Utshovঅধ্যায় 53
53.1
শকুনিরুবাচ
উপস্তীর্ণা সভা রাজন্রন্তুং চৈতে কৃতক্ষণাঃ
অক্ষানুপ্ত্বা দেবনস্য সময়োঽস্তু যুধিষ্ঠির
53.2
যুধিষ্ঠির উবাচ
নিকৃতির্দেবনং পাপং ন ক্ষাত্রোঽত্র পরাক্রমঃ
ন চ নীতির্ধ্রুবা রাজন্কিং ত্বং দ্যূতং প্রশংসসি
53.3
ন হি মানং প্রশংসন্তি নিকৃতৌ কিতবস্য হ
শকুনে মৈব নো জৈষীরমার্গেণ নৃশংসবৎ
53.4
শকুনিরুবাচ
যোঽন্বেতি সংখ্যাং নিকৃতৌ বিধিজ্ঞ;শ্চেষ্টাস্বখিন্নঃ কিতবোঽক্ষজাসু
মহামতির্যশ্চ জানাতি দ্যূতং; স বৈ সর্বং সহতে প্রক্রিয়াসু
53.5
অক্ষগ্লহঃ সোঽভিভবেত্পরং ন;স্তেনৈব কালো ভবতীদমাত্থ
দীব্যামহে পার্থিব মা বিশঙ্কাং; কুরুষ্ব পাণং চ চিরং চ মা কৃথাঃ
53.6
যুধিষ্ঠির উবাচ
এবমাহায়মসিতো দেবলো মুনিসত্তমঃ
ইমানি লোকদ্বারাণি যো বৈ সংচরতে সদা
53.7
ইদং বৈ দেবনং পাপং মায়য়া কিতবৈঃ সহ
ধর্মেণ তু জয়ো যুদ্ধে তত্পরং সাধু দেবনম্
53.8
নার্যা ম্লেচ্ছন্তি ভাষাভির্মায়য়া ন চরন্ত্যুত
অজিহ্মমশঠং যুদ্ধমেতত্সত্পুরুষব্রতম্
53.9
শক্তিতো ব্রাহ্মণান্বন্দ্যাঞ্শিক্ষিতুং প্রয়তামহে
তদ্বৈ বিত্তং মাতিদেবীর্মা জৈষীঃ শকুনে পরম্
53.10
নাহং নিকৃত্যা কাময়ে সুখান্যুত ধনানি বা
কিতবস্যাপ্যনিকৃতের্বৃত্তমেতন্ন পূজ্যতে
53.11
শকুনিরুবাচ
শ্রোত্রিয়োঽশ্রোত্রিয়মুত নিকৃত্যৈব যুধিষ্ঠির
বিদ্বানবিদুষোঽভ্যেতি নাহুস্তাং নিকৃতিং জনাঃ
53.12
এবং ত্বং মামিহাভ্যেত্য নিকৃতিং যদি মন্যসে
দেবনাদ্বিনিবর্তস্ব যদি তে বিদ্যতে ভয়ম্
53.13
যুধিষ্ঠির উবাচ
আহূতো ন নিবর্তেয়মিতি মে ব্রতমাহিতম্
বিধিশ্চ বলবান্রাজন্দিষ্টস্যাস্মি বশে স্থিতঃ
53.14
অস্মিন্সমাগমে কেন দেবনং মে ভবিষ্যতি
প্রতিপাণশ্চ কোঽন্যোঽস্তি ততো দ্যূতং প্রবর্ততাম্
53.15
দুর্যোধন উবাচ
অহং দাতাস্মি রত্নানাং ধনানাং চ বিশাং পতে
মদর্থে দেবিতা চায়ং শকুনির্মাতুলো মম
53.16
যুধিষ্ঠির উবাচ
অন্যেনান্যস্য বিষমং দেবনং প্রতিভাতি মে
এতদ্বিদ্বন্নুপাদত্স্ব কামমেবং প্রবর্ততাম্
53.17
বৈশংপায়ন উবাচ
উপোহ্যমানে দ্যূতে তু রাজানঃ সর্ব এব তে
ধৃতরাষ্ট্রং পুরস্কৃত্য বিবিশুস্তাং সভাং ততঃ
53.18
ভীষ্মো দ্রোণঃ কৃপশ্চৈব বিদুরশ্চ মহামতিঃ
নাতীবপ্রীতমনসস্তেঽন্ববর্তন্ত ভারত
53.19
তে দ্বংদ্বশঃ পৃথক্চৈব সিংহগ্রীবা মহৌজসঃ
সিংহাসনানি ভূরীণি বিচিত্রাণি চ ভেজিরে
53.20
শুশুভে সা সভা রাজন্রাজভিস্তৈঃ সমাগতৈঃ
দেবৈরিব মহাভাগৈঃ সমবেতৈস্ত্রিবিষ্টপম্
53.21
সর্বে বেদবিদঃ শূরাঃ সর্বে ভাস্বরমূর্তয়ঃ
প্রাবর্তত মহারাজ সুহৃদ্দ্যূতমনন্তরম্
53.22
যুধিষ্ঠির উবাচ
অয়ং বহুধনো রাজন্সাগরাবর্তসংভবঃ
মণির্হারোত্তরঃ শ্রীমান্কনকোত্তমভূষণঃ
53.23
এতদ্রাজন্ধনং মহ্যং প্রতিপাণস্তু কস্তব
ভবত্বেষ ক্রমস্তাত জয়াম্যেনং দুরোদরম্
53.24
দুর্যোধন উবাচ
সন্তি মে মণয়শ্চৈব ধনানি বিবিধানি চ
মত্সরশ্চ ন মেঽর্থেষু জয়াম্যেনং দুরোদরম্
53.25
বৈশংপায়ন উবাচ
ততো জগ্রাহ শকুনিস্তানক্ষানক্ষতত্ত্ববিৎ
জিতমিত্যেব শকুনির্যুধিষ্ঠিরমভাষত