Utshovঅধ্যায় 68
68.1
বৈশংপায়ন উবাচ
বনবাসায় চক্রুস্তে মতিং পার্থাঃ পরাজিতাঃ
অজিনান্যুত্তরীয়াণি জগৃহুশ্চ যথাক্রমম্
68.2
অজিনৈঃ সংবৃতান্দৃষ্ট্বা হৃতরাজ্যানরিংদমান্
প্রস্থিতান্বনবাসায় ততো দুঃশাসনোঽব্রবীৎ
68.3
প্রবৃত্তং ধার্তরাষ্ট্রস্য চক্রং রাজ্ঞো মহাত্মনঃ
পরাভূতাঃ পাণ্ডুপুত্রা বিপত্তিং পরমাং গতাঃ
68.4
অদ্য দেবাঃ সংপ্রয়াতাঃ সমৈর্বর্ত্মভিরস্থলৈঃ
গুণজ্যেষ্ঠাস্তথা জ্যেষ্ঠা ভূয়াংসো যদ্বয়ং পরৈঃ
68.5
নরকং পাতিতাঃ পার্থা দীর্ঘকালমনন্তকম্
সুখাচ্চ হীনা রাজ্যাচ্চ বিনষ্টাঃ শাশ্বতীঃ সমাঃ
68.6
বলেন মত্তা যে তে স্ম ধার্তরাষ্ট্রান্প্রহাসিষুঃ
তে নির্জিতা হৃতধনা বনমেষ্যন্তি পাণ্ডবাঃ
68.7
চিত্রান্সংনাহানবমুঞ্চন্তু চৈষাং; বাসাংসি দিব্যানি চ ভানুমন্তি
নিবাস্যন্তাং রুরুচর্মাণি সর্বে; যথা গ্লহং সৌবলস্যাভ্যুপেতাঃ
68.8
ন সন্তি লোকেষু পুমাংস ঈদৃশা; ইত্যেব যে ভাবিতবুদ্ধয়ঃ সদা
জ্ঞাস্যন্তি তেঽঽত্মানমিমেঽদ্য পাণ্ডবা; বিপর্যয়ে ষণ্ঢতিলা ইবাফলাঃ
68.9
অয়ং হি বাসোদয় ঈদৃশানাং; মনস্বিনাং কৌরব মা ভবেদ্বঃ
অদীক্ষিতানামজিনানি যদ্ব;দ্বলীয়সাং পশ্যত পাণ্ডবানাম্
68.10
মহাপ্রাজ্ঞঃ সোমকো যজ্ঞসেনঃ; কন্যাং পাঞ্চালীং পাণ্ডবেভ্যঃ প্রদায়
অকার্ষীদ্বৈ দুষ্কৃতং নেহ সন্তি; ক্লীবাঃ পার্থাঃ পতয়ো যাজ্ঞসেন্যাঃ
68.11
সূক্ষ্মান্প্রাবারানজিনানি চোদিতা;ন্দৃষ্ট্বারণ্যে নির্ধনানপ্রতিষ্ঠান্
কাং ত্বং প্রীতিং লপ্স্যসে যাজ্ঞসেনি; পতিং বৃণীষ্ব যমিহান্যমিচ্ছসি
68.12
এতে হি সর্বে কুরবঃ সমেতাঃ; ক্ষান্তা দান্তাঃ সুদ্রবিণোপপন্নাঃ
এষাং বৃণীষ্বৈকতমং পতিত্বে; ন ত্বাং তপেত্কালবিপর্যয়োঽয়ম্
68.13
যথাফলাঃ ষণ্ঢতিলা যথা চর্মময়া মৃগাঃ
তথৈব পাণ্ডবাঃ সর্বে যথা কাকয়বা অপি
68.14
কিং পাণ্ডবাংস্ত্বং পতিতানুপাস্সে; মোঘঃ শ্রমঃ ষণ্ঢতিলানুপাস্য
এবং নৃশংসঃ পরুষাণি পার্থা;নশ্রাবয়দ্ধৃতরাষ্ট্রস্য পুত্রঃ
68.15
তদ্বৈ শ্রুত্বা ভীমসেনোঽত্যমর্ষী; নির্ভর্ত্স্যোচ্চৈস্তং নিগৃহ্যৈব রোষাৎ
উবাচেদং সহসৈবোপগম্য; সিংহো যথা হৈমবতঃ শৃগালম্
68.16
ভীমসেন উবাচ
ক্রূর পাপজনৈর্জুষ্টমকৃতার্থং প্রভাষসে
গান্ধারবিদ্যয়া হি ত্বং রাজমধ্যে বিকত্থসে
68.17
যথা তুদসি মর্মাণি বাক্শরৈরিহ নো ভৃশম্
তথা স্মারয়িতা তেঽহং কৃন্তন্মর্মাণি সংয়ুগে
68.18
যে চ ত্বামনুবর্তন্তে কামলোভবশানুগাঃ
গোপ্তারঃ সানুবন্ধাংস্তান্নেষ্যামি যমসাদনম্
68.19
বৈশংপায়ন উবাচ
এবং ব্রুবাণমজিনৈর্বিবাসিতং; দুঃখাভিভূতং পরিনৃত্যতি স্ম
মধ্যে কুরূণাং ধর্মনিবদ্ধমার্গং; গৌর্গৌরিতি স্মাহ্বয়ন্মুক্তলজ্জঃ
68.20
ভীমসেন উবাচ
নৃশংসং পরুষং ক্রূরং শক্যং দুঃশাসন ত্বয়া
নিকৃত্যা হি ধনং লব্ধ্বা কো বিকত্থিতুমর্হতি
68.21
মা হ স্ম সুকৃতাঁল্লোকান্গচ্ছেত্পার্থো বৃকোদরঃ
যদি বক্ষসি ভিত্ত্বা তে ন পিবেচ্ছোণিতং রণে
68.22
ধার্তরাষ্ট্রান্রণে হত্বা মিষতাং সর্বধন্বিনাম্
শমং গন্তাস্মি নচিরাত্সত্যমেতদ্ব্রবীমি বঃ
68.23
বৈশংপায়ন উবাচ
তস্য রাজা সিংহগতেঃ সখেলং; দুর্যোধনো ভীমসেনস্য হর্ষাৎ
গতিং স্বগত্যানুচকার মন্দো; নির্গচ্ছতাং পাণ্ডবানাং সভায়াঃ
68.24
নৈতাবতা কৃতমিত্যব্রবীত্তং; বৃকোদরঃ সংনিবৃত্তার্ধকায়ঃ
শীঘ্রং হি ত্বা নিহতং সানুবন্ধং; সংস্মার্যাহং প্রতিবক্ষ্যামি মূঢ
68.25
এতত্সমীক্ষ্যাত্মনি চাবমানং; নিয়ম্য মন্যুং বলবান্স মানী
রাজানুগঃ সংসদি কৌরবাণাং; বিনিষ্ক্রমন্বাক্যমুবাচ ভীমঃ
68.26
অহং দুর্যোধনং হন্তা কর্ণং হন্তা ধনংজয়ঃ
শকুনিং চাক্ষকিতবং সহদেবো হনিষ্যতি
68.27
ইদং চ ভূয়ো বক্ষ্যামি সভামধ্যে বৃহদ্বচঃ
সত্যং দেবাঃ করিষ্যন্তি যন্নো যুদ্ধং ভবিষ্যতি
68.28
সুয়োধনমিমং পাপং হন্তাস্মি গদয়া যুধি
শিরঃ পাদেন চাস্যাহমধিষ্ঠাস্যামি ভূতলে
68.29
বাক্যশূরস্য চৈবাস্য পরুষস্য দুরাত্মনঃ
দুঃশাসনস্য রুধিরং পাতাস্মি মৃগরাডিব
68.30
অর্জুন উবাচ
নৈব বাচা ব্যবসিতং ভীম বিজ্ঞায়তে সতাম্
ইতশ্চতুর্দশে বর্ষে দ্রষ্টারো যদ্ভবিষ্যতি
68.31
দুর্যোধনস্য কর্ণস্য শকুনেশ্চ দুরাত্মনঃ
দুঃশাসনচতুর্থানাং ভূমিঃ পাস্যতি শোণিতম্
68.32
অসূয়িতারং বক্তারং প্রস্রষ্টারং দুরাত্মনাম্
ভীমসেন নিয়োগাত্তে হন্তাহং কর্ণমাহবে
68.33
অর্জুনঃ প্রতিজানীতে ভীমস্য প্রিয়কাম্যয়া
কর্ণং কর্ণানুগাংশ্চৈব রণে হন্তাস্মি পত্রিভিঃ
68.34
যে চান্যে প্রতিয়োত্স্যন্তি বুদ্ধিমোহেন মাং নৃপাঃ
তাংশ্চ সর্বাঞ্শিতৈর্বাণৈর্নেতাস্মি যমসাদনম্
68.35
চলেদ্ধি হিমবান্স্থানান্নিষ্প্রভঃ স্যাদ্দিবাকরঃ
শৈত্যং সোমাত্প্রণশ্যেত মত্সত্যং বিচলেদ্যদি
68.36
ন প্রদাস্যতি চেদ্রাজ্যমিতো বর্ষে চতুর্দশে
দুর্যোধনো হি সত্কৃত্য সত্যমেতদ্ভবিষ্যতি
68.37
বৈশংপায়ন উবাচ
ইত্যুক্তবতি পার্থে তু শ্রীমান্মাদ্রবতীসুতঃ
প্রগৃহ্য বিপুলং বাহুং সহদেবঃ প্রতাপবান্
68.38
সৌবলস্য বধং প্রেপ্সুরিদং বচনমব্রবীৎ
ক্রোধসংরক্তনয়নো নিঃশ্বসন্নিব পন্নগঃ
68.39
অক্ষান্যান্মন্যসে মূঢ গান্ধারাণাং যশোহর
নৈতেঽক্ষা নিশিতা বাণাস্ত্বয়ৈতে সমরে বৃতাঃ
68.40
যথা চৈবোক্তবান্ভীমস্ত্বামুদ্দিশ্য সবান্ধবম্
কর্তাহং কর্মণস্তস্য কুরু কার্যাণি সর্বশঃ
68.41
হন্তাস্মি তরসা যুদ্ধে ত্বাং বিক্রম্য সবান্ধবম্
যদি স্থাস্যসি সংগ্রামে ক্ষত্রধর্মেণ সৌবল
68.42
সহদেববচঃ শ্রুত্বা নকুলোঽপি বিশাং পতে
দর্শনীয়তমো নৄণামিদং বচনমব্রবীৎ
68.43
সুতেয়ং যজ্ঞসেনস্য দ্যূতেঽস্মিন্ধৃতরাষ্ট্রজৈঃ
যৈর্বাচঃ শ্রাবিতা রূক্ষাঃ স্থিতৈর্দুর্যোধনপ্রিয়ে
68.44
তান্ধার্তরাষ্ট্রান্দুর্বৃত্তান্মুমূর্ষূন্কালচোদিতান্
দর্শয়িষ্যামি ভূয়িষ্ঠমহং বৈবস্বতক্ষয়ম্
68.45
নিদেশাদ্ধর্মরাজস্য দ্রৌপদ্যাঃ পদবীং চরন্
নির্ধার্তরাষ্ট্রাং পৃথিবীং কর্তাস্মি নচিরাদিব
68.46
এবং তে পুরুষব্যাঘ্রাঃ সর্বে ব্যায়তবাহবঃ
প্রতিজ্ঞা বহুলাঃ কৃত্বা ধৃতরাষ্ট্রমুপাগমন্