ে স্থিতাং পশ্যন্নিবোদ্যতাম্
তস্মাদহং বিবর্ণশ্চ দীনশ্চ হরিণঃ কৃশঃ
45.17
অষ্টাশীতিসহস্রাণি স্নাতকা গৃহমেধিনঃ
ত্রিংশদ্দাসীক একৈকো যান্বিভর্তি যুধিষ্ঠিরঃ
45.18
দশান্যানি সহস্রাণি নিত্যং তত্রান্নমুত্তমম্
ভুঞ্জতে রুক্মপাত্রীভির্যুধিষ্ঠিরনিবেশনে
45.19
কদলীমৃগমোকানি কৃষ্ণশ্যামারুণানি চ
কাম্বোজঃ প্রাহিণোত্তস্মৈ পরার্ধ্যানপি কম্বলান্
45.20
রথয়োষিদ্গবাশ্বস্য শতশোঽথ সহস্রশঃ
ত্রিংশতং চোষ্ট্রবামীনাং শতানি বিচরন্ত্যুত
45.21
পৃথগ্বিধানি রত্নানি পার্থিবাঃ পৃথিবীপতে
আহরন্ক্রতুমুখ্যেঽস্মিন্কুন্তীপুত্রায় ভূরিশঃ
45.22
ন ক্বচিদ্ধি ময়া দৃষ্টস্তাদৃশো নৈব চ শ্রুতঃ
যাদৃগ্ধনাগমো যজ্ঞে পাণ্ডুপুত্রস্য ধীমতঃ
45.23
অপর্যন্তং ধনৌঘং তং দৃষ্ট্বা শত্রোরহং নৃপ
শর্ম নৈবাধিগচ্ছামি চিন্তয়ানোঽনিশং বিভো
45.24
ব্রাহ্মণা বাটধানাশ্চ গোমন্তঃ শতসংঘশঃ
ত্রৈখর্বং বলিমাদায় দ্বারি তিষ্ঠন্তি বারিতাঃ
45.25
কমণ্ডলূনুপাদায় জাতরূপময়াঞ্শুভান্
এবং বলিং সমাদায় প্রবেশং লেভিরে ততঃ
45.26
যন্নৈব মধু শক্রায় ধারয়ন্ত্যমরস্ত্রিয়ঃ
তদস্মৈ কাংস্যমাহার্ষীদ্বারুণং কলশোদধিঃ
45.27
শৈক্যং রুক্মসহস্রস্য বহুরত্নবিভূষিতম্
দৃষ্ট্বা চ মম তত্সর্বং জ্বররূপমিবাভবৎ
45.28
গৃহীত্বা তত্তু গচ্ছন্তি সমুদ্রৌ পূর্বদক্ষিণৌ
তথৈব পশ্চিমং যান্তি গৃহীত্বা ভরতর্ষভ
45.29
উত্তরং তু ন গচ্ছন্তি বিনা তাত পতত্রিভিঃ
ইদং চাদ্ভুতমত্রাসীত্তন্মে নিগদতঃ শৃণু
45.30
পূর্ণে শতসহস্রে তু বিপ্রাণাং পরিবিষ্যতাম্
স্থাপিতা তত্র সংজ্ঞাভূচ্ছঙ্খো ধ্মায়তি নিত্যশঃ
45.31
মুহুর্মুহুঃ প্রণদতস্তস্য শঙ্খস্য ভারত
উত্তমং শব্দমশ্রৌষং ততো রোমাণি মেঽহৃষন্
45.32
পার্থিবৈর্বহুভিঃ কীর্ণমুপস্থানং দিদৃক্ষুভিঃ
সর্বরত্নান্যুপাদায় পার্থিবা বৈ জনেশ্বর
45.33
যজ্ঞে তস্য মহারাজ পাণ্ডুপুত্রস্য ধীমতঃ
বৈশ্যা ইব মহীপালা দ্বিজাতিপরিবেষকাঃ
45.34
ন সা শ্রীর্দেবরাজস্য যমস্য বরুণস্য বা
গুহ্যকাধিপতের্বাপি যা শ্রী রাজন্যুধিষ্ঠিরে
45.35
তাং দৃষ্ট্বা পাণ্ডুপুত্রস্য শ্রিয়ং পরমিকামহম্
শান্তিং ন পরিগচ্ছামি দহ্যমানেন চেতসা
45.36
শকুনিরুবাচ
যামেতামুত্তমাং লক্ষ্মীং দৃষ্টবানসি পাণ্ডবে
তস্যাঃ প্রাপ্তাবুপায়ং মে শৃণু সত্যপরাক্রম
45.37
অহমক্ষেষ্বভিজ্ঞাতঃ পৃথিব্যামপি ভারত
হৃদয়জ্ঞঃ পণজ্ঞশ্চ বিশেষজ্ঞশ্চ দেবনে
45.38
দ্যূতপ্রিয়শ্চ কৌন্তেয়ো ন চ জানাতি দেবিতুম্
আহূতশ্চৈষ্যতি ব্যক্তং দীব্যাবেত্যাহ্বয়স্ব তম্
45.39
বৈশংপায়ন উবাচ
এবমুক্তঃ শকুনিনা রাজা দুর্যোধনস্তদা
ধৃতরাষ্ট্রমিদং বাক্যমপদান্তরমব্রবীৎ
45.40
অয়মুত্সহতে রাজঞ্শ্রিয়মাহর্তুমক্ষবিৎ
দ্যূতেন পাণ্ডুপুত্রস্য তদনুজ্ঞাতুমর্হসি
45.41
ধৃতরাষ্ট্র উবাচ
ক্ষত্তা মন্ত্রী মহাপ্রাজ্ঞঃ স্থিতো যস্যাস্মি শাসনে
তেন সংগম্য বেত্স্যামি কার্যস্যাস্য বিনিশ্চয়ম্
45.42
স হি ধর্মং পুরস্কৃত্য দীর্ঘদর্শী পরং হিতম্
উভয়োঃ পক্ষয়োর্যুক্তং বক্ষ্যত্যর্থবিনিশ্চয়ম্
45.43
দুর্যোধন উবাচ
নিবর্তয়িষ্যতি ত্বাসৌ যদি ক্ষত্তা সমেষ্যতি
নিবৃত্তে ত্বয়ি রাজেন্দ্র মরিষ্যেঽহমসংশয়ম্
45.44
স ময়ি ত্বং মৃতে রাজন্বিদুরেণ সুখী ভব
ভোক্ষ্যসে পৃথিবীং কৃত্স্নাং কিং ময়া ত্বং করিষ্যসি
45.45
বৈশংপায়ন উবাচ
আর্তবাক্যং তু তত্তস্য প্রণয়োক্তং নিশম্য সঃ
ধৃতরাষ্ট্রোঽব্রবীত্প্রেষ্যান্দুর্যোধনমতে স্থিতঃ
45.46
স্থূণাসহস্রৈর্বৃহতীং শতদ্বারাং সভাং মম
মনোরমাং দর্শনীয়ামাশু কুর্বন্তু শিল্পিনঃ
45.47
ততঃ সংস্তীর্য রত্নৈস্তামক্ষানাবাপ্য সর্বশঃ
সুকৃতাং সুপ্রবেশাং চ নিবেদয়ত মে শনৈঃ
45.48
দুর্যোধনস্য শান্ত্যর্থমিতি নিশ্চিত্য ভূমিপঃ
ধৃতরাষ্ট্রো মহারাজ প্রাহিণোদ্বিদুরায় বৈ
45.49
অপৃষ্ট্বা বিদুরং হ্যস্য নাসীত্কশ্চিদ্বিনিশ্চয়ঃ
দ্যূতদোষাংশ্চ জানন্স পুত্রস্নেহাদকৃষ্যত
45.50
তচ্ছ্রুত্বা বিদুরো ধীমান্কলিদ্বারমুপস্থিতম্
বিনাশমুখমুত্পন্নং ধৃতরাষ্ট্রমুপাদ্রবৎ
45.51
সোঽভিগম্য মহাত্মানং ভ্রাতা ভ্রাতরমগ্রজম্
মূর্ধ্না প্রণম্য চরণাবিদং বচনমব্রবীৎ
45.52
নাভিনন্দামি তে রাজন্ব্যবসায়মিমং প্রভো
পুত্রৈর্ভেদো যথা ন স্যাদ্দ্যূতহেতোস্তথা কুরু
45.53
ধৃতরাষ্ট্র উবাচ
ক্ষত্তঃ পুত্রেষু পুত্রৈর্মে কলহো ন ভবিষ্যতি
দিবি দেবাঃ প্রসাদং নঃ করিষ্যন্তি ন সংশয়ঃ
45.54
অশুভং বা শুভং বাপি হিতং বা যদি বাহিতম্
প্রবর্ততাং সুহৃদ্দ্যূতং দিষ্টমেতন্ন সংশয়ঃ
45.55
ময়ি সংনিহিতে চৈব ভীষ্মে চ ভরতর্ষভে
অনয়ো দৈববিহিতো ন কথংচিদ্ভবিষ্যতি
45.56
গচ্ছ ত্বং রথমাস্থায় হয়ৈর্বাতসমৈর্জবে
খাণ্ডবপ্রস্থমদ্যৈব সমানয় যুধিষ্ঠিরম্
45.57
ন বার্যো ব্যবসায়ো মে বিদুরৈতদ্ব্রবীমি তে
দৈবমেব পরং মন্যে যেনৈতদুপপদ্যতে
45.58
ইত্যুক্তো বিদুরো ধীমান্নৈতদস্তীতি চিন্তয়ন্
আপগেয়ং মহাপ্রাজ্ঞমভ্যগচ্ছত্সুদুঃখিতঃ