Utshovঅধ্যায় 47
47.1
দুর্যোধন উবাচ
যন্ময়া পাণ্ডবানাং তু দৃষ্টং তচ্ছৃণু ভারত
আহৃতং ভূমিপালৈর্হি বসু মুখ্যং ততস্ততঃ
47.2
ন বিন্দে দৃঢমাত্মানং দৃষ্ট্বাহং তদরের্ধনম্
ফলতো ভূমিতো বাপি প্রতিপদ্যস্ব ভারত
47.3
ঐডাংশ্চৈলান্বার্ষদংশাঞ্জাতরূপপরিষ্কৃতান্
প্রাবারাজিনমুখ্যাংশ্চ কাম্বোজঃ প্রদদৌ বসু
47.4
অশ্বাংস্তিত্তিরিকল্মাষাংস্ত্রিশতং শুকনাসিকান্
উষ্ট্রবামীস্ত্রিশতং চ পুষ্টাঃ পীলুশমীঙ্গুদৈঃ
47.5
গোবাসনা ব্রাহ্মণাশ্চ দাসমীয়াশ্চ সর্বশঃ
প্রীত্যর্থং তে মহাভাগা ধর্মরাজ্ঞো মহাত্মনঃ
ত্রিখর্বং বলিমাদায় দ্বারি তিষ্ঠন্তি বারিতাঃ
47.6
কমণ্ডলূনুপাদায় জাতরূপময়াঞ্শুভান্
এবং বলিং প্রদায়াথ প্রবেশং লেভিরে ততঃ
47.7
শতং দাসীসহস্রাণাং কার্পাসিকনিবাসিনাম্
শ্যামাস্তন্ব্যো দীর্ঘকেশ্যো হেমাভরণভূষিতাঃ
শূদ্রা বিপ্রোত্তমার্হাণি রাঙ্কবান্যজিনানি চ
47.8
বলিং চ কৃত্স্নমাদায় ভরুকচ্ছনিবাসিনঃ
উপনিন্যুর্মহারাজ হয়ান্গান্ধারদেশজান্
47.9
ইন্দ্রকৃষ্টৈর্বর্তয়ন্তি ধান্যৈর্নদীমুখৈশ্চ যে
সমুদ্রনিষ্কুটে জাতাঃ পরিসিন্ধু চ মানবাঃ
47.10
তে বৈরামাঃ পারদাশ্চ বঙ্গাশ্চ কিতবৈঃ সহ
বিবিধং বলিমাদায় রত্নানি বিবিধানি চ
47.11
অজাবিকং গোহিরণ্যং খরোষ্ট্রং ফলজং মধু
কম্বলান্বিবিধাংশ্চৈব দ্বারি তিষ্ঠন্তি বারিতাঃ
47.12
প্রাগ্জ্যোতিষাধিপঃ শূরো ম্লেচ্ছানামধিপো বলী
যবনৈঃ সহিতো রাজা ভগদত্তো মহারথঃ
47.13
আজানেয়ান্হয়াঞ্শীঘ্রানাদায়ানিলরংহসঃ
বলিং চ কৃত্স্নমাদায় দ্বারি তিষ্ঠতি বারিতঃ
47.14
অশ্মসারময়ং ভাণ্ডং শুদ্ধদন্তত্সরূনসীন্
প্রাগ্জ্যোতিষোঽথ তদ্দত্ত্বা ভগদত্তোঽব্রজত্তদা
47.15
দ্ব্যক্ষাংস্ত্র্যক্ষাঁল্ললাটাক্ষান্নানাদিগ্ভ্যঃ সমাগতান্
ঔষ্ণীষাননিবাসাংশ্চ বাহুকান্পুরুষাদকান্
47.16
একপাদাংশ্চ তত্রাহমপশ্যং দ্বারি বারিতান্
বল্যর্থং দদতস্তস্মৈ হিরণ্যং রজতং বহু
47.17
ইন্দ্রগোপকবর্ণাভাঞ্শুকবর্ণান্মনোজবান্
তথৈবেন্দ্রায়ুধনিভান্সংধ্যাভ্রসদৃশানপি
47.18
অনেকবর্ণানারণ্যান্গৃহীত্বাশ্বান্মনোজবান্
জাতরূপমনর্ঘ্যং চ দদুস্তস্যৈকপাদকাঃ
47.19
চীনান্হূণাঞ্শকানোড্রান্পর্বতান্তরবাসিনঃ
বার্ষ্ণেয়ান্হারহূণাংশ্চ কৃষ্ণান্হৈমবতাংস্তথা
47.20
ন পারয়াম্যভিগতান্বিবিধান্দ্বারি বারিতান্
বল্যর্থং দদতস্তস্য নানারূপাননেকশঃ
47.21
কৃষ্ণগ্রীবান্মহাকায়ান্রাসভাঞ্শতপাতিনঃ
আহার্ষুর্দশসাহস্রান্বিনীতান্দিক্ষু বিশ্রুতান্
47.22
প্রমাণরাগস্পর্শাঢ্যং বাহ্লীচীনসমুদ্ভবম্
ঔর্ণং চ রাঙ্কবং চৈব কীটজং পট্টজং তথা
47.23
কুট্টীকৃতং তথৈবান্যত্কমলাভং সহস্রশঃ
শ্লক্ষ্ণং বস্ত্রমকার্পাসমাবিকং মৃদু চাজিনম্
47.24
নিশিতাংশ্চৈব দীর্ঘাসীনৃষ্টিশক্তিপরশ্বধান্
অপরান্তসমুদ্ভূতাংস্তথৈব পরশূঞ্শিতান্
47.25
রসান্গন্ধাংশ্চ বিবিধান্রত্নানি চ সহস্রশঃ
বলিং চ কৃত্স্নমাদায় দ্বারি তিষ্ঠন্তি বারিতাঃ
47.26
শকাস্তুখারাঃ কঙ্কাশ্চ রোমশাঃ শৃঙ্গিণো নরাঃ
মহাগমান্দূরগমান্গণিতানর্বুদং হয়ান্
47.27
কোটিশশ্চৈব বহুশঃ সুবর্ণং পদ্মসংমিতম্
বলিমাদায় বিবিধং দ্বারি তিষ্ঠন্তি বারিতাঃ
47.28
আসনানি মহার্হাণি যানানি শয়নানি চ
মণিকাঞ্চনচিত্রাণি গজদন্তময়ানি চ
47.29
রথাংশ্চ বিবিধাকারাঞ্জাতরূপপরিষ্কৃতান্
হয়ৈর্বিনীতৈঃ সংপন্নান্বৈয়াঘ্রপরিবারণান্
47.30
বিচিত্রাংশ্চ পরিস্তোমান্রত্নানি চ সহস্রশঃ
নারাচানর্ধনারাচাঞ্শস্ত্রাণি বিবিধানি চ
47.31
এতদ্দত্ত্বা মহদ্দ্রব্যং পূর্বদেশাধিপো নৃপঃ
প্রবিষ্টো যজ্ঞসদনং পাণ্ডবস্য মহাত্মনঃ