অধ্যায় 69

69.1

যুধিষ্ঠির উবাচ
আমন্ত্রয়ামি ভরতাংস্তথা বৃদ্ধং পিতামহম্
রাজানং সোমদত্তং চ মহারাজং চ বাহ্লিকম্

দ্রোণং কৃপং নৃপাংশ্চান্যানশ্বত্থামানমেব চ
বিদুরং ধৃতরাষ্ট্রং চ ধার্তরাষ্ট্রাংশ্চ সর্বশঃ

যুয়ুত্সুং সংজয়ং চৈব তথৈবান্যান্সভাসদঃ
সর্বানামন্ত্র্য গচ্ছামি দ্রষ্টাস্মি পুনরেত্য বঃ

বৈশংপায়ন উবাচ
ন চ কিংচিত্তদোচুস্তে হ্রিয়া সন্তো যুধিষ্ঠিরম্
মনোভিরেব কল্যাণং দধ্যুস্তে তস্য ধীমতঃ

বিদুর উবাচ
আর্যা পৃথা রাজপুত্রী নারণ্যং গন্তুমর্হতি
সুকুমারী চ বৃদ্ধা চ নিত্যং চৈব সুখোচিতা

ইহ বত্স্যতি কল্যাণী সত্কৃতা মম বেশ্মনি
ইতি পার্থা বিজানীধ্বমগদং বোঽস্তু সর্বশঃ

যুধিষ্ঠির বিজানীহি মমেদং ভরতর্ষভ
নাধর্মেণ জিতঃ কশ্চিদ্ব্যথতে বৈ পরাজয়াৎ

ত্বং বৈ ধর্মান্বিজানীষে যুধাং বেত্তা ধনংজয়ঃ
হন্তারীণাং ভীমসেনো নকুলস্ত্বর্থসংগ্রহী

সংয়ন্তা সহদেবস্তু ধৌম্যো ব্রহ্মবিদুত্তমঃ
ধর্মার্থকুশলা চৈব দ্রৌপদী ধর্মচারিণী

অন্যোন্যস্য প্রিয়াঃ সর্বে তথৈব প্রিয়বাদিনঃ
পরৈরভেদ্যাঃ সংতুষ্টাঃ কো বো ন স্পৃহয়েদিহ

এষ বৈ সর্বকল্যাণঃ সমাধিস্তব ভারত
নৈনং শত্রুর্বিষহতে শক্রেণাপি সমোঽচ্যুত

হিমবত্যনুশিষ্টোঽসি মেরুসাবর্ণিনা পুরা
দ্বৈপায়নেন কৃষ্ণেন নগরে বারণাবতে

ভৃগুতুঙ্গে চ রামেণ দৃষদ্বত্যাং চ শংভুনা
অশ্রৌষীরসিতস্যাপি মহর্ষেরঞ্জনং প্রতি

দ্রষ্টা সদা নারদস্য ধৌম্যস্তেঽয়ং পুরোহিতঃ
মা হার্ষীঃ সাংপরায়ে ত্বং বুদ্ধিং তামৃষিপূজিতাম্

পুরূরবসমৈলং ত্বং বুদ্ধ্যা জয়সি পাণ্ডব
শক্ত্যা জয়সি রাজ্ঞোঽন্যানৃষীন্ধর্মোপসেবয়া

ঐন্দ্রে জয়ে ধৃতমনা যাম্যে কোপবিধারণে
বিসর্গে চৈব কৌবেরে বারুণে চৈব সংয়মে

আত্মপ্রদানং সৌম্যত্বমদ্ভ্যশ্চৈবোপজীবনম্
ভূমেঃ ক্ষমা চ তেজশ্চ সমগ্রং সূর্যমণ্ডলাৎ

বায়োর্বলং বিদ্ধি স ত্বং ভূতেভ্যশ্চাত্মসংভবম্
অগদং বোঽস্তু ভদ্রং বো দ্রক্ষ্যামি পুনরাগতান্

আপদ্ধর্মার্থকৃচ্ছ্রেষু সর্বকার্যেষু বা পুনঃ
যথাবত্প্রতিপদ্যেথাঃ কালে কালে যুধিষ্ঠির

আপৃষ্টোঽসীহ কৌন্তেয় স্বস্তি প্রাপ্নুহি ভারত
কৃতার্থং স্বস্তিমন্তং ত্বাং দ্রক্ষ্যামঃ পুনরাগতম্

বৈশংপায়ন উবাচ
এবমুক্তস্তথেত্যুক্ত্বা পাণ্ডবঃ সত্যবিক্রমঃ
ভীষ্মদ্রোণৌ নমস্কৃত্য প্রাতিষ্ঠত যুধিষ্ঠিরঃ