Utshovঅধ্যায় 46
46.1
জনমেজয় উবাচ
কথং সমভবদ্দ্যূতং ভ্রাতৄণাং তন্মহাত্যয়ম্
যত্র তদ্ব্যসনং প্রাপ্তং পাণ্ডবৈর্মে পিতামহৈঃ
46.2
কে চ তত্র সভাস্তারা রাজানো ব্রহ্মবিত্তম
কে চৈনমন্বমোদন্ত কে চৈনং প্রত্যষেধয়ন্
46.3
বিস্তরেণৈতদিচ্ছামি কথ্যমানং ত্বয়া দ্বিজ
মূলং হ্যেতদ্বিনাশস্য পৃথিব্যা দ্বিজসত্তম
46.4
সূত উবাচ
এবমুক্তস্তদা রাজ্ঞা ব্যাসশিষ্যঃ প্রতাপবান্
আচচক্ষে যথাবৃত্তং তত্সর্বং সর্ববেদবিৎ
46.5
বৈশংপায়ন উবাচ
শৃণু মে বিস্তরেণেমাং কথাং ভরতসত্তম
ভূয় এব মহারাজ যদি তে শ্রবণে মতিঃ
46.6
বিদুরস্য মতং জ্ঞাত্বা ধৃতরাষ্ট্রোঽম্বিকাসুতঃ
দুর্যোধনমিদং বাক্যমুবাচ বিজনে পুনঃ
46.7
অলং দ্যূতেন গান্ধারে বিদুরো ন প্রশংসতি
ন হ্যসৌ সুমহাবুদ্ধিরহিতং নো বদিষ্যতি
46.8
হিতং হি পরমং মন্যে বিদুরো যত্প্রভাষতে
ক্রিয়তাং পুত্র তত্সর্বমেতন্মন্যে হিতং তব
46.9
দেবর্ষির্বাসবগুরুর্দেবরাজায় ধীমতে
যত্প্রাহ শাস্ত্রং ভগবান্বৃহস্পতিরুদারধীঃ
46.10
তদ্বেদ বিদুরঃ সর্বং সরহস্যং মহাকবিঃ
স্থিতশ্চ বচনে তস্য সদাহমপি পুত্রক
46.11
বিদুরো বাপি মেধাবী কুরূণাং প্রবরো মতঃ
উদ্ধবো বা মহাবুদ্ধির্বৃষ্ণীনামর্চিতো নৃপ
46.12
দ্যূতেন তদলং পুত্র দ্যূতে ভেদো হি দৃশ্যতে
ভেদে বিনাশো রাজ্যস্য তত্পুত্র পরিবর্জয়
46.13
পিত্রা মাত্রা চ পুত্রস্য যদ্বৈ কার্যং পরং স্মৃতম্
প্রাপ্তস্ত্বমসি তত্তাত পিতৃপৈতামহং পদম্
46.14
অধীতবান্কৃতী শাস্ত্রে লালিতঃ সততং গৃহে
ভ্রাতৃজ্যেষ্ঠঃ স্থিতো রাজ্যে বিন্দসে কিং ন শোভনম্
46.15
পৃথগ্জনৈরলভ্যং যদ্ভোজনাচ্ছাদনং পরম্
তত্প্রাপ্তোঽসি মহাবাহো কস্মাচ্ছোচসি পুত্রক
46.16
স্ফীতং রাষ্ট্রং মহাবাহো পিতৃপৈতামহং মহৎ
নিত্যমাজ্ঞাপয়ন্ভাসি দিবি দেবেশ্বরো যথা
46.17
তস্য তে বিদিতপ্রজ্ঞ শোকমূলমিদং কথম্
সমুত্থিতং দুঃখতরং তন্মে শংসিতুমর্হসি
46.18
দুর্যোধন উবাচ
অশ্নাম্যাচ্ছাদয়ামীতি প্রপশ্যন্পাপপূরুষঃ
নামর্ষং কুরুতে যস্তু পুরুষঃ সোঽধমঃ স্মৃতঃ
46.19
ন মাং প্রীণাতি রাজেন্দ্র লক্ষ্মীঃ সাধারণা বিভো
জ্বলিতামিব কৌন্তেয়ে শ্রিয়ং দৃষ্ট্বা চ বিব্যথে
46.20
সর্বাং হি পৃথিবীং দৃষ্ট্বা যুধিষ্ঠিরবশানুগাম্
স্থিরোঽস্মি যোঽহং জীবামি দুঃখাদেতদ্ব্রবীমি তে
46.21
আবর্জিতা ইবাভান্তি নিঘ্নাশ্চৈত্রকিকৌকুরাঃ
কারস্করা লোহজঙ্ঘা যুধিষ্ঠিরনিবেশনে
46.22
হিমবত্সাগরানূপাঃ সর্বরত্নাকরাস্তথা
অন্ত্যাঃ সর্বে পর্যুদস্তা যুধিষ্ঠিরনিবেশনে
46.23
জ্যেষ্ঠোঽয়মিতি মাং মত্বা শ্রেষ্ঠশ্চেতি বিশাং পতে
যুধিষ্ঠিরেণ সত্কৃত্য যুক্তো রত্নপরিগ্রহে
46.24
উপস্থিতানাং রত্নানাং শ্রেষ্ঠানামর্ঘহারিণাম্
নাদৃশ্যত পরঃ প্রান্তো নাপরস্তত্র ভারত
46.25
ন মে হস্তঃ সমভবদ্বসু তত্প্রতিগৃহ্ণতঃ
প্রাতিষ্ঠন্ত ময়ি শ্রান্তে গৃহ্য দূরাহৃতং বসু
46.26
কৃতাং বিন্দুসরোরত্নৈর্ময়েন স্ফাটিকচ্ছদাম্
অপশ্যং নলিনীং পূর্ণামুদকস্যেব ভারত
46.27
বস্ত্রমুত্কর্ষতি ময়ি প্রাহসত্স বৃকোদরঃ
শত্রোরৃদ্ধিবিশেষেণ বিমূঢং রত্নবর্জিতম্
46.28
তত্র স্ম যদি শক্তঃ স্যাং পাতয়েয়ং বৃকোদরম্
সপত্নেনাবহাসো হি স মাং দহতি ভারত
46.29
পুনশ্চ তাদৃশীমেব বাপীং জলজশালিনীম্
মত্বা শিলাসমাং তোয়ে পতিতোঽস্মি নরাধিপ
46.30
তত্র মাং প্রাহসত্কৃষ্ণঃ পার্থেন সহ সস্বনম্
দ্রৌপদী চ সহ স্ত্রীভির্ব্যথয়ন্তী মনো মম
46.31
ক্লিন্নবস্ত্রস্য চ জলে কিংকরা রাজচোদিতাঃ
দদুর্বাসাংসি মেঽন্যানি তচ্চ দুঃখতরং মম
46.32
প্রলম্ভং চ শৃণুষ্বান্যং গদতো মে নরাধিপ
অদ্বারেণ বিনির্গচ্ছন্দ্বারসংস্থানরূপিণা
অভিহত্য শিলাং ভূয়ো ললাটেনাস্মি বিক্ষতঃ
46.33
তত্র মাং যমজৌ দূরাদালোক্য ললিতৌ কিল
বাহুভিঃ পরিগৃহ্ণীতাং শোচন্তৌ সহিতাবুভৌ
46.34
উবাচ সহদেবস্তু তত্র মাং বিস্ময়ন্নিব
ইদং দ্বারমিতো গচ্ছ রাজন্নিতি পুনঃ পুনঃ
46.35
নামধেয়ানি রত্নানাং পুরস্তান্ন শ্রুতানি মে
যানি দৃষ্টানি মে তস্যাং মনস্তপতি তচ্চ মে