UtshovChapter 32
32.1
वैशंपायन उवाच
पितामहं गुरुं चैव प्रत्युद्गम्य युधिष्ठिरः
अभिवाद्य ततो राजन्निदं वचनमब्रवीत्
भीष्मं द्रोणं कृपं द्रौणिं दुर्योधनविविंशती
Vaishampayana uvacha
Pitamaham gurum chaiva pratyudgamya yudhishthirah
Abhivadya tato rajannidam vachanamabravit
Bhishmam dronam kripam draunim duryodhanavivinshati
32.2
अस्मिन्यज्ञे भवन्तो मामनुगृह्णन्तु सर्वशः
इदं वः स्वमहं चैव यदिहास्ति धनं मम
प्रीणयन्तु भवन्तो मां यथेष्टमनियन्त्रिताः
Asminyagye bhavanto mamanugrihnantu sarvashah
Idam vah svamaham chaiva yadihasti dhanam mama
Prinayantu bhavanto mam yatheshtamaniyantritah
32.3
एवमुक्त्वा स तान्सर्वान्दीक्षितः पाण्डवाग्रजः
युयोज ह यथायोगमधिकारेष्वनन्तरम्
Evamuktva sa tansarvandikshitah pandavagrajah
Yuyoja ha yathayogamadhikareshvanantaram
32.4
भक्ष्यभोज्याधिकारेषु दुःशासनमयोजयत्
परिग्रहे ब्राह्मणानामश्वत्थामानमुक्तवान्
Bhakshyabhojyadhikareshu duhshasanamayojayat
Parigrahe brahmananamashvatthamanamuktavan
32.5
राज्ञां तु प्रतिपूजार्थं संजयं संन्ययोजयत्
कृताकृतपरिज्ञाने भीष्मद्रोणौ महामती
Ragyam tu pratipujartham sanjayam sannyayojayat
Kritakritaparigyane bhishmadronau mahamati
32.6
हिरण्यस्य सुवर्णस्य रत्नानां चान्ववेक्षणे
दक्षिणानां च वै दाने कृपं राजा न्ययोजयत्
तथान्यान्पुरुषव्याघ्रांस्तस्मिंस्तस्मिन्न्ययोजयत्
Hiranyasya suvarnasya ratnanam chanvavekshane
Dakshinanam cha vai dane kripam raja nyayojayat
Tathanyanpurushavyaghranstasminstasminnyayojayat
32.7
बाह्लिको धृतराष्ट्रश्च सोमदत्तो जयद्रथः
नकुलेन समानीताः स्वामिवत्तत्र रेमिरे
Bahliko dhritarashtrashcha somadatto jayadrathah
Nakulena samanitah svamivattatra remire
32.8
क्षत्ता व्ययकरस्त्वासीद्विदुरः सर्वधर्मवित्
दुर्योधनस्त्वर्हणानि प्रतिजग्राह सर्वशः
Kshatta vyayakarastvasidvidurah sarvadharmavit
Duryodhanastvarhanani pratijagraha sarvashah
32.9
सर्वलोकः समावृत्तः पिप्रीषुः फलमुत्तमम्
द्रष्टुकामः सभां चैव धर्मराजं च पाण्डवम्
Sarvalokah samavrittah piprishuh phalamuttamam
Drashtukamah sabham chaiva dharmarajam cha pandavam
32.10
न कश्चिदाहरत्तत्र सहस्रावरमर्हणम्
रत्नैश्च बहुभिस्तत्र धर्मराजमवर्धयन्
Na kashchidaharattatra sahasravaramarhanam
Ratnaishcha bahubhistatra dharmarajamavardhayan
32.11
कथं नु मम कौरव्यो रत्नदानैः समाप्नुयात्
यज्ञमित्येव राजानः स्पर्धमाना ददुर्धनम्
Katham nu mama kauravyo ratnadanaih samapnuyat
Yagyamityeva rajanah spardhamana dadurdhanam
32.12
भवनैः सविमानाग्रैः सोदर्कैर्बलसंवृतैः
लोकराजविमानैश्च ब्राह्मणावसथैः सह
Bhavanaih savimanagraih sodarkairbalasanvritaih
Lokarajavimanaishcha brahmanavasathaih saha
32.13
कृतैरावसथैर्दिव्यैर्विमानप्रतिमैस्तथा
विचित्रै रत्नवद्भिश्च ऋद्ध्या परमया युतैः
Kritairavasathairdivyairvimanapratimaistatha
Vichitrai ratnavadbhishcha riddhya paramaya yutaih
32.14
राजभिश्च समावृत्तैरतीवश्रीसमृद्धिभिः
अशोभत सदो राजन्कौन्तेयस्य महात्मनः
Rajabhishcha samavrittairativashrisamriddhibhih
Ashobhata sado rajankaunteyasya mahatmanah
32.15
ऋद्ध्या च वरुणं देवं स्पर्धमानो युधिष्ठिरः
षडग्निनाथ यज्ञेन सोऽयजद्दक्षिणावता
सर्वाञ्जनान्सर्वकामैः समृद्धैः समतर्पयत्
Riddhya cha varunam devam spardhamano yudhishthirah
Shadagninatha yagyena soyajaddakshinavata
Sarvanjanansarvakamaih samriddhaih samatarpayat
32.16
अन्नवान्बहुभक्ष्यश्च भुक्तवज्जनसंवृतः
रत्नोपहारकर्मण्यो बभूव स समागमः
Annavanbahubhakshyashcha bhuktavajjanasanvritah
Ratnopaharakarmanyo babhuva sa samagamah
32.17
इडाज्यहोमाहुतिभिर्मन्त्रशिक्षासमन्वितैः
तस्मिन्हि ततृपुर्देवास्तते यज्ञे महर्षिभिः
Idajyahomahutibhirmantrashikshasamanvitaih
Tasminhi tatripurdevastate yagye maharshibhih
32.18
यथा देवास्तथा विप्रा दक्षिणान्नमहाधनैः
ततृपुः सर्ववर्णाश्च तस्मिन्यज्ञे मुदान्विताः
Yatha devastatha vipra dakshinannamahadhanaih
Tatripuh sarvavarnashcha tasminyagye mudanvitah