UtshovChapter 26
26.1
वैशंपायन उवाच
एतस्मिन्नेव काले तु भीमसेनोऽपि वीर्यवान्
धर्मराजमनुज्ञाप्य ययौ प्राचीं दिशं प्रति
Vaishampayana uvacha
Etasminneva kale tu bhimasenopi viryavan
Dharmarajamanugyapya yayau prachim disham prati
26.2
महता बलचक्रेण परराष्ट्रावमर्दिना
वृतो भरतशार्दूलो द्विषच्छोकविवर्धनः
Mahata balachakrena pararashtravamardina
Vrito bharatashardulo dvishachchhokavivardhanah
26.3
स गत्वा राजशार्दूलः पाञ्चालानां पुरं महत्
पाञ्चालान्विविधोपायैः सान्त्वयामास पाण्डवः
Sa gatva rajashardulah panchalanam puram mahat
Panchalanvividhopayaih santvayamasa pandavah
26.4
ततः स गण्डकीं शूरो विदेहांश्च नरर्षभः
विजित्याल्पेन कालेन दशार्णानगमत्प्रभुः
Tatah sa gandakim shuro videhanshcha nararshabhah
Vijityalpena kalena dasharnanagamatprabhuh
26.5
तत्र दाशार्णको राजा सुधर्मा लोमहर्षणम्
कृतवान्कर्म भीमेन महद्युद्धं निरायुधम्
Tatra dasharnako raja sudharma lomaharshanam
Kritavankarma bhimena mahadyuddham nirayudham
26.6
भीमसेनस्तु तद्दृष्ट्वा तस्य कर्म परंतपः
अधिसेनापतिं चक्रे सुधर्माणं महाबलम्
Bhimasenastu taddrishtva tasya karma parantapah
Adhisenapatim chakre sudharmanam mahabalam
26.7
ततः प्राचीं दिशं भीमो ययौ भीमपराक्रमः
सैन्येन महता राजन्कम्पयन्निव मेदिनीम्
Tatah prachim disham bhimo yayau bhimaparakramah
Sainyena mahata rajankampayanniva medinim
26.8
सोऽश्वमेधेश्वरं राजन्रोचमानं सहानुजम्
जिगाय समरे वीरो बलेन बलिनां वरः
Soshvamedheshvaram rajanrochamanam sahanujam
Jigaya samare viro balena balinam varah
26.9
स तं निर्जित्य कौन्तेयो नातितीव्रेण कर्मणा
पूर्वदेशं महावीर्यो विजिग्ये कुरुनन्दनः
Sa tam nirjitya kaunteyo natitivrena karmana
Purvadesham mahaviryo vijigye kurunandanah
26.10
ततो दक्षिणमागम्य पुलिन्दनगरं महत्
सुकुमारं वशे चक्रे सुमित्रं च नराधिपम्
Tato dakshinamagamya pulindanagaram mahat
Sukumaram vashe chakre sumitram cha naradhipam
26.11
ततस्तु धर्मराजस्य शासनाद्भरतर्षभः
शिशुपालं महावीर्यमभ्ययाज्जनमेजय
Tatastu dharmarajasya shasanadbharatarshabhah
Shishupalam mahaviryamabhyayajjanamejaya
26.12
चेदिराजोऽपि तच्छ्रुत्वा पाण्डवस्य चिकीर्षितम्
उपनिष्क्रम्य नगरात्प्रत्यगृह्णात्परंतपः
Chedirajopi tachchhrutva pandavasya chikirshitam
Upanishkramya nagaratpratyagrihnatparantapah
26.13
तौ समेत्य महाराज कुरुचेदिवृषौ तदा
उभयोरात्मकुलयोः कौशल्यं पर्यपृच्छताम्
Tau sametya maharaja kuruchedivrishau tada
Ubhayoratmakulayoh kaushalyam paryaprichchhatam
26.14
ततो निवेद्य तद्राष्ट्रं चेदिराजो विशां पते
उवाच भीमं प्रहसन्किमिदं कुरुषेऽनघ
Tato nivedya tadrashtram chedirajo visham pate
Uvacha bhimam prahasankimidam kurushenagha
26.15
तस्य भीमस्तदाचख्यौ धर्मराजचिकीर्षितम्
स च तत्प्रतिगृह्यैव तथा चक्रे नराधिपः
Tasya bhimastadachakhyau dharmarajachikirshitam
Sa cha tatpratigrihyaiva tatha chakre naradhipah
26.16
ततो भीमस्तत्र राजन्नुषित्वा त्रिदशाः क्षपाः
सत्कृतः शिशुपालेन ययौ सबलवाहनः
Tato bhimastatra rajannushitva tridashah kshapah
Satkritah shishupalena yayau sabalavahanah