UtshovChapter 25
25.1
वैशंपायन उवाच
स श्वेतपर्वतं वीरः समतिक्रम्य भारत
देशं किंपुरुषावासं द्रुमपुत्रेण रक्षितम्
Vaishampayana uvacha
Sa shvetaparvatam virah samatikramya bharata
Desham kimpurushavasam drumaputrena rakshitam
25.2
महता संनिपातेन क्षत्रियान्तकरेण ह
व्यजयत्पाण्डवश्रेष्ठः करे चैव न्यवेशयत्
Mahata sannipatena kshatriyantakarena ha
Vyajayatpandavashreshthah kare chaiva nyaveshayat
25.3
तं जित्वा हाटकं नाम देशं गुह्यकरक्षितम्
पाकशासनिरव्यग्रः सहसैन्यः समासदत्
Tam jitva hatakam nama desham guhyakarakshitam
Pakashasaniravyagrah sahasainyah samasadat
25.4
तांस्तु सान्त्वेन निर्जित्य मानसं सर उत्तमम्
ऋषिकुल्याश्च ताः सर्वा ददर्श कुरुनन्दनः
Tanstu santvena nirjitya manasam sara uttamam
Rishikulyashcha tah sarva dadarsha kurunandanah
25.5
सरो मानसमासाद्य हाटकानभितः प्रभुः
गन्धर्वरक्षितं देशं व्यजयत्पाण्डवस्ततः
Saro manasamasadya hatakanabhitah prabhuh
Gandharvarakshitam desham vyajayatpandavastatah
25.6
तत्र तित्तिरिकल्माषान्मण्डूकाक्षान्हयोत्तमान्
लेभे स करमत्यन्तं गन्धर्वनगरात्तदा
Tatra tittirikalmashanmandukakshanhayottaman
Lebhe sa karamatyantam gandharvanagarattada
25.7
उत्तरं हरिवर्षं तु समासाद्य स पाण्डवः
इयेष जेतुं तं देशं पाकशासननन्दनः
Uttaram harivarsham tu samasadya sa pandavah
Iyesha jetum tam desham pakashasananandanah
25.8
तत एनं महाकाया महावीर्या महाबलाः
द्वारपालाः समासाद्य हृष्टा वचनमब्रुवन्
Tata enam mahakaya mahavirya mahabalah
Dvarapalah samasadya hrishta vachanamabruvan
25.9
पार्थ नेदं त्वया शक्यं पुरं जेतुं कथंचन
उपावर्तस्व कल्याण पर्याप्तमिदमच्युत
Partha nedam tvaya shakyam puram jetum kathanchana
Upavartasva kalyana paryaptamidamachyuta
25.10
इदं पुरं यः प्रविशेद्ध्रुवं स न भवेन्नरः
प्रीयामहे त्वया वीर पर्याप्तो विजयस्तव
Idam puram yah pravisheddhruvam sa na bhavennarah
Priyamahe tvaya vira paryapto vijayastava
25.11
न चापि किंचिज्जेतव्यमर्जुनात्र प्रदृश्यते
उत्तराः कुरवो ह्येते नात्र युद्धं प्रवर्तते
Na chapi kinchijjetavyamarjunatra pradrishyate
Uttarah kuravo hyete natra yuddham pravartate
25.12
प्रविष्टश्चापि कौन्तेय नेह द्रक्ष्यसि किंचन
न हि मानुषदेहेन शक्यमत्राभिवीक्षितुम्
Pravishtashchapi kaunteya neha drakshyasi kinchana
Na hi manushadehena shakyamatrabhivikshitum
25.13
अथेह पुरुषव्याघ्र किंचिदन्यच्चिकीर्षसि
तद्ब्रवीहि करिष्यामो वचनात्तव भारत
Atheha purushavyaghra kinchidanyachchikirshasi
Tadbravihi karishyamo vachanattava bharata
25.14
ततस्तानब्रवीद्राजन्नर्जुनः पाकशासनिः
पार्थिवत्वं चिकीर्षामि धर्मराजस्य धीमतः
Tatastanabravidrajannarjunah pakashasanih
Parthivatvam chikirshami dharmarajasya dhimatah
25.15
न प्रवेक्ष्यामि वो देशं बाध्यत्वं यदि मानुषैः
युधिष्ठिराय यत्किंचित्करवन्नः प्रदीयताम्
Na pravekshyami vo desham badhyatvam yadi manushaih
Yudhishthiraya yatkinchitkaravannah pradiyatam
25.16
ततो दिव्यानि वस्त्राणि दिव्यान्याभरणानि च
मोकाजिनानि दिव्यानि तस्मै ते प्रददुः करम्
Tato divyani vastrani divyanyabharanani cha
Mokajinani divyani tasmai te pradaduh karam
25.17
एवं स पुरुषव्याघ्रो विजिग्ये दिशमुत्तराम्
संग्रामान्सुबहून्कृत्वा क्षत्रियैर्दस्युभिस्तथा
Evam sa purushavyaghro vijigye dishamuttaram
Sangramansubahunkritva kshatriyairdasyubhistatha
25.18
स विनिर्जित्य राज्ञस्तान्करे च विनिवेश्य ह
धनान्यादाय सर्वेभ्यो रत्नानि विविधानि च
Sa vinirjitya ragyastankare cha viniveshya ha
Dhananyadaya sarvebhyo ratnani vividhani cha
25.19
हयांस्तित्तिरिकल्माषाञ्शुकपत्रनिभानपि
मयूरसदृशांश्चान्यान्सर्वाननिलरंहसः
Hayanstittirikalmashanshukapatranibhanapi
Mayurasadrishanshchanyansarvananilaranhasah
25.20
वृतः सुमहता राजन्बलेन चतुरङ्गिणा
आजगाम पुनर्वीरः शक्रप्रस्थं पुरोत्तमम्
Vritah sumahata rajanbalena chaturangina
Ajagama punarvirah shakraprastham purottamam