Utshovঅধ্যায় 50
50.1
ধৃতরাষ্ট্র উবাচ
ত্বং বৈ জ্যেষ্ঠো জ্যৈষ্ঠিনেয়ঃ পুত্র মা পাণ্ডবান্দ্বিষঃ
দ্বেষ্টা হ্যসুখমাদত্তে যথৈব নিধনং তথা
50.2
অব্যুত্পন্নং সমানার্থং তুল্যমিত্রং যুধিষ্ঠিরম্
অদ্বিষন্তং কথং দ্বিষ্যাত্ত্বাদৃশো ভরতর্ষভ
50.3
তুল্যাভিজনবীর্যশ্চ কথং ভ্রাতুঃ শ্রিয়ং নৃপ
পুত্র কাময়সে মোহান্মৈবং ভূঃ শাম্য সাধ্বিহ
50.4
অথ যজ্ঞবিভূতিং তাং কাঙ্ক্ষসে ভরতর্ষভ
ঋত্বিজস্তব তন্বন্তু সপ্ততন্তুং মহাধ্বরম্
50.5
আহরিষ্যন্তি রাজানস্তবাপি বিপুলং ধনম্
প্রীত্যা চ বহুমানাচ্চ রত্নান্যাভরণানি চ
50.6
অনর্থাচরিতং তাত পরস্বস্পৃহণং ভৃশম্
স্বসংতুষ্টঃ স্বধর্মস্থো যঃ স বৈ সুখমেধতে
50.7
অব্যাপারঃ পরার্থেষু নিত্যোদ্যোগঃ স্বকর্মসু
উদ্যমো রক্ষণে স্বেষামেতদ্বৈভবলক্ষণম্
50.8
বিপত্তিষ্বব্যথো দক্ষো নিত্যমুত্থানবান্নরঃ
অপ্রমত্তো বিনীতাত্মা নিত্যং ভদ্রাণি পশ্যতি
50.9
অন্তর্বেদ্যাং দদদ্বিত্তং কামাননুভবন্প্রিয়ান্
ক্রীডন্স্ত্রীভির্নিরাতঙ্কঃ প্রশাম্য ভরতর্ষভ
50.10
দুর্যোধন উবাচ
জানন্বৈ মোহয়সি মাং নাবি নৌরিব সংয়তা
স্বার্থে কিং নাবধানং তে উতাহো দ্বেষ্টি মাং ভবান্
50.11
ন সন্তীমে ধার্তরাষ্ট্রা যেষাং ত্বমনুশাসিতা
ভবিষ্যমর্থমাখ্যাসি সদা ত্বং কৃত্যমাত্মনঃ
50.12
পরপ্রণেয়োঽগ্রণীর্হি যশ্চ মার্গাত্প্রমুহ্যতি
পন্থানমনুগচ্ছেয়ুঃ কথং তস্য পদানুগাঃ
50.13
রাজন্পরিগতপ্রজ্ঞো বৃদ্ধসেবী জিতেন্দ্রিয়ঃ
প্রতিপন্নান্স্বকার্যেষু সংমোহয়সি নো ভৃশম্
50.14
লোকবৃত্তাদ্রাজবৃত্তমন্যদাহ বৃহস্পতিঃ
তস্মাদ্রাজ্ঞা প্রয়ত্নেন স্বার্থশ্চিন্ত্যঃ সদৈব হি
50.15
ক্ষত্রিয়স্য মহারাজ জয়ে বৃত্তিঃ সমাহিতা
স বৈ ধর্মোঽস্ত্বধর্মো বা স্ববৃত্তৌ ভরতর্ষভ
50.16
প্রকালয়েদ্দিশঃ সর্বাঃ প্রতোদেনেব সারথিঃ
প্রত্যমিত্রশ্রিয়ং দীপ্তাং বুভূষুর্ভরতর্ষভ
50.17
প্রচ্ছন্নো বা প্রকাশো বা যো যোগো রিপুবাধনঃ
তদ্বৈ শস্ত্রং শস্ত্রবিদাং ন শস্ত্রং ছেদনং স্মৃতম্
50.18
অসংতোষঃ শ্রিয়ো মূলং তস্মাত্তং কাময়াম্যহম্
সমুচ্ছ্রয়ে যো যততে স রাজন্পরমো নয়ী
50.19
মমত্বং হি ন কর্তব্যমৈশ্বর্যে বা ধনেঽপি বা
পূর্বাবাপ্তং হরন্ত্যন্যে রাজধর্মং হি তং বিদুঃ
50.20
অদ্রোহে সময়ং কৃত্বা চিচ্ছেদ নমুচেঃ শিরঃ
শক্রঃ সা হি মতা তস্য রিপৌ বৃত্তিঃ সনাতনী
50.21
দ্বাবেতৌ গ্রসতে ভূমিঃ সর্পো বিলশয়ানিব
রাজানং চাবিরোদ্ধারং ব্রাহ্মণং চাপ্রবাসিনম্
50.22
নাস্তি বৈ জাতিতঃ শত্রুঃ পুরুষস্য বিশাং পতে
যেন সাধারণী বৃত্তিঃ স শত্রুর্নেতরো জনঃ
50.23
শত্রুপক্ষং সমৃধ্যন্তং যো মোহাত্সমুপেক্ষতে
ব্যাধিরাপ্যায়িত ইব তস্য মূলং ছিনত্তি সঃ
50.24
অল্পোঽপি হ্যরিরত্যন্তং বর্ধমানপরাক্রমঃ
বল্মীকো মূলজ ইব গ্রসতে বৃক্ষমন্তিকাৎ
50.25
আজমীঢ রিপোর্লক্ষ্মীর্মা তে রোচিষ্ট ভারত
এষ ভারঃ সত্ত্ববতাং নয়ঃ শিরসি ধিষ্ঠিতঃ
50.26
জন্মবৃদ্ধিমিবার্থানাং যো বৃদ্ধিমভিকাঙ্ক্ষতে
এধতে জ্ঞাতিষু স বৈ সদ্যোবৃদ্ধির্হি বিক্রমঃ
50.27
নাপ্রাপ্য পাণ্ডবৈশ্বর্যং সংশয়ো মে ভবিষ্যতি
অবাপ্স্যে বা শ্রিয়ং তাং হি শেষ্যে বা নিহতো যুধি
50.28
অতাদৃশস্য কিং মেঽদ্য জীবিতেন বিশাং পতে
বর্ধন্তে পাণ্ডবা নিত্যং বয়ং তু স্থিরবৃদ্ধয়ঃ