Utshovঅধ্যায় 66
66.1
জনমেজয় উবাচ
অনুজ্ঞাতাংস্তান্বিদিত্বা সরত্নধনসংচয়ান্
পাণ্ডবান্ধার্তরাষ্ট্রাণাং কথমাসীন্মনস্তদা
66.2
বৈশংপায়ন উবাচ
অনুজ্ঞাতাংস্তান্বিদিত্বা ধৃতরাষ্ট্রেণ ধীমতা
রাজন্দুঃশাসনঃ ক্ষিপ্রং জগাম ভ্রাতরং প্রতি
66.3
দুর্যোধনং সমাসাদ্য সামাত্যং ভরতর্ষভ
দুঃখার্তো ভরতশ্রেষ্ঠ ইদং বচনমব্রবীৎ
66.4
দুঃখেনৈতত্সমানীতং স্থবিরো নাশয়ত্যসৌ
শত্রুসাদ্গময়দ্দ্রব্যং তদ্বুধ্যধ্বং মহারথাঃ
66.5
অথ দুর্যোধনঃ কর্ণঃ শকুনিশ্চাপি সৌবলঃ
মিথঃ সংগম্য সহিতাঃ পাণ্ডবান্প্রতি মানিনঃ
66.6
বৈচিত্রবীর্যং রাজানং ধৃতরাষ্ট্রং মনীষিণম্
অভিগম্য ত্বরায়ুক্তাঃ শ্লক্ষ্ণং বচনমব্রুবন্
66.7
দুর্যোধন উবাচ
ন ত্বয়েদং শ্রুতং রাজন্যজ্জগাদ বৃহস্পতিঃ
শক্রস্য নীতিং প্রবদন্বিদ্বান্দেবপুরোহিতঃ
66.8
সর্বোপায়ৈর্নিহন্তব্যাঃ শত্রবঃ শত্রুকর্ষণ
পুরা যুদ্ধাদ্বলাদ্বাপি প্রকুর্বন্তি তবাহিতম্
66.9
তে বয়ং পাণ্ডবধনৈঃ সর্বান্সংপূজ্য পার্থিবান্
যদি তান্যোধয়িষ্যামঃ কিং বা নঃ পরিহাস্যতি
66.10
অহীনাশীবিষান্ক্রুদ্ধান্দংশায় সমুপস্থিতান্
কৃত্বা কণ্ঠে চ পৃষ্ঠে চ কঃ সমুত্স্রষ্টুমর্হতি
66.11
আত্তশস্ত্রা রথগতাঃ কুপিতাস্তাত পাণ্ডবাঃ
নিঃশেষং নঃ করিষ্যন্তি ক্রুদ্ধা হ্যাশীবিষা যথা
66.12
সংনদ্ধো হ্যর্জুনো যাতি বিবৃত্য পরমেষুধী
গাণ্ডীবং মুহুরাদত্তে নিঃশ্বসংশ্চ নিরীক্ষতে
66.13
গদাং গুর্বীং সমুদ্যম্য ত্বরিতশ্চ বৃকোদরঃ
স্বরথং যোজয়িত্বাশু নির্যাত ইতি নঃ শ্রুতম্
66.14
নকুলঃ খড্গমাদায় চর্ম চাপ্যষ্টচন্দ্রকম্
সহদেবশ্চ রাজা চ চক্রুরাকারমিঙ্গিতৈঃ
66.15
তে ত্বাস্থায় রথান্সর্বে বহুশস্ত্রপরিচ্ছদান্
অভিঘ্নন্তো রথব্রাতান্সেনায়োগায় নির্যয়ুঃ
66.16
ন ক্ষংস্যন্তে তথাস্মাভির্জাতু বিপ্রকৃতা হি তে
দ্রৌপদ্যাশ্চ পরিক্লেশং কস্তেষাং ক্ষন্তুমর্হতি
66.17
পুনর্দীব্যাম ভদ্রং তে বনবাসায় পাণ্ডবৈঃ
এবমেতান্বশে কর্তুং শক্ষ্যামো ভরতর্ষভ
66.18
তে বা দ্বাদশ বর্ষাণি বয়ং বা দ্যূতনির্জিতাঃ
প্রবিশেম মহারণ্যমজিনৈঃ প্রতিবাসিতাঃ
66.19
ত্রয়োদশং চ সজনে অজ্ঞাতাঃ পরিবত্সরম্
জ্ঞাতাশ্চ পুনরন্যানি বনে বর্ষাণি দ্বাদশ
66.20
নিবসেম বয়ং তে বা তথা দ্যূতং প্রবর্ততাম্
অক্ষানুপ্ত্বা পুনর্দ্যূতমিদং দীব্যন্তু পাণ্ডবাঃ
66.21
এতত্কৃত্যতমং রাজন্নস্মাকং ভরতর্ষভ
অয়ং হি শকুনির্বেদ সবিদ্যামক্ষসংপদম্
66.22
দৃঢমূলা বয়ং রাজ্যে মিত্রাণি পরিগৃহ্য চ
সারবদ্বিপুলং সৈন্যং সত্কৃত্য চ দুরাসদম্
66.23
তে চ ত্রয়োদশে বর্ষে পারয়িষ্যন্তি চেদ্ব্রতম্
জেষ্যামস্তান্বয়ং রাজন্রোচতাং তে পরংতপ
66.24
ধৃতরাষ্ট্র উবাচ
তূর্ণং প্রত্যানয়স্বৈতান্কামং ব্যধ্বগতানপি
আগচ্ছন্তু পুনর্দ্যূতমিদং কুর্বন্তু পাণ্ডবাঃ
66.25
বৈশংপায়ন উবাচ
ততো দ্রোণঃ সোমদত্তো বাহ্লীকশ্চ মহারথঃ
বিদুরো দ্রোণপুত্রশ্চ বৈশ্যাপুত্রশ্চ বীর্যবান্
66.26
ভূরিশ্রবাঃ শাংতনবো বিকর্ণশ্চ মহারথঃ
মা দ্যূতমিত্যভাষন্ত শমোঽস্ত্বিতি চ সর্বশঃ
66.27
অকামানাং চ সর্বেষাং সুহৃদামর্থদর্শিনাম্
অকরোত্পাণ্ডবাহ্বানং ধৃতরাষ্ট্রঃ সুতপ্রিয়ঃ
66.28
অথাব্রবীন্মহারাজ ধৃতরাষ্ট্রং জনেশ্বরম্
পুত্রহার্দাদ্ধর্ময়ুক্তং গান্ধারী শোককর্শিতা
66.29
জাতে দুর্যোধনে ক্ষত্তা মহামতিরভাষত
নীয়তাং পরলোকায় সাধ্বয়ং কুলপাংসনঃ
66.30
ব্যনদজ্জাতমাত্রো হি গোমায়ুরিব ভারত
অন্তো নূনং কুলস্যাস্য কুরবস্তন্নিবোধত
66.31
মা বালানামশিষ্টানামভিমংস্থা মতিং প্রভো
মা কুলস্য ক্ষয়ে ঘোরে কারণং ত্বং ভবিষ্যসি
66.32
বদ্ধং সেতুং কো নু ভিন্দ্যাদ্ধমেচ্ছান্তং চ পাবকম্
শমে ধৃতান্পুনঃ পার্থান্কোপয়েত্কো নু ভারত
66.33
স্মরন্তং ত্বামাজমীঢ স্মারয়িষ্যাম্যহং পুনঃ
শাস্ত্রং ন শাস্তি দুর্বুদ্ধিং শ্রেয়সে বেতরায় বা
66.34
ন বৈ বৃদ্ধো বালমতির্ভবেদ্রাজন্কথংচন
ত্বন্নেত্রাঃ সন্তু তে পুত্রা মা ত্বাং দীর্ণাঃ প্রহাসিষুঃ
66.35
শমেন ধর্মেণ পরস্য বুদ্ধ্যা; জাতা বুদ্ধিঃ সাস্তু তে মা প্রতীপা
প্রধ্বংসিনী ক্রূরসমাহিতা শ্রী;র্মৃদুপ্রৌঢা গচ্ছতি পুত্রপৌত্রান্
66.36
অথাব্রবীন্মহারাজো গান্ধারীং ধর্মদর্শিনীম্
অন্তঃ কামং কুলস্যাস্তু ন শক্ষ্যামি নিবারিতুম্
66.37
যথেচ্ছন্তি তথৈবাস্তু প্রত্যাগচ্ছন্তু পাণ্ডবাঃ
পুনর্দ্যূতং প্রকুর্বন্তু মামকাঃ পাণ্ডবৈঃ সহ