Utshovঅধ্যায় 71
71.1
ধৃতরাষ্ট্র উবাচ
কথং গচ্ছতি কৌন্তেয়ো ধর্মরাজো যুধিষ্ঠিরঃ
ভীমসেনঃ সব্যসাচী মাদ্রীপুত্রৌ চ তাবুভৌ
71.2
ধৌম্যশ্চৈব কথং ক্ষত্তর্দ্রৌপদী বা তপস্বিনী
শ্রোতুমিচ্ছাম্যহং সর্বং তেষামঙ্গবিচেষ্টিতম্
71.3
বিদুর উবাচ
বস্ত্রেণ সংবৃত্য মুখং কুন্তীপুত্রো যুধিষ্ঠিরঃ
বাহূ বিশালৌ কৃত্বা তু ভীমো গচ্ছতি পাণ্ডবঃ
71.4
সিকতা বপন্সব্যসাচী রাজানমনুগচ্ছতি
মাদ্রীপুত্রঃ সহদেবো মুখমালিপ্য গচ্ছতি
71.5
পাংসূপলিপ্তসর্বাঙ্গো নকুলশ্চিত্তবিহ্বলঃ
দর্শনীয়তমো লোকে রাজানমনুগচ্ছতি
71.6
কৃষ্ণা কেশৈঃ প্রতিচ্ছাদ্য মুখমায়তলোচনা
দর্শনীয়া প্ররুদতী রাজানমনুগচ্ছতি
71.7
ধৌম্যো যাম্যানি সামানি রৌদ্রাণি চ বিশাং পতে
গায়ন্গচ্ছতি মার্গেষু কুশানাদায় পাণিনা
71.8
ধৃতরাষ্ট্র উবাচ
বিবিধানীহ রূপাণি কৃত্বা গচ্ছন্তি পাণ্ডবাঃ
তন্মমাচক্ষ্ব বিদুর কস্মাদেবং ব্রজন্তি তে
71.9
বিদুর উবাচ
নিকৃতস্যাপি তে পুত্রৈর্হৃতে রাজ্যে ধনেষু চ
ন ধর্মাচ্চলতে বুদ্ধির্ধর্মরাজস্য ধীমতঃ
71.10
যোঽসৌ রাজা ঘৃণী নিত্যং ধার্তরাষ্ট্রেষু ভারত
নিকৃত্যা ক্রোধসংতপ্তো নোন্মীলয়তি লোচনে
71.11
নাহং জনং নির্দহেয়ং দৃষ্ট্বা ঘোরেণ চক্ষুষা
স পিধায় মুখং রাজা তস্মাদ্গচ্ছতি পাণ্ডবঃ
71.12
যথা চ ভীমো ব্রজতি তন্মে নিগদতঃ শৃণু
বাহ্বোর্বলে নাস্তি সমো মমেতি ভরতর্ষভ
71.13
বাহূ বিশালৌ কৃত্বা তু তেন ভীমোঽপি গচ্ছতি
বাহূ দর্শয়মানো হি বাহুদ্রবিণদর্পিতঃ
চিকীর্ষন্কর্ম শত্রুভ্যো বাহুদ্রব্যানুরূপতঃ
71.14
প্রদিশঞ্শরসংপাতান্কুন্তীপুত্রোঽর্জুনস্তদা
সিকতা বপন্সব্যসাচী রাজানমনুগচ্ছতি
71.15
অসক্তাঃ সিকতাস্তস্য যথা সংপ্রতি ভারত
অসক্তং শরবর্ষাণি তথা মোক্ষ্যতি শত্রুষু
71.16
ন মে কশ্চিদ্বিজানীয়ান্মুখমদ্যেতি ভারত
মুখমালিপ্য তেনাসৌ সহদেবোঽপি গচ্ছতি
71.17
নাহং মনাংস্যাদদেয়ং মার্গে স্ত্রীণামিতি প্রভো
পাংসূপচিতসর্বাঙ্গো নকুলস্তেন গচ্ছতি
71.18
একবস্ত্রা তু রুদতী মুক্তকেশী রজস্বলা
শোণিতাক্তার্দ্রবসনা দ্রৌপদী বাক্যমব্রবীৎ
71.19
যত্কৃতেঽহমিমাং প্রাপ্তা তেষাং বর্ষে চতুর্দশে
হতপত্যো হতসুতা হতবন্ধুজনপ্রিয়াঃ
71.20
বন্ধুশোণিতদিগ্ধাঙ্গ্যো মুক্তকেশ্যো রজস্বলাঃ
এবং কৃতোদকা নার্যঃ প্রবেক্ষ্যন্তি গজাহ্বয়ম্
71.21
কৃত্বা তু নৈরৃতান্দর্ভান্ধীরো ধৌম্যঃ পুরোহিতঃ
সামানি গায়ন্যাম্যানি পুরতো যাতি ভারত
71.22
হতেষু ভারতেষ্বাজৌ কুরূণাং গুরবস্তদা
এবং সামানি গাস্যন্তীত্যুক্ত্বা ধৌম্যোঽপি গচ্ছতি
71.23
হা হা গচ্ছন্তি নো নাথাঃ সমবেক্ষধ্বমীদৃশম্
ইতি পৌরাঃ সুদুঃখার্তাঃ ক্রোশন্তি স্ম সমন্ততঃ
71.24
এবমাকারলিঙ্গৈস্তে ব্যবসায়ং মনোগতম্
কথয়ন্তঃ স্ম কৌন্তেয়া বনং জগ্মুর্মনস্বিনঃ
71.25
এবং তেষু নরাগ্র্যেষু নির্যত্সু গজসাহ্বয়াৎ
অনভ্রে বিদ্যুতশ্চাসন্ভূমিশ্চ সমকম্পত
71.26
রাহুরগ্রসদাদিত্যমপর্বণি বিশাং পতে
উল্কা চাপ্যপসব্যং তু পুরং কৃত্বা ব্যশীর্যত
71.27
প্রব্যাহরন্তি ক্রব্যাদা গৃধ্রগোমায়ুবায়সাঃ
দেবায়তনচৈত্যেষু প্রাকারাট্টালকেষু চ
71.28
এবমেতে মহোত্পাতা বনং গচ্ছতি পাণ্ডবে
ভারতানামভাবায় রাজন্দুর্মন্ত্রিতে তব
71.29
নারদশ্চ সভামধ্যে কুরূণামগ্রতঃ স্থিতঃ
মহর্ষিভিঃ পরিবৃতো রৌদ্রং বাক্যমুবাচ হ
71.30
ইতশ্চতুর্দশে বর্ষে বিনঙ্ক্ষ্যন্তীহ কৌরবাঃ
দুর্যোধনাপরাধেন ভীমার্জুনবলেন চ
71.31
ইত্যুক্ত্বা দিবমাক্রম্য ক্ষিপ্রমন্তরধীয়ত
ব্রাহ্মীং শ্রিয়ং সুবিপুলাং বিভ্রদ্দেবর্ষিসত্তমঃ
71.32
ততো দুর্যোধনঃ কর্ণঃ শকুনিশ্চাপি সৌবলঃ
দ্রোণং দ্বীপমমন্যন্ত রাজ্যং চাস্মৈ ন্যবেদয়ন্
71.33
অথাব্রবীত্ততো দ্রোণো দুর্যোধনমমর্ষণম্
দুঃশাসনং চ কর্ণং চ সর্বানেব চ ভারতান্
71.34
অবধ্যান্পাণ্ডবানাহুর্দেবপুত্রান্দ্বিজাতয়ঃ
অহং তু শরণং প্রাপ্তান্বর্তমানো যথাবলম্
71.35
গতান্সর্বাত্মনা ভক্ত্যা ধার্তরাষ্ট্রান্সরাজকান্
নোত্সহে সমভিত্যক্তুং দৈবমূলমতঃ পরম্
71.36
ধর্মতঃ পাণ্ডুপুত্রা বৈ বনং গচ্ছন্তি নির্জিতাঃ
তে চ দ্বাদশ বর্ষাণি বনে বত্স্যন্তি কৌরবাঃ
71.37
চরিতব্রহ্মচর্যাশ্চ ক্রোধামর্ষবশানুগাঃ
বৈরং প্রত্যানয়িষ্যন্তি মম দুঃখায় পাণ্ডবাঃ
71.38
ময়া তু ভ্রংশিতো রাজ্যাদ্দ্রুপদঃ সখিবিগ্রহে
পুত্রার্থময়জত্ক্রোধাদ্বধায় মম ভারত
71.39
যাজোপয়াজতপসা পুত্রং লেভে স পাবকাৎ
ধৃষ্টদ্যুম্নং দ্রৌপদীং চ বেদীমধ্যাত্সুমধ্যমাম্
71.40
জ্বালাবর্ণো দেবদত্তো ধনুষ্মান্কবচী শরী
মর্ত্যধর্মতয়া তস্মাদিতি মাং ভয়মাবিশৎ
71.41
গতো হি পক্ষতাং তেষাং পার্ষতঃ পুরুষর্ষভঃ
সৃষ্টপ্রাণো ভৃশতরং তস্মাদ্যোত্স্যে তবারিভিঃ
71.42
মদ্বধায় শ্রুতো হ্যেষ লোকে চাপ্যতিবিশ্রুতঃ
নূনং সোঽয়মনুপ্রাপ্তস্ত্বত্কৃতে কালপর্যয়ঃ
71.43
ত্বরিতাঃ কুরুত শ্রেয়ো নৈতদেতাবতা কৃতম্
মুহূর্তং সুখমেবৈতত্তালচ্ছায়েব হৈমনী
71.44
যজধ্বং চ মহায়জ্ঞৈর্ভোগানশ্নীত দত্ত চ
ইতশ্চতুর্দশে বর্ষে মহত্প্রাপ্স্যথ বৈশসম্
71.45
দুর্যোধন নিশম্যৈতত্প্রতিপদ্য যথেচ্ছসি
সাম বা পাণ্ডবেয়েষু প্রয়ুঙ্ক্ষ্ব যদি মন্যসে
71.46
বৈশংপায়ন উবাচ
দ্রোণস্য বচনং শ্রুত্বা ধৃতরাষ্ট্রোঽব্রবীদিদম্
সম্যগাহ গুরুঃ ক্ষত্তরুপাবর্তয় পাণ্ডবান্
71.47
যদি বা ন নিবর্তন্তে সত্কৃতা যান্তু পাণ্ডবাঃ
সশস্ত্ররথপাদাতা ভোগবন্তশ্চ পুত্রকাঃ