Utshovঅধ্যায় 48
48.1
দুর্যোধন উবাচ
দায়ং তু তস্মৈ বিবিধং শৃণু মে গদতোঽনঘ
যজ্ঞার্থং রাজভির্দত্তং মহান্তং ধনসংচয়ম্
48.2
মেরুমন্দরয়োর্মধ্যে শৈলোদামভিতো নদীম্
যে তে কীচকবেণূনাং ছায়াং রম্যামুপাসতে
48.3
খশা একাশনাজ্যোহাঃ প্রদরা দীর্ঘবেণবঃ
পশুপাশ্চ কুণিন্দাশ্চ তঙ্গণাঃ পরতঙ্গণাঃ
48.4
তে বৈ পিপীলিকং নাম বরদত্তং পিপীলিকৈঃ
জাতরূপং দ্রোণমেয়মহার্ষুঃ পুঞ্জশো নৃপাঃ
48.5
কৃষ্ণাঁল্ললামাংশ্চমরাঞ্শুক্লাংশ্চান্যাঞ্শশিপ্রভান্
হিমবত্পুষ্পজং চৈব স্বাদু ক্ষৌদ্রং তথা বহু
48.6
উত্তরেভ্যঃ কুরুভ্যশ্চাপ্যপোঢং মাল্যমম্বুভিঃ
উত্তরাদপি কৈলাসাদোষধীঃ সুমহাবলাঃ
48.7
পার্বতীয়া বলিং চান্যমাহৃত্য প্রণতাঃ স্থিতাঃ
অজাতশত্রোর্নৃপতের্দ্বারি তিষ্ঠন্তি বারিতাঃ
48.8
যে পরার্ধে হিমবতঃ সূর্যোদয়গিরৌ নৃপাঃ
বারিষেণসমুদ্রান্তে লোহিত্যমভিতশ্চ যে
ফলমূলাশনা যে চ কিরাতাশ্চর্মবাসসঃ
48.9
চন্দনাগুরুকাষ্ঠানাং ভারান্কালীয়কস্য চ
চর্মরত্নসুবর্ণানাং গন্ধানাং চৈব রাশয়ঃ
48.10
কৈরাতিকানাময়ুতং দাসীনাং চ বিশাং পতে
আহৃত্য রমণীয়ার্থান্দূরজান্মৃগপক্ষিণঃ
48.11
নিচিতং পর্বতেভ্যশ্চ হিরণ্যং ভূরিবর্চসম্
বলিং চ কৃত্স্নমাদায় দ্বারি তিষ্ঠন্তি বারিতাঃ
48.12
কায়ব্যা দরদা দার্বাঃ শূরা বৈয়মকাস্তথা
ঔদুম্বরা দুর্বিভাগাঃ পারদা বাহ্লিকৈঃ সহ
48.13
কাশ্মীরাঃ কুন্দমানাশ্চ পৌরকা হংসকায়নাঃ
শিবিত্রিগর্তয়ৌধেয়া রাজন্যা মদ্রকেকয়াঃ
48.14
অম্বষ্ঠাঃ কৌকুরাস্তার্ক্ষ্যা বস্ত্রপাঃ পহ্লবৈঃ সহ
বসাতয়ঃ সমৌলেয়াঃ সহ ক্ষুদ্রকমালবৈঃ
48.15
শৌণ্ডিকাঃ কুক্কুরাশ্চৈব শকাশ্চৈব বিশাং পতে
অঙ্গা বঙ্গাশ্চ পুণ্ড্রাশ্চ শানবত্যা গয়াস্তথা
48.16
সুজাতয়ঃ শ্রেণিমন্তঃ শ্রেয়াংসঃ শস্ত্রপাণয়ঃ
আহার্ষুঃ ক্ষত্রিয়া বিত্তং শতশোঽজাতশত্রবে
48.17
বঙ্গাঃ কলিঙ্গপতয়স্তাম্রলিপ্তাঃ সপুণ্ড্রকাঃ
দুকূলং কৌশিকং চৈব পত্রোর্ণং প্রাবরানপি
48.18
তত্র স্ম দ্বারপালৈস্তে প্রোচ্যন্তে রাজশাসনাৎ
কৃতকারাঃ সুবলয়স্ততো দ্বারমবাপ্স্যথ
48.19
ঈষাদন্তান্হেমকক্ষান্পদ্মবর্ণান্কুথাবৃতান্
শৈলাভান্নিত্যমত্তাংশ্চ অভিতঃ কাম্যকং সরঃ
48.20
দত্ত্বৈকৈকো দশশতান্কুঞ্জরান্কবচাবৃতান্
ক্ষমাবতঃ কুলীনাংশ্চ দ্বারেণ প্রাবিশংস্ততঃ
48.21
এতে চান্যে চ বহবো গণা দিগ্ভ্যঃ সমাগতাঃ
অন্যৈশ্চোপাহৃতান্যত্র রত্নানীহ মহাত্মভিঃ
48.22
রাজা চিত্ররথো নাম গন্ধর্বো বাসবানুগঃ
শতানি চত্বার্যদদদ্ধয়ানাং বাতরংহসাম্
48.23
তুম্বুরুস্তু প্রমুদিতো গন্ধর্বো বাজিনাং শতম্
আম্রপত্রসবর্ণানামদদদ্ধেমমালিনাম্
48.24
কৃতী তু রাজা কৌরব্য শূকরাণাং বিশাং পতে
অদদদ্গজরত্নানাং শতানি সুবহূন্যপি
48.25
বিরাটেন তু মত্স্যেন বল্যর্থং হেমমালিনাম্
কুঞ্জরাণাং সহস্রে দ্বে মত্তানাং সমুপাহৃতে
48.26
পাংশুরাষ্ট্রাদ্বসুদানো রাজা ষড্বিংশতিং গজান্
অশ্বানাং চ সহস্রে দ্বে রাজন্কাঞ্চনমালিনাম্
48.27
জবসত্ত্বোপপন্নানাং বয়ঃস্থানাং নরাধিপ
বলিং চ কৃত্স্নমাদায় পাণ্ডবেভ্যো ন্যবেদয়ৎ
48.28
যজ্ঞসেনেন দাসীনাং সহস্রাণি চতুর্দশ
দাসানাময়ুতং চৈব সদারাণাং বিশাং পতে
48.29
গজয়ুক্তা মহারাজ রথাঃ ষড্বিংশতিস্তথা
রাজ্যং চ কৃত্স্নং পার্থেভ্যো যজ্ঞার্থং বৈ নিবেদিতম্
48.30
সমুদ্রসারং বৈডূর্যং মুক্তাঃ শঙ্খাংস্তথৈব চ
শতশশ্চ কুথাংস্তত্র সিংহলাঃ সমুপাহরন্
48.31
সংবৃতা মণিচীরৈস্তু শ্যামাস্তাম্রান্তলোচনাঃ
তান্গৃহীত্বা নরাস্তত্র দ্বারি তিষ্ঠন্তি বারিতাঃ
48.32
প্রীত্যর্থং ব্রাহ্মণাশ্চৈব ক্ষত্রিয়াশ্চ বিনির্জিতাঃ
উপাজহ্রুর্বিশশ্চৈব শূদ্রাঃ শুশ্রূষবোঽপি চ
প্রীত্যা চ বহুমানাচ্চ অভ্যগচ্ছন্যুধিষ্ঠিরম্
48.33
সর্বে ম্লেচ্ছাঃ সর্ববর্ণা আদিমধ্যান্তজাস্তথা
নানাদেশসমুত্থৈশ্চ নানাজাতিভিরাগতৈঃ
পর্যস্ত ইব লোকোঽয়ং যুধিষ্ঠিরনিবেশনে
48.34
উচ্চাবচানুপগ্রাহান্রাজভিঃ প্রহিতান্বহূন্
শত্রূণাং পশ্যতো দুঃখান্মুমূর্ষা মেঽদ্য জায়তে
48.35
ভৃত্যাস্তু যে পাণ্ডবানাং তাংস্তে বক্ষ্যামি ভারত
যেষামামং চ পক্বং চ সংবিধত্তে যুধিষ্ঠিরঃ
48.36
অয়ুতং ত্রীণি পদ্মানি গজারোহাঃ সসাদিনঃ
রথানামর্বুদং চাপি পাদাতা বহবস্তথা
48.37
প্রমীয়মাণমারব্ধং পচ্যমানং তথৈব চ
বিসৃজ্যমানং চান্যত্র পুণ্যাহস্বন এব চ
48.38
নাভুক্তবন্তং নাহৃষ্টং নাসুভিক্ষং কথংচন
অপশ্যং সর্ববর্ণানাং যুধিষ্ঠিরনিবেশনে
48.39
অষ্টাশীতিসহস্রাণি স্নাতকা গৃহমেধিনঃ
ত্রিংশদ্দাসীক একৈকো যান্বিভর্তি যুধিষ্ঠিরঃ
সুপ্রীতাঃ পরিতুষ্টাশ্চ তেঽপ্যাশংসন্ত্যরিক্ষয়ম্
48.40
দশান্যানি সহস্রাণি যতীনামূর্ধ্বরেতসাম্
ভুঞ্জতে রুক্মপাত্রীষু যুধিষ্ঠিরনিবেশনে
48.41
ভুক্তাভুক্তং কৃতাকৃতং সর্বমাকুব্জবামনম্
অভুঞ্জানা যাজ্ঞসেনী প্রত্যবৈক্ষদ্বিশাং পতে
48.42
দ্বৌ করং ন প্রয়চ্ছেতাং কুন্তীপুত্রায় ভারত
বৈবাহিকেন পাঞ্চালাঃ সখ্যেনান্ধকবৃষ্ণয়ঃ