Utshovঅধ্যায় 52
52.1
বৈশংপায়ন উবাচ
ততঃ প্রায়াদ্বিদুরোঽশ্বৈরুদারৈ;র্মহাজবৈর্বলিভিঃ সাধুদান্তৈঃ
বলান্নিয়ুক্তো ধৃতরাষ্ট্রেণ রাজ্ঞা; মনীষিণাং পাণ্ডবানাং সকাশম্
52.2
সোঽভিপত্য তদধ্বানমাসাদ্য নৃপতেঃ পুরম্
প্রবিবেশ মহাবুদ্ধিঃ পূজ্যমানো দ্বিজাতিভিঃ
52.3
স রাজগৃহমাসাদ্য কুবেরভবনোপমম্
অভ্যগচ্ছত ধর্মাত্মা ধর্মপুত্রং যুধিষ্ঠিরম্
52.4
তং বৈ রাজা সত্যধৃতির্মহাত্মা; অজাতশত্রুর্বিদুরং যথাবৎ
পূজাপূর্বং প্রতিগৃহ্যাজমীঢ;স্ততোঽপৃচ্ছদ্ধৃতরাষ্ট্রং সপুত্রম্
52.5
যুধিষ্ঠির উবাচ
বিজ্ঞায়তে তে মনসো ন প্রহর্ষঃ; কচ্চিত্ক্ষত্তঃ কুশলেনাগতোঽসি
কচ্চিত্পুত্রাঃ স্থবিরস্যানুলোমা; বশানুগাশ্চাপি বিশোঽপি কচ্চিৎ
52.6
বিদুর উবাচ
রাজা মহাত্মা কুশলী সপুত্র; আস্তে বৃতো জ্ঞাতিভিরিন্দ্রকল্পৈঃ
প্রীতো রাজন্পুত্রগণৈর্বিনীতৈ;র্বিশোক এবাত্মরতির্দৃঢাত্মা
52.7
ইদং তু ত্বাং কুরুরাজোঽভ্যুবাচ; পূর্বং পৃষ্ট্বা কুশলং চাব্যয়ং চ
ইয়ং সভা ত্বত্সভাতুল্যরূপা; ভ্রাতৄণাং তে পশ্য তামেত্য পুত্র
52.8
সমাগম্য ভ্রাতৃভিঃ পার্থ তস্যাং; সুহৃদ্দ্যূতং ক্রিয়তাং রম্যতাং চ
প্রীয়ামহে ভবতঃ সংগমেন; সমাগতাঃ কুরবশ্চৈব সর্বে
52.9
দুরোদরা বিহিতা যে তু তত্র; মহাত্মনা ধৃতরাষ্ট্রেণ রাজ্ঞা
তান্দ্রক্ষ্যসে কিতবান্সংনিবিষ্টা;নিত্যাগতোঽহং নৃপতে তজ্জুষস্ব
52.10
যুধিষ্ঠির উবাচ
দ্যূতে ক্ষত্তঃ কলহো বিদ্যতে নঃ; কো বৈ দ্যূতং রোচয়েদ্বুধ্যমানঃ
কিং বা ভবান্মন্যতে যুক্তরূপং; ভবদ্বাক্যে সর্ব এব স্থিতাঃ স্ম
52.11
বিদুর উবাচ
জানাম্যহং দ্যূতমনর্থমূলং; কৃতশ্চ যত্নোঽস্য ময়া নিবারণে
রাজা তু মাং প্রাহিণোত্ত্বত্সকাশং; শ্রুত্বা বিদ্বঞ্শ্রেয় ইহাচরস্ব
52.12
যুধিষ্ঠির উবাচ
কে তত্রান্যে কিতবা দীব্যমানা; বিনা রাজ্ঞো ধৃতরাষ্ট্রস্য পুত্রৈঃ
পৃচ্ছামি ত্বাং বিদুর ব্রূহি নস্তা;ন্যৈর্দীব্যামঃ শতশঃ সংনিপত্য
52.13
বিদুর উবাচ
গান্ধাররাজঃ শকুনির্বিশাং পতে; রাজাতিদেবী কৃতহস্তো মতাক্ষঃ
বিবিংশতিশ্চিত্রসেনশ্চ রাজা; সত্যব্রতঃ পুরুমিত্রো জয়শ্চ
52.14
যুধিষ্ঠির উবাচ
মহাভয়াঃ কিতবাঃ সংনিবিষ্টা; মায়োপধা দেবিতারোঽত্র সন্তি
ধাত্রা তু দিষ্টস্য বশে কিলেদং; নাদেবনং কিতবৈরদ্য তৈর্মে
52.15
নাহং রাজ্ঞো ধৃতরাষ্ট্রস্য শাসনা;ন্ন গন্তুমিচ্ছামি কবে দুরোদরম্
ইষ্টো হি পুত্রস্য পিতা সদৈব; তদস্মি কর্তা বিদুরাত্থ মাং যথা
52.16
ন চাকামঃ শকুনিনা দেবিতাহং; ন চেন্মাং ধৃষ্ণুরাহ্বয়িতা সভায়াম্
আহূতোঽহং ন নিবর্তে কদাচি;ত্তদাহিতং শাশ্বতং বৈ ব্রতং মে
52.17
বৈশংপায়ন উবাচ
এবমুক্ত্বা বিদুরং ধর্মরাজঃ; প্রায়াত্রিকং সর্বমাজ্ঞাপ্য তূর্ণম্
প্রায়াচ্ছ্বোভূতে সগণঃ সানুয়াত্রঃ; সহ স্ত্রীভির্দ্রৌপদীমাদিকৃত্বা
52.18
দৈবং প্রজ্ঞাং তু মুষ্ণাতি তেজশ্চক্ষুরিবাপতৎ
ধাতুশ্চ বশমন্বেতি পাশৈরিব নরঃ সিতঃ
52.19
ইত্যুক্ত্বা প্রয়য়ৌ রাজা সহ ক্ষত্ত্রা যুধিষ্ঠিরঃ
অমৃষ্যমাণস্তত্পার্থঃ সমাহ্বানমরিংদমঃ
52.20
বাহ্লিকেন রথং দত্তমাস্থায় পরবীরহা
পরিচ্ছন্নো যয়ৌ পার্থো ভ্রাতৃভিঃ সহ পাণ্ডবঃ
52.21
রাজশ্রিয়া দীপ্যমানো যয়ৌ ব্রহ্মপুরঃসরঃ
ধৃতরাষ্ট্রেণ চাহূতঃ কালস্য সময়েন চ
52.22
স হাস্তিনপুরং গত্বা ধৃতরাষ্ট্রগৃহং যয়ৌ
সমিয়ায় চ ধর্মাত্মা ধৃতরাষ্ট্রেণ পাণ্ডবঃ
52.23
তথা দ্রোণেন ভীষ্মেণ কর্ণেন চ কৃপেণ চ
সমিয়ায় যথান্যায়ং দ্রৌণিনা চ বিভুঃ সহ
52.24
সমেত্য চ মহাবাহুঃ সোমদত্তেন চৈব হ
দুর্যোধনেন শল্যেন সৌবলেন চ বীর্যবান্
52.25
যে চান্যে তত্র রাজানঃ পূর্বমেব সমাগতাঃ
জয়দ্রথেন চ তথা কুরুভিশ্চাপি সর্বশঃ
52.26
ততঃ সর্বৈর্মহাবাহুর্ভ্রাতৃভিঃ পরিবারিতঃ
প্রবিবেশ গৃহং রাজ্ঞো ধৃতরাষ্ট্রস্য ধীমতঃ
52.27
দদর্শ তত্র গান্ধারীং দেবীং পতিমনুব্রতাম্
স্নুষাভিঃ সংবৃতাং শশ্বত্তারাভিরিব রোহিণীম্
52.28
অভিবাদ্য স গান্ধারীং তয়া চ প্রতিনন্দিতঃ
দদর্শ পিতরং বৃদ্ধং প্রজ্ঞাচক্ষুষমীশ্বরম্
52.29
রাজ্ঞা মূর্ধন্যুপাঘ্রাতাস্তে চ কৌরবনন্দনাঃ
চত্বারঃ পাণ্ডবা রাজন্ভীমসেনপুরোগমাঃ
52.30
ততো হর্ষঃ সমভবত্কৌরবাণাং বিশাং পতে
তান্দৃষ্ট্বা পুরুষব্যাঘ্রান্পাণ্ডবান্প্রিয়দর্শনান্
52.31
বিবিশুস্তেঽভ্যনুজ্ঞাতা রত্নবন্তি গৃহাণ্যথ
দদৃশুশ্চোপয়াতাস্তান্দ্রৌপদীপ্রমুখাঃ স্ত্রিয়ঃ
52.32
যাজ্ঞসেন্যাঃ পরামৃদ্ধিং দৃষ্ট্বা প্রজ্বলিতামিব
স্নুষাস্তা ধৃতরাষ্ট্রস্য নাতিপ্রমনসোঽভবন্
52.33
ততস্তে পুরুষব্যাঘ্রা গত্বা স্ত্রীভিস্তু সংবিদম্
কৃত্বা ব্যায়ামপূর্বাণি কৃত্যানি প্রতিকর্ম চ
52.34
ততঃ কৃতাহ্নিকাঃ সর্বে দিব্যচন্দনরূষিতাঃ
কল্যাণমনসশ্চৈব ব্রাহ্মণান্স্বস্তি বাচ্য চ
52.35
মনোজ্ঞমশনং ভুক্ত্বা বিবিশুঃ শরণান্যথ
উপগীয়মানা নারীভিরস্বপন্কুরুনন্দনাঃ
52.36
জগাম তেষাং সা রাত্রিঃ পুণ্যা রতিবিহারিণাম্
স্তূয়মানাশ্চ বিশ্রান্তাঃ কালে নিদ্রামথাত্যজন্
52.37
সুখোষিতাস্তাং রজনীং প্রাতঃ সর্বে কৃতাহ্নিকাঃ
সভাং রম্যাং প্রবিবিশুঃ কিতবৈরভিসংবৃতাম্