Utshovঅধ্যায় 70
70.1
বৈশংপায়ন উবাচ
তস্মিন্সংপ্রস্থিতে কৃষ্ণা পৃথাং প্রাপ্য যশস্বিনীম্
আপৃচ্ছদ্ভৃশদুঃখার্তা যাশ্চান্যাস্তত্র যোষিতঃ
70.2
যথার্হং বন্দনাশ্লেষান্কৃত্বা গন্তুমিয়েষ সা
ততো নিনাদঃ সুমহান্পাণ্ডবান্তঃপুরেঽভবৎ
70.3
কুন্তী চ ভৃশসংতপ্তা দ্রৌপদীং প্রেক্ষ্য গচ্ছতীম্
শোকবিহ্বলয়া বাচা কৃচ্ছ্রাদ্বচনমব্রবীৎ
70.4
বত্সে শোকো ন তে কার্যঃ প্রাপ্যেদং ব্যসনং মহৎ
স্ত্রীধর্মাণামভিজ্ঞাসি শীলাচারবতী তথা
70.5
ন ত্বাং সংদেষ্টুমর্হামি ভর্তৄন্প্রতি শুচিস্মিতে
সাধ্বীগুণসমাধানৈর্ভূষিতং তে কুলদ্বয়ম্
70.6
সভাগ্যাঃ কুরবশ্চেমে যে ন দগ্ধাস্ত্বয়ানঘে
অরিষ্টং ব্রজ পন্থানং মদনুধ্যানবৃংহিতা
70.7
ভাবিন্যর্থে হি সত্স্ত্রীণাং বৈক্লব্যং নোপজায়তে
গুরুধর্মাভিগুপ্তা চ শ্রেয়ঃ ক্ষিপ্রমবাপ্স্যসি
70.8
সহদেবশ্চ মে পুত্রঃ সদাবেক্ষ্যো বনে বসন্
যথেদং ব্যসনং প্রাপ্য নাস্য সীদেন্মহন্মনঃ
70.9
তথেত্যুক্ত্বা তু সা দেবী স্রবন্নেত্রজলাবিলা
শোণিতাক্তৈকবসনা মুক্তকেশ্যভিনির্যয়ৌ
70.10
তাং ক্রোশন্তীং পৃথা দুঃখাদনুবব্রাজ গচ্ছতীম্
অথাপশ্যত্সুতান্সর্বান্হৃতাভরণবাসসঃ
70.11
রুরুচর্মাবৃততনূন্হ্রিয়া কিংচিদবাঙ্মুখান্
পরৈঃ পরীতান্সংহৃষ্টৈঃ সুহৃদ্ভিশ্চানুশোচিতান্
70.12
তদবস্থান্সুতান্সর্বানুপসৃত্যাতিবত্সলা
সস্বজানাবদচ্ছোকাত্তত্তদ্বিলপতী বহু
70.13
কথং সদ্ধর্মচারিত্রবৃত্তস্থিতিবিভূষিতান্
অক্ষুদ্রান্দৃঢভক্তাংশ্চ দৈবতেজ্যাপরান্সদা
70.14
ব্যসনং বঃ সমভ্যাগাত্কোঽয়ং বিধিবিপর্যয়ঃ
কস্যাপধ্যানজং চেদমাগঃ পশ্যামি বো ধিয়া
70.15
স্যাত্তু মদ্ভাগ্যদোষোঽয়ং যাহং যুষ্মানজীজনম্
দুঃখায়াসভুজোঽত্যর্থং যুক্তানপ্যুত্তমৈর্গুণৈঃ
70.16
কথং বত্স্যথ দুর্গেষু বনেষ্বৃদ্ধিবিনাকৃতাঃ
বীর্যসত্ত্ববলোত্সাহতেজোভিরকৃশাঃ কৃশাঃ
70.17
যদ্যেতদহমজ্ঞাস্যং বনবাসো হি বো ধ্রুবম্
শতশৃঙ্গান্মৃতে পাণ্ডৌ নাগমিষ্যং গজাহ্বয়ম্
70.18
ধন্যং বঃ পিতরং মন্যে তপোমেধান্বিতং তথা
যঃ পুত্রাধিমসংপ্রাপ্য স্বর্গেচ্ছামকরোত্প্রিয়াম্
70.19
ধন্যাং চাতীন্দ্রিয়জ্ঞানামিমাং প্রাপ্তাং পরাং গতিম্
মন্যেঽদ্য মাদ্রীং ধর্মজ্ঞাং কল্যাণীং সর্বথৈব হি
70.20
রত্যা মত্যা চ গত্যা চ যয়াহমভিসংধিতা
জীবিতপ্রিয়তাং মহ্যং ধিগিমাং ক্লেশভাগিনীম্
70.21
এবং বিলপতীং কুন্তীমভিসান্ত্ব্য প্রণম্য চ
পাণ্ডবা বিগতানন্দা বনায়ৈব প্রবব্রজুঃ
70.22
বিদুরাদয়শ্চ তামার্তাং কুন্তীমাশ্বাস্য হেতুভিঃ
প্রাবেশয়ন্গৃহং ক্ষত্তুঃ স্বয়মার্ততরাঃ শনৈঃ
70.23
রাজা চ ধৃতরাষ্ট্রঃ স শোকাকুলিতচেতনঃ
ক্ষত্তুঃ সংপ্রেষয়ামাস শীঘ্রমাগম্যতামিতি
70.24
ততো জগাম বিদুরো ধৃতরাষ্ট্রনিবেশনম্
তং পর্যপৃচ্ছত্সংবিগ্নো ধৃতরাষ্ট্রো নরাধিপঃ