Utshovঅধ্যায় 72
72.1
বৈশংপায়ন উবাচ
বনং গতেষু পার্থেষু নির্জিতেষু দুরোদরে
ধৃতরাষ্ট্রং মহারাজ তদা চিন্তা সমাবিশৎ
72.2
তং চিন্তয়ানমাসীনং ধৃতরাষ্ট্রং জনেশ্বরম্
নিঃশ্বসন্তমনেকাগ্রমিতি হোবাচ সংজয়ঃ
72.3
অবাপ্য বসুসংপূর্ণাং বসুধাং বসুধাধিপ
প্রব্রাজ্য পাণ্ডবান্রাজ্যাদ্রাজন্কিমনুশোচসি
72.4
ধৃতরাষ্ট্র উবাচ
অশোচ্যং তু কুতস্তেষাং যেষাং বৈরং ভবিষ্যতি
পাণ্ডবৈর্যুদ্ধশৌণ্ডৈর্হি মিত্রবদ্ভির্মহারথৈঃ
72.5
সংজয় উবাচ
তবেদং সুকৃতং রাজন্মহদ্বৈরং ভবিষ্যতি
বিনাশঃ সর্বলোকস্য সানুবন্ধো ভবিষ্যতি
72.6
বার্যমাণোঽপি ভীষ্মেণ দ্রোণেন বিদুরেণ চ
পাণ্ডবানাং প্রিয়াং ভার্যাং দ্রৌপদীং ধর্মচারিণীম্
72.7
প্রাহিণোদানয়েহেতি পুত্রো দুর্যোধনস্তব
সূতপুত্রং সুমন্দাত্মা নির্লজ্জঃ প্রাতিকামিনম্
72.8
ধৃতরাষ্ট্র উবাচ
যস্মৈ দেবাঃ প্রয়চ্ছন্তি পুরুষায় পরাভবম্
বুদ্ধিং তস্যাপকর্ষন্তি সোঽপাচীনানি পশ্যতি
72.9
বুদ্ধৌ কলুষভূতায়াং বিনাশে প্রত্যুপস্থিতে
অনয়ো নয়সংকাশো হৃদয়ান্নাপসর্পতি
72.10
অনর্থাশ্চার্থরূপেণ অর্থাশ্চানর্থরূপিণঃ
উত্তিষ্ঠন্তি বিনাশান্তে নরং তচ্চাস্য রোচতে
72.11
ন কালো দণ্ডমুদ্যম্য শিরঃ কৃন্ততি কস্যচিৎ
কালস্য বলমেতাবদ্বিপরীতার্থদর্শনম্
72.12
আসাদিতমিদং ঘোরং তুমুলং লোমহর্ষণম্
পাঞ্চালীমপকর্ষদ্ভিঃ সভামধ্যে তপস্বিনীম্
72.13
অয়োনিজাং রূপবতীং কুলে জাতাং বিভাবরীম্
কো নু তাং সর্বধর্মজ্ঞাং পরিভূয় যশস্বিনীম্
72.14
পর্যানয়েত্সভামধ্যমৃতে দুর্দ্যূতদেবিনম্
স্ত্রীধর্মিণীং বরারোহাং শোণিতেন সমুক্ষিতাম্
72.15
একবস্ত্রাং চ পাঞ্চালীং পাণ্ডবানভ্যবেক্ষতীম্
হৃতস্বান্ভ্রষ্টচিত্তাংস্তান্হৃতদারান্হৃতশ্রিয়ঃ
72.16
বিহীনান্সর্বকামেভ্যো দাসভাববশং গতান্
ধর্মপাশপরিক্ষিপ্তানশক্তানিব বিক্রমে
72.17
ক্রুদ্ধামমর্ষিতাং কৃষ্ণাং দুঃখিতাং কুরুসংসদি
দুর্যোধনশ্চ কর্ণশ্চ কটুকান্যভ্যভাষতাম্
72.18
তস্যাঃ কৃপণচক্ষুর্ভ্যাং প্রদহ্যেতাপি মেদিনী
অপি শেষং ভবেদদ্য পুত্রাণাং মম সংজয়
72.19
ভারতানাং স্ত্রিয়ঃ সর্বা গান্ধার্যা সহ সংগতাঃ
প্রাক্রোশন্ভৈরবং তত্র দৃষ্ট্বা কৃষ্ণাং সভাগতাম্
72.20
অগ্নিহোত্রাণি সায়াহ্নে ন চাহূয়ন্ত সর্বশঃ
ব্রাহ্মণাঃ কুপিতাশ্চাসন্দ্রৌপদ্যাঃ পরিকর্ষণে
72.21
আসীন্নিষ্টানকো ঘোরো নির্ঘাতশ্চ মহানভূৎ
দিবোল্কাশ্চাপতন্ঘোরা রাহুশ্চার্কমুপাগ্রসৎ
অপর্বণি মহাঘোরং প্রজানাং জনয়ন্ভয়ম্
72.22
তথৈব রথশালাসু প্রাদুরাসীদ্ধুতাশনঃ
ধ্বজাশ্চ ব্যবশীর্যন্ত ভরতানামভূতয়ে
72.23
দুর্যোধনস্যাগ্নিহোত্রে প্রাক্রোশন্ভৈরবং শিবাঃ
তাস্তদা প্রত্যভাষন্ত রাসভাঃ সর্বতোদিশম্
72.24
প্রাতিষ্ঠত ততো ভীষ্মো দ্রোণেন সহ সংজয়
কৃপশ্চ সোমদত্তশ্চ বাহ্লীকশ্চ মহারথঃ
72.25
ততোঽহমব্রুবং তত্র বিদুরেণ প্রচোদিতঃ
বরং দদানি কৃষ্ণায়ৈ কাঙ্ক্ষিতং যদ্যদিচ্ছতি
72.26
অবৃণোত্তত্র পাঞ্চালী পাণ্ডবানমিতৌজসঃ
সরথান্সধনুষ্কাংশ্চাপ্যনুজ্ঞাসিষমপ্যহম্
72.27
অথাব্রবীন্মহাপ্রাজ্ঞো বিদুরঃ সর্বধর্মবিৎ
এতদন্তাঃ স্থ ভরতা যদ্বঃ কৃষ্ণা সভাং গতা
72.28
এষা পাঞ্চালরাজস্য সুতৈষা শ্রীরনুত্তমা
পাঞ্চালী পাণ্ডবানেতান্দৈবসৃষ্টোপসর্পতি
72.29
তস্যাঃ পার্থাঃ পরিক্লেশং ন ক্ষংস্যন্তেঽত্যমর্ষণাঃ
বৃষ্ণয়ো বা মহেষ্বাসাঃ পাঞ্চালা বা মহৌজসঃ
72.30
তেন সত্যাভিসংধেন বাসুদেবেন রক্ষিতাঃ
আগমিষ্যতি বীভত্সুঃ পাঞ্চালৈরভিরক্ষিতঃ
72.31
তেষাং মধ্যে মহেষ্বাসো ভীমসেনো মহাবলঃ
আগমিষ্যতি ধুন্বানো গদাং দণ্ডমিবান্তকঃ
72.32
ততো গাণ্ডীবনির্ঘোষং শ্রুত্বা পার্থস্য ধীমতঃ
গদাবেগং চ ভীমস্য নালং সোঢুং নরাধিপাঃ
72.33
তত্র মে রোচতে নিত্যং পার্থৈঃ সার্ধং ন বিগ্রহঃ
কুরুভ্যো হি সদা মন্যে পাণ্ডবাঞ্শক্তিমত্তরান্
72.34
তথা হি বলবান্রাজা জরাসংধো মহাদ্যুতিঃ
বাহুপ্রহরণেনৈব ভীমেন নিহতো যুধি
72.35
তস্য তে শম এবাস্তু পাণ্ডবৈর্ভরতর্ষভ
উভয়োঃ পক্ষয়োর্যুক্তং ক্রিয়তামবিশঙ্কয়া
72.36
এবং গাবল্গণে ক্ষত্তা ধর্মার্থসহিতং বচঃ
উক্তবান্ন গৃহীতং চ ময়া পুত্রহিতেপ্সয়া