Utshovঅধ্যায় 51
51.1
শকুনিরুবাচ
যাং ত্বমেতাং শ্রিয়ং দৃষ্ট্বা পাণ্ডুপুত্রে যুধিষ্ঠিরে
তপ্যসে তাং হরিষ্যামি দ্যূতেনাহূয়তাং পরঃ
51.2
অগত্বা সংশয়মহময়ুদ্ধ্বা চ চমূমুখে
অক্ষান্ক্ষিপন্নক্ষতঃ সন্বিদ্বানবিদুষো জয়ে
51.3
গ্লহান্ধনূংষি মে বিদ্ধি শরানক্ষাংশ্চ ভারত
অক্ষাণাং হৃদয়ং মে জ্যাং রথং বিদ্ধি মমাস্তরম্
51.4
দুর্যোধন উবাচ
অয়মুত্সহতে রাজঞ্শ্রিয়মাহর্তুমক্ষবিৎ
দ্যূতেন পাণ্ডুপুত্রেভ্যস্তত্তুভ্যং তাত রোচতাম্
51.5
ধৃতরাষ্ট্র উবাচ
স্থিতোঽস্মি শাসনে ভ্রাতুর্বিদুরস্য মহাত্মনঃ
তেন সংগম্য বেত্স্যামি কার্যস্যাস্য বিনিশ্চয়ম্
51.6
দুর্যোধন উবাচ
বিহনিষ্যতি তে বুদ্ধিং বিদুরো মুক্তসংশয়ঃ
পাণ্ডবানাং হিতে যুক্তো ন তথা মম কৌরব
51.7
নারভেত্পরসামর্থ্যাত্পুরুষঃ কার্যমাত্মনঃ
মতিসাম্যং দ্বয়োর্নাস্তি কার্যেষু কুরুনন্দন
51.8
ভয়ং পরিহরন্মন্দ আত্মানং পরিপালয়ন্
বর্ষাসু ক্লিন্নকটবত্তিষ্ঠন্নেবাবসীদতি
51.9
ন ব্যাধয়ো নাপি যমঃ শ্রেয়ঃপ্রাপ্তিং প্রতীক্ষতে
যাবদেব ভবেত্কল্পস্তাবচ্ছ্রেয়ঃ সমাচরেৎ
51.10
ধৃতরাষ্ট্র উবাচ
সর্বথা পুত্র বলিভির্বিগ্রহং তে ন রোচয়ে
বৈরং বিকারং সৃজতি তদ্বৈ শস্ত্রমনায়সম্
51.11
অনর্থমর্থং মন্যসে রাজপুত্র; সংগ্রন্থনং কলহস্যাতিঘোরম্
তদ্বৈ প্রবৃত্তং তু যথা কথংচি;দ্বিমোক্ষয়েচ্চাপ্যসিসায়কাংশ্চ
51.12
দুর্যোধন উবাচ
দ্যূতে পুরাণৈর্ব্যবহারঃ প্রণীত;স্তত্রাত্যয়ো নাস্তি ন সংপ্রহারঃ
তদ্রোচতাং শকুনের্বাক্যমদ্য; সভাং ক্ষিপ্রং ত্বমিহাজ্ঞাপয়স্ব
51.13
স্বর্গদ্বারং দীব্যতাং নো বিশিষ্টং; তদ্বর্তিনাং চাপি তথৈব যুক্তম্
ভবেদেবং হ্যাত্মনা তুল্যমেব; দুরোদরং পাণ্ডবৈস্ত্বং কুরুষ্ব
51.14
ধৃতরাষ্ট্র উবাচ
বাক্যং ন মে রোচতে যত্ত্বয়োক্তং; যত্তে প্রিয়ং তত্ক্রিয়তাং নরেন্দ্র
পশ্চাত্তপ্স্যসে তদুপাক্রম্য বাক্যং; ন হীদৃশং ভাবি বচো হি ধর্ম্যম্
51.15
দৃষ্টং হ্যেতদ্বিদুরেণৈবমেব; সর্বং পূর্বং বুদ্ধিবিদ্যানুগেন
তদেবৈতদবশস্যাভ্যুপৈতি; মহদ্ভয়ং ক্ষত্রিয়বীজঘাতি
51.16
বৈশংপায়ন উবাচ
এবমুক্ত্বা ধৃতরাষ্ট্রো মনীষী; দৈবং মত্বা পরমং দুস্তরং চ
শশাসোচ্চৈঃ পুরুষান্পুত্রবাক্যে; স্থিতো রাজা দৈবসংমূঢচেতাঃ
51.17
সহস্রস্তম্ভাং হেমবৈডূর্যচিত্রাং; শতদ্বারাং তোরণস্ফাটিশৃঙ্গাম্
সভামগ্র্যাং ক্রোশমাত্রায়তাং মে; তদ্বিস্তারামাশু কুর্বন্তু যুক্তাঃ
51.18
শ্রুত্বা তস্য ত্বরিতা নির্বিশঙ্কাঃ; প্রাজ্ঞা দক্ষাস্তাং তথা চক্রুরাশু
সর্বদ্রব্যাণ্যুপজহ্রুঃ সভায়াং; সহস্রশঃ শিল্পিনশ্চাপি যুক্তাঃ
51.19
কালেনাল্পেনাথ নিষ্ঠাং গতাং তাং; সভাং রম্যাং বহুরত্নাং বিচিত্রাম্
চিত্রৈর্হৈমৈরাসনৈরভ্যুপেতা;মাচখ্যুস্তে তস্য রাজ্ঞঃ প্রতীতাঃ
51.20
ততো বিদ্বান্বিদুরং মন্ত্রিমুখ্য;মুবাচেদং ধৃতরাষ্ট্রো নরেন্দ্রঃ
যুধিষ্ঠিরং রাজপুত্রং হি গত্বা; মদ্বাক্যেন ক্ষিপ্রমিহানয়স্ব
51.21
সভেয়ং মে বহুরত্না বিচিত্রা; শয্যাসনৈরুপপন্না মহার্হৈঃ
সা দৃশ্যতাং ভ্রাতৃভিঃ সার্ধমেত্য; সুহৃদ্দ্যূতং বর্ততামত্র চেতি
51.22
মতমাজ্ঞায় পুত্রস্য ধৃতরাষ্ট্রো নরাধিপঃ
মত্বা চ দুস্তরং দৈবমেতদ্রাজা চকার হ
51.23
অন্যায়েন তথোক্তস্তু বিদুরো বিদুষাং বরঃ
নাভ্যনন্দদ্বচো ভ্রাতুর্বচনং চেদমব্রবীৎ
51.24
নাভিনন্দামি নৃপতে প্রৈষমেতং; মৈবং কৃথাঃ কুলনাশাদ্বিভেমি
পুত্রৈর্ভিন্নৈঃ কলহস্তে ধ্রুবং স্যা;দেতচ্ছঙ্কে দ্যূতকৃতে নরেন্দ্র
51.25
ধৃতরাষ্ট্র উবাচ
নেহ ক্ষত্তঃ কলহস্তপ্স্যতে মাং; ন চেদ্দৈবং প্রতিলোমং ভবিষ্যৎ
ধাত্রা তু দিষ্টস্য বশে কিলেদং; সর্বং জগচ্চেষ্টতি ন স্বতন্ত্রম্
51.26
তদদ্য বিদুর প্রাপ্য রাজানং মম শাসনাৎ
ক্ষিপ্রমানয় দুর্ধর্ষং কুন্তীপুত্রং যুধিষ্ঠিরম্