UtshovChapter 44
44.1
शकुनिरुवाच
दुर्योधन न तेऽमर्षः कार्यः प्रति युधिष्ठिरम्
भागधेयानि हि स्वानि पाण्डवा भुञ्जते सदा
Shakuniruvacha
Duryodhana na temarshah karyah prati yudhishthiram
Bhagadheyani hi svani pandava bhunjate sada
44.2
अनेकैरभ्युपायैश्च त्वयारब्धाः पुरासकृत्
विमुक्ताश्च नरव्याघ्रा भागधेयपुरस्कृताः
Anekairabhyupayaishcha tvayarabdhah purasakrit
Vimuktashcha naravyaghra bhagadheyapuraskritah
44.3
तैर्लब्धा द्रौपदी भार्या द्रुपदश्च सुतैः सह
सहायः पृथिवीलाभे वासुदेवश्च वीर्यवान्
Tairlabdha draupadi bharya drupadashcha sutaih saha
Sahayah prithivilabhe vasudevashcha viryavan
44.4
लब्धश्च नाभिभूतोऽर्थः पित्र्योंऽशः पृथिवीपते
विवृद्धस्तेजसा तेषां तत्र का परिदेवना
Labdhashcha nabhibhutorthah pitryonshah prithivipate
Vivriddhastejasa tesham tatra ka paridevana
44.5
धनंजयेन गाण्डीवमक्षय्यौ च महेषुधी
लब्धान्यस्त्राणि दिव्यानि तर्पयित्वा हुताशनम्
Dhananjayena gandivamakshayyau cha maheshudhi
Labdhanyastrani divyani tarpayitva hutashanam
44.6
तेन कार्मुकमुख्येन बाहुवीर्येण चात्मनः
कृता वशे महीपालास्तत्र का परिदेवना
Tena karmukamukhyena bahuviryena chatmanah
Krita vashe mahipalastatra ka paridevana
44.7
अग्निदाहान्मयं चापि मोक्षयित्वा स दानवम्
सभां तां कारयामास सव्यसाची परंतपः
Agnidahanmayam chapi mokshayitva sa danavam
Sabham tam karayamasa savyasachi parantapah
44.8
तेन चैव मयेनोक्ताः किंकरा नाम राक्षसाः
वहन्ति तां सभां भीमास्तत्र का परिदेवना
Tena chaiva mayenoktah kinkara nama rakshasah
Vahanti tam sabham bhimastatra ka paridevana
44.9
यच्चासहायतां राजन्नुक्तवानसि भारत
तन्मिथ्या भ्रातरो हीमे सहायास्ते महारथाः
Yachchasahayatam rajannuktavanasi bharata
Tanmithya bhrataro hime sahayaste maharathah
44.10
द्रोणस्तव महेष्वासः सह पुत्रेण धीमता
सूतपुत्रश्च राधेयो गौतमश्च महारथः
Dronastava maheshvasah saha putrena dhimata
Sutaputrashcha radheyo gautamashcha maharathah
44.11
अहं च सह सोदर्यैः सौमदत्तिश्च वीर्यवान्
एतैस्त्वं सहितः सर्वैर्जय कृत्स्नां वसुंधराम्
Aham cha saha sodaryaih saumadattishcha viryavan
Etaistvam sahitah sarvairjaya kritsnam vasundharam
44.12
दुर्योधन उवाच
त्वया च सहितो राजन्नेतैश्चान्यैर्महारथैः
एतानेव विजेष्यामि यदि त्वमनुमन्यसे
Duryodhana uvacha
Tvaya cha sahito rajannetaishchanyairmaharathaih
Etaneva vijeshyami yadi tvamanumanyase
44.13
एतेषु विजितेष्वद्य भविष्यति मही मम
सर्वे च पृथिवीपालाः सभा सा च महाधना
Eteshu vijiteshvadya bhavishyati mahi mama
Sarve cha prithivipalah sabha sa cha mahadhana
44.14
शकुनिरुवाच
धनंजयो वासुदेवो भीमसेनो युधिष्ठिरः
नकुलः सहदेवश्च द्रुपदश्च सहात्मजैः
Shakuniruvacha
Dhananjayo vasudevo bhimaseno yudhishthirah
Nakulah sahadevashcha drupadashcha sahatmajaih
44.15
नैते युधि बलाज्जेतुं शक्याः सुरगणैरपि
महारथा महेष्वासाः कृतास्त्रा युद्धदुर्मदाः
Naite yudhi balajjetum shakyah suraganairapi
Maharatha maheshvasah kritastra yuddhadurmadah
44.16
अहं तु तद्विजानामि विजेतुं येन शक्यते
युधिष्ठिरं स्वयं राजंस्तन्निबोध जुषस्व च
Aham tu tadvijanami vijetum yena shakyate
Yudhishthiram svayam rajanstannibodha jushasva cha
44.17
दुर्योधन उवाच
अप्रमादेन सुहृदामन्येषां च महात्मनाम्
यदि शक्या विजेतुं ते तन्ममाचक्ष्व मातुल
Duryodhana uvacha
Apramadena suhridamanyesham cha mahatmanam
Yadi shakya vijetum te tanmamachakshva matula
44.18
शकुनिरुवाच
द्यूतप्रियश्च कौन्तेयो न च जानाति देवितुम्
समाहूतश्च राजेन्द्रो न शक्ष्यति निवर्तितुम्
Shakuniruvacha
Dyutapriyashcha kaunteyo na cha janati devitum
Samahutashcha rajendro na shakshyati nivartitum
44.19
देवने कुशलश्चाहं न मेऽस्ति सदृशो भुवि
त्रिषु लोकेषु कौन्तेयं तं त्वं द्यूते समाह्वय
Devane kushalashchaham na mesti sadrisho bhuvi
Trishu lokeshu kaunteyam tam tvam dyute samahvaya
44.20
तस्याक्षकुशलो राजन्नादास्येऽहमसंशयम्
राज्यं श्रियं च तां दीप्तां त्वदर्थं पुरुषर्षभ
Tasyakshakushalo rajannadasyehamasanshayam
Rajyam shriyam cha tam diptam tvadartham purusharshabha
44.21
इदं तु सर्वं त्वं राज्ञे दुर्योधन निवेदय
अनुज्ञातस्तु ते पित्रा विजेष्ये तं न संशयः
Idam tu sarvam tvam ragye duryodhana nivedaya
Anugyatastu te pitra vijeshye tam na sanshayah
44.22
दुर्योधन उवाच
त्वमेव कुरुमुख्याय धृतराष्ट्राय सौबल
निवेदय यथान्यायं नाहं शक्ष्ये निशंसितुम्
Duryodhana uvacha
Tvameva kurumukhyaya dhritarashtraya saubala
Nivedaya yathanyayam naham shakshye nishansitum