UtshovChapter 69
69.1
युधिष्ठिर उवाच
आमन्त्रयामि भरतांस्तथा वृद्धं पितामहम्
राजानं सोमदत्तं च महाराजं च बाह्लिकम्
Yudhishthira uvacha
Amantrayami bharatanstatha vriddham pitamaham
Rajanam somadattam cha maharajam cha bahlikam
69.2
द्रोणं कृपं नृपांश्चान्यानश्वत्थामानमेव च
विदुरं धृतराष्ट्रं च धार्तराष्ट्रांश्च सर्वशः
Dronam kripam nripanshchanyanashvatthamanameva cha
Viduram dhritarashtram cha dhartarashtranshcha sarvashah
69.3
युयुत्सुं संजयं चैव तथैवान्यान्सभासदः
सर्वानामन्त्र्य गच्छामि द्रष्टास्मि पुनरेत्य वः
Yuyutsum sanjayam chaiva tathaivanyansabhasadah
Sarvanamantrya gachchhami drashtasmi punaretya vah
69.4
वैशंपायन उवाच
न च किंचित्तदोचुस्ते ह्रिया सन्तो युधिष्ठिरम्
मनोभिरेव कल्याणं दध्युस्ते तस्य धीमतः
Vaishampayana uvacha
Na cha kinchittadochuste hriya santo yudhishthiram
Manobhireva kalyanam dadhyuste tasya dhimatah
69.5
विदुर उवाच
आर्या पृथा राजपुत्री नारण्यं गन्तुमर्हति
सुकुमारी च वृद्धा च नित्यं चैव सुखोचिता
Vidura uvacha
Arya pritha rajaputri naranyam gantumarhati
Sukumari cha vriddha cha nityam chaiva sukhochita
69.6
इह वत्स्यति कल्याणी सत्कृता मम वेश्मनि
इति पार्था विजानीध्वमगदं वोऽस्तु सर्वशः
Iha vatsyati kalyani satkrita mama veshmani
Iti partha vijanidhvamagadam vostu sarvashah
69.7
युधिष्ठिर विजानीहि ममेदं भरतर्षभ
नाधर्मेण जितः कश्चिद्व्यथते वै पराजयात्
Yudhishthira vijanihi mamedam bharatarshabha
Nadharmena jitah kashchidvyathate vai parajayat
69.8
त्वं वै धर्मान्विजानीषे युधां वेत्ता धनंजयः
हन्तारीणां भीमसेनो नकुलस्त्वर्थसंग्रही
Tvam vai dharmanvijanishe yudham vetta dhananjayah
Hantarinam bhimaseno nakulastvarthasangrahi
69.9
संयन्ता सहदेवस्तु धौम्यो ब्रह्मविदुत्तमः
धर्मार्थकुशला चैव द्रौपदी धर्मचारिणी
Sanyanta sahadevastu dhaumyo brahmaviduttamah
Dharmarthakushala chaiva draupadi dharmacharini
69.10
अन्योन्यस्य प्रियाः सर्वे तथैव प्रियवादिनः
परैरभेद्याः संतुष्टाः को वो न स्पृहयेदिह
Anyonyasya priyah sarve tathaiva priyavadinah
Parairabhedyah santushtah ko vo na sprihayediha
69.11
एष वै सर्वकल्याणः समाधिस्तव भारत
नैनं शत्रुर्विषहते शक्रेणापि समोऽच्युत
Esha vai sarvakalyanah samadhistava bharata
Nainam shatrurvishahate shakrenapi samochyuta
69.12
हिमवत्यनुशिष्टोऽसि मेरुसावर्णिना पुरा
द्वैपायनेन कृष्णेन नगरे वारणावते
Himavatyanushishtosi merusavarnina pura
Dvaipayanena krishnena nagare varanavate
69.13
भृगुतुङ्गे च रामेण दृषद्वत्यां च शंभुना
अश्रौषीरसितस्यापि महर्षेरञ्जनं प्रति
Bhrigutunge cha ramena drishadvatyam cha shambhuna
Ashraushirasitasyapi maharsheranjanam prati
69.14
द्रष्टा सदा नारदस्य धौम्यस्तेऽयं पुरोहितः
मा हार्षीः सांपराये त्वं बुद्धिं तामृषिपूजिताम्
Drashta sada naradasya dhaumyasteyam purohitah
Ma harshih samparaye tvam buddhim tamrishipujitam
69.15
पुरूरवसमैलं त्वं बुद्ध्या जयसि पाण्डव
शक्त्या जयसि राज्ञोऽन्यानृषीन्धर्मोपसेवया
Pururavasamailam tvam buddhya jayasi pandava
Shaktya jayasi ragyonyanrishindharmopasevaya
69.16
ऐन्द्रे जये धृतमना याम्ये कोपविधारणे
विसर्गे चैव कौबेरे वारुणे चैव संयमे
Aindre jaye dhritamana yamye kopavidharane
Visarge chaiva kaubere varune chaiva sanyame
69.17
आत्मप्रदानं सौम्यत्वमद्भ्यश्चैवोपजीवनम्
भूमेः क्षमा च तेजश्च समग्रं सूर्यमण्डलात्
Atmapradanam saumyatvamadbhyashchaivopajivanam
Bhumeh kshama cha tejashcha samagram suryamandalat
69.18
वायोर्बलं विद्धि स त्वं भूतेभ्यश्चात्मसंभवम्
अगदं वोऽस्तु भद्रं वो द्रक्ष्यामि पुनरागतान्
Vayorbalam viddhi sa tvam bhutebhyashchatmasambhavam
Agadam vostu bhadram vo drakshyami punaragatan
69.19
आपद्धर्मार्थकृच्छ्रेषु सर्वकार्येषु वा पुनः
यथावत्प्रतिपद्येथाः काले काले युधिष्ठिर
Apaddharmarthakrichchhreshu sarvakaryeshu va punah
Yathavatpratipadyethah kale kale yudhishthira
69.20
आपृष्टोऽसीह कौन्तेय स्वस्ति प्राप्नुहि भारत
कृतार्थं स्वस्तिमन्तं त्वां द्रक्ष्यामः पुनरागतम्
Aprishtosiha kaunteya svasti prapnuhi bharata
Kritartham svastimantam tvam drakshyamah punaragatam
69.21
वैशंपायन उवाच
एवमुक्तस्तथेत्युक्त्वा पाण्डवः सत्यविक्रमः
भीष्मद्रोणौ नमस्कृत्य प्रातिष्ठत युधिष्ठिरः
Vaishampayana uvacha
Evamuktastathetyuktva pandavah satyavikramah
Bhishmadronau namaskritya pratishthata yudhishthirah