UtshovChapter 9
9.1
नारद उवाच
युधिष्ठिर सभा दिव्या वरुणस्य सितप्रभा
प्रमाणेन यथा याम्या शुभप्राकारतोरणा
Narada uvacha
Yudhishthira sabha divya varunasya sitaprabha
Pramanena yatha yamya shubhaprakaratorana
9.2
अन्तःसलिलमास्थाय विहिता विश्वकर्मणा
दिव्यरत्नमयैर्वृक्षैः फलपुष्पप्रदैर्युता
Antahsalilamasthaya vihita vishvakarmana
Divyaratnamayairvrikshaih phalapushpapradairyuta
9.3
नीलपीतासितश्यामैः सितैर्लोहितकैरपि
अवतानैस्तथा गुल्मैः पुष्पमञ्जरिधारिभिः
Nilapitasitashyamaih sitairlohitakairapi
Avatanaistatha gulmaih pushpamanjaridharibhih
9.4
तथा शकुनयस्तस्यां नानारूपा मृदुस्वराः
अनिर्देश्या वपुष्मन्तः शतशोऽथ सहस्रशः
Tatha shakunayastasyam nanarupa mridusvarah
Anirdeshya vapushmantah shatashotha sahasrashah
9.5
सा सभा सुखसंस्पर्शा न शीता न च घर्मदा
वेश्मासनवती रम्या सिता वरुणपालिता
Sa sabha sukhasansparsha na shita na cha gharmada
Veshmasanavati ramya sita varunapalita
9.6
यस्यामास्ते स वरुणो वारुण्या सह भारत
दिव्यरत्नाम्बरधरो भूषणैरुपशोभितः
Yasyamaste sa varuno varunya saha bharata
Divyaratnambaradharo bhushanairupashobhitah
9.7
स्रग्विणो भूषिताश्चापि दिव्यमाल्यानुकर्षिणः
आदित्यास्तत्र वरुणं जलेश्वरमुपासते
Sragvino bhushitashchapi divyamalyanukarshinah
Adityastatra varunam jaleshvaramupasate
9.8
वासुकिस्तक्षकश्चैव नागश्चैरावतस्तथा
कृष्णश्च लोहितश्चैव पद्मश्चित्रश्च वीर्यवान्
Vasukistakshakashchaiva nagashchairavatastatha
Krishnashcha lohitashchaiva padmashchitrashcha viryavan
9.9
कम्बलाश्वतरौ नागौ धृतराष्ट्रबलाहकौ
मणिमान्कुण्डलधरः कर्कोटकधनंजयौ
Kambalashvatarau nagau dhritarashtrabalahakau
Manimankundaladharah karkotakadhananjayau
9.10
प्रह्लादो मूषिकादश्च तथैव जनमेजयः
पताकिनो मण्डलिनः फणवन्तश्च सर्वशः
Prahlado mushikadashcha tathaiva janamejayah
Patakino mandalinah phanavantashcha sarvashah
9.11
एते चान्ये च बहवः सर्पास्तस्यां युधिष्ठिर
उपासते महात्मानं वरुणं विगतक्लमाः
Ete chanye cha bahavah sarpastasyam yudhishthira
Upasate mahatmanam varunam vigataklamah
9.12
बलिर्वैरोचनो राजा नरकः पृथिवींजयः
प्रह्लादो विप्रचित्तिश्च कालखञ्जाश्च सर्वशः
Balirvairochano raja narakah prithivinjayah
Prahlado viprachittishcha kalakhanjashcha sarvashah
9.13
सुहनुर्दुर्मुखः शङ्खः सुमनाः सुमतिः स्वनः
घटोदरो महापार्श्वः क्रथनः पिठरस्तथा
Suhanurdurmukhah shankhah sumanah sumatih svanah
Ghatodaro mahaparshvah krathanah pitharastatha
9.14
विश्वरूपः सुरूपश्च विरूपोऽथ महाशिराः
दशग्रीवश्च वाली च मेघवासा दशावरः
Vishvarupah surupashcha virupotha mahashirah
Dashagrivashcha vali cha meghavasa dashavarah
9.15
कैटभो विटटूतश्च संह्रादश्चेन्द्रतापनः
दैत्यदानवसंघाश्च सर्वे रुचिरकुण्डलाः
Kaitabho vitatutashcha sanhradashchendratapanah
Daityadanavasanghashcha sarve ruchirakundalah
9.16
स्रग्विणो मौलिनः सर्वे तथा दिव्यपरिच्छदाः
सर्वे लब्धवराः शूराः सर्वे विगतमृत्यवः
Sragvino maulinah sarve tatha divyaparichchhadah
Sarve labdhavarah shurah sarve vigatamrityavah
9.17
ते तस्यां वरुणं देवं धर्मपाशस्थिताः सदा
उपासते महात्मानं सर्वे सुचरितव्रताः
Te tasyam varunam devam dharmapashasthitah sada
Upasate mahatmanam sarve sucharitavratah
9.18
तथा समुद्राश्चत्वारो नदी भागीरथी च या
कालिन्दी विदिशा वेण्णा नर्मदा वेगवाहिनी
Tatha samudrashchatvaro nadi bhagirathi cha ya
Kalindi vidisha venna narmada vegavahini
9.19
विपाशा च शतद्रुश्च चन्द्रभागा सरस्वती
इरावती वितस्ता च सिन्धुर्देवनदस्तथा
Vipasha cha shatadrushcha chandrabhaga sarasvati
Iravati vitasta cha sindhurdevanadastatha
9.20
गोदावरी कृष्णवेण्णा कावेरी च सरिद्वरा
एताश्चान्याश्च सरितस्तीर्थानि च सरांसि च
Godavari krishnavenna kaveri cha saridvara
Etashchanyashcha saritastirthani cha saransi cha
9.21
कूपाश्च सप्रस्रवणा देहवन्तो युधिष्ठिर
पल्वलानि तडागानि देहवन्त्यथ भारत
Kupashcha saprasravana dehavanto yudhishthira
Palvalani tadagani dehavantyatha bharata
9.22
दिशस्तथा मही चैव तथा सर्वे महीधराः
उपासते महात्मानं सर्वे जलचरास्तथा
Dishastatha mahi chaiva tatha sarve mahidharah
Upasate mahatmanam sarve jalacharastatha
9.23
गीतवादित्रवन्तश्च गन्धर्वाप्सरसां गणाः
स्तुवन्तो वरुणं तस्यां सर्व एव समासते
Gitavaditravantashcha gandharvapsarasam ganah
Stuvanto varunam tasyam sarva eva samasate
9.24
महीधरा रत्नवन्तो रसा येषु प्रतिष्ठिताः
सर्वे विग्रहवन्तस्ते तमीश्वरमुपासते
Mahidhara ratnavanto rasa yeshu pratishthitah
Sarve vigrahavantaste tamishvaramupasate
9.25
एषा मया संपतता वारुणी भरतर्षभ
दृष्टपूर्वा सभा रम्या कुबेरस्य सभां शृणु
Esha maya sampatata varuni bharatarshabha
Drishtapurva sabha ramya kuberasya sabham shrinu