UtshovChapter 10
10.1
नारद उवाच
सभा वैश्रवणी राजञ्शतयोजनमायता
विस्तीर्णा सप्ततिश्चैव योजनानि सितप्रभा
Narada uvacha
Sabha vaishravani rajanshatayojanamayata
Vistirna saptatishchaiva yojanani sitaprabha
10.2
तपसा निर्मिता राजन्स्वयं वैश्रवणेन सा
शशिप्रभा खेचरीणां कैलासशिखरोपमा
Tapasa nirmita rajansvayam vaishravanena sa
Shashiprabha khecharinam kailasashikharopama
10.3
गुह्यकैरुह्यमाना सा खे विषक्तेव दृश्यते
दिव्या हेममयैरुच्चैः पादपैरुपशोभिता
Guhyakairuhyamana sa khe vishakteva drishyate
Divya hemamayairuchchaih padapairupashobhita
10.4
रश्मिवती भास्वरा च दिव्यगन्धा मनोरमा
सिताभ्रशिखराकारा प्लवमानेव दृश्यते
Rashmivati bhasvara cha divyagandha manorama
Sitabhrashikharakara plavamaneva drishyate
10.5
तस्यां वैश्रवणो राजा विचित्राभरणाम्बरः
स्त्रीसहस्रावृतः श्रीमानास्ते ज्वलितकुण्डलः
Tasyam vaishravano raja vichitrabharanambarah
Strisahasravritah shrimanaste jvalitakundalah
10.6
दिवाकरनिभे पुण्ये दिव्यास्तरणसंवृते
दिव्यपादोपधाने च निषण्णः परमासने
Divakaranibhe punye divyastaranasanvrite
Divyapadopadhane cha nishannah paramasane
10.7
मन्दाराणामुदाराणां वनानि सुरभीणि च
सौगन्धिकानां चादाय गन्धान्गन्धवहः शुचिः
Mandaranamudaranam vanani surabhini cha
Saugandhikanam chadaya gandhangandhavahah shuchih
10.8
नलिन्याश्चालकाख्यायाश्चन्दनानां वनस्य च
मनोहृदयसंह्लादी वायुस्तमुपसेवते
Nalinyashchalakakhyayashchandananam vanasya cha
Manohridayasanhladi vayustamupasevate
10.9
तत्र देवाः सगन्धर्वा गणैरप्सरसां वृताः
दिव्यतानेन गीतानि गान्ति दिव्यानि भारत
Tatra devah sagandharva ganairapsarasam vritah
Divyatanena gitani ganti divyani bharata
10.10
मिश्रकेशी च रम्भा च चित्रसेना शुचिस्मिता
चारुनेत्रा घृताची च मेनका पुञ्जिकस्थला
Mishrakeshi cha rambha cha chitrasena shuchismita
Charunetra ghritachi cha menaka punjikasthala
10.11
विश्वाची सहजन्या च प्रम्लोचा उर्वशी इरा
वर्गा च सौरभेयी च समीची बुद्बुदा लता
Vishvachi sahajanya cha pramlocha urvashi ira
Varga cha saurabheyi cha samichi budbuda lata
10.12
एताः सहस्रशश्चान्या नृत्तगीतविशारदाः
उपतिष्ठन्ति धनदं पाण्डवाप्सरसां गणाः
Etah sahasrashashchanya nrittagitavisharadah
Upatishthanti dhanadam pandavapsarasam ganah
10.13
अनिशं दिव्यवादित्रैर्नृत्तैर्गीतैश्च सा सभा
अशून्या रुचिरा भाति गन्धर्वाप्सरसां गणैः
Anisham divyavaditrairnrittairgitaishcha sa sabha
Ashunya ruchira bhati gandharvapsarasam ganaih
10.14
किंनरा नाम गन्धर्वा नरा नाम तथापरे
मणिभद्रोऽथ धनदः श्वेतभद्रश्च गुह्यकः
Kinnara nama gandharva nara nama tathapare
Manibhadrotha dhanadah shvetabhadrashcha guhyakah
10.15
कशेरको गण्डकण्डुः प्रद्योतश्च महाबलः
कुस्तुम्बुरुः पिशाचश्च गजकर्णो विशालकः
Kasherako gandakanduh pradyotashcha mahabalah
Kustumburuh pishachashcha gajakarno vishalakah
10.16
वराहकर्णः सान्द्रोष्ठः फलभक्षः फलोदकः
अङ्गचूडः शिखावर्तो हेमनेत्रो विभीषणः
Varahakarnah sandroshthah phalabhakshah phalodakah
Angachudah shikhavarto hemanetro vibhishanah
10.17
पुष्पाननः पिङ्गलकः शोणितोदः प्रवालकः
वृक्षवास्यनिकेतश्च चीरवासाश्च भारत
Pushpananah pingalakah shonitodah pravalakah
Vrikshavasyaniketashcha chiravasashcha bharata
10.18
एते चान्ये च बहवो यक्षाः शतसहस्रशः
सदा भगवती च श्रीस्तथैव नलकूबरः
Ete chanye cha bahavo yakshah shatasahasrashah
Sada bhagavati cha shristathaiva nalakubarah
10.19
अहं च बहुशस्तस्यां भवन्त्यन्ये च मद्विधाः
आचार्याश्चाभवंस्तत्र तथा देवर्षयोऽपरे
Aham cha bahushastasyam bhavantyanye cha madvidhah
Acharyashchabhavanstatra tatha devarshayopare
10.20
भगवान्भूतसंघैश्च वृतः शतसहस्रशः
उमापतिः पशुपतिः शूलधृग्भगनेत्रहा
Bhagavanbhutasanghaishcha vritah shatasahasrashah
Umapatih pashupatih shuladhrigbhaganetraha
10.21
त्र्यम्बको राजशार्दूल देवी च विगतक्लमा
वामनैर्विकटैः कुब्जैः क्षतजाक्षैर्मनोजवैः
Tryambako rajashardula devi cha vigataklama
Vamanairvikataih kubjaih kshatajakshairmanojavaih
10.22
मांसमेदोवसाहारैरुग्रश्रवणदर्शनैः
नानाप्रहरणैर्घोरैर्वातैरिव महाजवैः
वृतः सखायमन्वास्ते सदैव धनदं नृप
Mansamedovasaharairugrashravanadarshanaih
Nanapraharanairghorairvatairiva mahajavaih
Vritah sakhayamanvaste sadaiva dhanadam nripa
10.23
सा सभा तादृशी राजन्मया दृष्टान्तरिक्षगा
पितामहसभां राजन्कथयिष्ये गतक्लमाम्
Sa sabha tadrishi rajanmaya drishtantarikshaga
Pitamahasabham rajankathayishye gataklamam