Utshovঅধ্যায় 49
49.1
দুর্যোধন উবাচ
আর্যাস্তু যে বৈ রাজানঃ সত্যসংধা মহাব্রতাঃ
পর্যাপ্তবিদ্যা বক্তারো বেদান্তাবভৃথাপ্লুতাঃ
49.2
ধৃতিমন্তো হ্রীনিষেধা ধর্মাত্মানো যশস্বিনঃ
মূর্ধাভিষিক্তাস্তে চৈনং রাজানঃ পর্যুপাসতে
49.3
দক্ষিণার্থং সমানীতা রাজভিঃ কাংস্যদোহনাঃ
আরণ্যা বহুসাহস্রা অপশ্যং তত্র তত্র গাঃ
49.4
আজহ্রুস্তত্র সত্কৃত্য স্বয়মুদ্যম্য ভারত
অভিষেকার্থমব্যগ্রা ভাণ্ডমুচ্চাবচং নৃপাঃ
49.5
বাহ্লীকো রথমাহার্ষীজ্জাম্বূনদপরিষ্কৃতম্
সুদক্ষিণস্তং যুয়ুজে শ্বেতৈঃ কাম্বোজজৈর্হয়ৈঃ
49.6
সুনীথোঽপ্রতিমং তস্য অনুকর্ষং মহায়শাঃ
ধ্বজং চেদিপতিঃ ক্ষিপ্রমহার্ষীত্স্বয়মুদ্যতম্
49.7
দাক্ষিণাত্যঃ সংনহনং স্রগুষ্ণীষে চ মাগধঃ
বসুদানো মহেষ্বাসো গজেন্দ্রং ষষ্টিহায়নম্
49.8
মত্স্যস্ত্বক্ষানবাবধ্নাদেকলব্য উপানহৌ
আবন্ত্যস্ত্বভিষেকার্থমাপো বহুবিধাস্তথা
49.9
চেকিতান উপাসঙ্গং ধনুঃ কাশ্য উপাহরৎ
অসিং রুক্মত্সরুং শল্যঃ শৈক্যং কাঞ্চনভূষণম্
49.10
অভ্যষিঞ্চত্ততো ধৌম্যো ব্যাসশ্চ সুমহাতপাঃ
নারদং বৈ পুরস্কৃত্য দেবলং চাসিতং মুনিম্
49.11
প্রীতিমন্ত উপাতিষ্ঠন্নভিষেকং মহর্ষয়ঃ
জামদগ্ন্যেন সহিতাস্তথান্যে বেদপারগাঃ
49.12
অভিজগ্মুর্মহাত্মানং মন্ত্রবদ্ভূরিদক্ষিণম্
মহেন্দ্রমিব দেবেন্দ্রং দিবি সপ্তর্ষয়ো যথা
49.13
অধারয়চ্ছত্রমস্য সাত্যকিঃ সত্যবিক্রমঃ
ধনংজয়শ্চ ব্যজনে ভীমসেনশ্চ পাণ্ডবঃ
49.14
উপাগৃহ্ণাদ্যমিন্দ্রায় পুরাকল্পে প্রজাপতিঃ
তমস্মৈ শঙ্খমাহার্ষীদ্বারুণং কলশোদধিঃ
49.15
সিক্তং নিষ্কসহস্রেণ সুকৃতং বিশ্বকর্মণা
তেনাভিষিক্তঃ কৃষ্ণেন তত্র মে কশ্মলোঽভবৎ
49.16
গচ্ছন্তি পূর্বাদপরং সমুদ্রং চাপি দক্ষিণম্
উত্তরং তু ন গচ্ছন্তি বিনা তাত পতত্রিভিঃ
49.17
তত্র স্ম দধ্মুঃ শতশঃ শঙ্খান্মঙ্গল্যকারণাৎ
প্রাণদংস্তে সমাধ্মাতাস্তত্র রোমাণি মেঽহৃষন্
49.18
প্রণতা ভূমিপাশ্চাপি পেতুর্হীনাঃ স্বতেজসা
ধৃষ্টদ্যুম্নঃ পাণ্ডবাশ্চ সাত্যকিঃ কেশবোঽষ্টমঃ
49.19
সত্ত্বস্থাঃ শৌর্যসংপন্না অন্যোন্যপ্রিয়কারিণঃ
বিসংজ্ঞান্ভূমিপান্দৃষ্ট্বা মাং চ তে প্রাহসংস্তদা
49.20
ততঃ প্রহৃষ্টো বীভত্সুঃ প্রাদাদ্ধেমবিষাণিনাম্
শতান্যনডুহাং পঞ্চ দ্বিজমুখ্যেষু ভারত
49.21
নৈবং শম্বরহন্তাভূদ্যৌবনাশ্বো মনুর্ন চ
ন চ রাজা পৃথুর্বৈন্যো ন চাপ্যাসীদ্ভগীরথঃ
49.22
যথাতিমাত্রং কৌন্তেয়ঃ শ্রিয়া পরময়া যুতঃ
রাজসূয়মবাপ্যৈবং হরিশ্চন্দ্র ইব প্রভুঃ
49.23
এতাং দৃষ্ট্বা শ্রিয়ং পার্থে হরিশ্চন্দ্রে যথা বিভো
কথং নু জীবিতং শ্রেয়ো মম পশ্যসি ভারত
49.24
অন্ধেনেব যুগং নদ্ধং বিপর্যস্তং নরাধিপ
কনীয়াংসো বিবর্ধন্তে জ্যেষ্ঠা হীয়ন্তি ভারত
49.25
এবং দৃষ্ট্বা নাভিবিন্দামি শর্ম; পরীক্ষমাণোঽপি কুরুপ্রবীর
তেনাহমেবং কৃশতাং গতশ্চ; বিবর্ণতাং চৈব সশোকতাং চ