অধ্যায় 67

67.1

বৈশংপায়ন উবাচ
ততো ব্যধ্বগতং পার্থং প্রাতিকামী যুধিষ্ঠিরম্
উবাচ বচনাদ্রাজ্ঞো ধৃতরাষ্ট্রস্য ধীমতঃ

উপস্তীর্ণা সভা রাজন্নক্ষানুপ্ত্বা যুধিষ্ঠির
এহি পাণ্ডব দীব্যেতি পিতা ত্বামাহ ভারত

যুধিষ্ঠির উবাচ
ধাতুর্নিয়োগাদ্ভূতানি প্রাপ্নুবন্তি শুভাশুভম্
ন নিবৃত্তিস্তয়োরস্তি দেবিতব্যং পুনর্যদি

অক্ষদ্যূতে সমাহ্বানং নিয়োগাত্স্থবিরস্য চ
জানন্নপি ক্ষয়করং নাতিক্রমিতুমুত্সহে

বৈশংপায়ন উবাচ
ইতি ব্রুবন্নিববৃতে ভ্রাতৃভিঃ সহ পাণ্ডবঃ
জানংশ্চ শকুনের্মায়াং পার্থো দ্যূতমিয়াত্পুনঃ

বিবিশুস্তে সভাং তাং তু পুনরেব মহারথাঃ
ব্যথয়ন্তি স্ম চেতাংসি সুহৃদাং ভরতর্ষভাঃ

যথোপজোষমাসীনাঃ পুনর্দ্যূতপ্রবৃত্তয়ে
সর্বলোকবিনাশায় দৈবেনোপনিপীডিতাঃ

শকুনিরুবাচ
অমুঞ্চত্স্থবিরো যদ্বো ধনং পূজিতমেব তৎ
মহাধনং গ্লহং ত্বেকং শৃণু মে ভরতর্ষভ

বয়ং দ্বাদশ বর্ষাণি যুষ্মাভির্দ্যূতনির্জিতাঃ
প্রবিশেম মহারণ্যং রৌরবাজিনবাসসঃ

ত্রয়োদশং চ সজনে অজ্ঞাতাঃ পরিবত্সরম্
জ্ঞাতাশ্চ পুনরন্যানি বনে বর্ষাণি দ্বাদশ

অস্মাভির্বা জিতা যূয়ং বনে বর্ষাণি দ্বাদশ
বসধ্বং কৃষ্ণয়া সার্ধমজিনৈঃ প্রতিবাসিতাঃ

ত্রয়োদশে চ নির্বৃত্তে পুনরেব যথোচিতম্
স্বরাজ্যং প্রতিপত্তব্যমিতরৈরথ বেতরৈঃ

অনেন ব্যবসায়েন সহাস্মাভির্যুধিষ্ঠির
অক্ষানুপ্ত্বা পুনর্দ্যূতমেহি দীব্যস্ব ভারত

সভাসদ ঊচুঃ
অহো ধিগ্বান্ধবা নৈনং বোধয়ন্তি মহদ্ভয়ম্
বুদ্ধ্যা বোধ্যং ন বুধ্যন্তে স্বয়ং চ ভরতর্ষভাঃ

বৈশংপায়ন উবাচ
জনপ্রবাদান্সুবহূনিতি শৃণ্বন্নরাধিপঃ
হ্রিয়া চ ধর্মসঙ্গাচ্চ পার্থো দ্যূতমিয়াত্পুনঃ

জানন্নপি মহাবুদ্ধিঃ পুনর্দ্যূতমবর্তয়ৎ
অপ্যয়ং ন বিনাশঃ স্যাত্কুরূণামিতি চিন্তয়ন্

যুধিষ্ঠির উবাচ
কথং বৈ মদ্বিধো রাজা স্বধর্মমনুপালয়ন্
আহূতো বিনিবর্তেত দীব্যামি শকুনে ত্বয়া

শকুনিরুবাচ
গবাশ্বং বহুধেনূকমপর্যন্তমজাবিকম্
গজাঃ কোশো হিরণ্যং চ দাসীদাসং চ সর্বশঃ

এষ নো গ্লহ এবৈকো বনবাসায় পাণ্ডবাঃ
যূয়ং বয়ং বা বিজিতা বসেম বনমাশ্রিতাঃ

অনেন ব্যবসায়েন দীব্যাম ভরতর্ষভ
সমুত্ক্ষেপেণ চৈকেন বনবাসায় ভারত

বৈশংপায়ন উবাচ
প্রতিজগ্রাহ তং পার্থো গ্লহং জগ্রাহ সৌবলঃ
জিতমিত্যেব শকুনির্যুধিষ্ঠিরমভাষত