অধ্যায় 65

65.1

যুধিষ্ঠির উবাচ
রাজন্কিং করবামস্তে প্রশাধ্যস্মাংস্ত্বমীশ্বরঃ
নিত্যং হি স্থাতুমিচ্ছামস্তব ভারত শাসনে

ধৃতরাষ্ট্র উবাচ
অজাতশত্রো ভদ্রং তে অরিষ্টং স্বস্তি গচ্ছত
অনুজ্ঞাতাঃ সহধনাঃ স্বরাজ্যমনুশাসত

ইদং ত্বেবাববোদ্ধব্যং বৃদ্ধস্য মম শাসনম্
ধিয়া নিগদিতং কৃত্স্নং পথ্যং নিঃশ্রেয়সং পরম্

বেত্থ ত্বং তাত ধর্মাণাং গতিং সূক্ষ্মাং যুধিষ্ঠির
বিনীতোঽসি মহাপ্রাজ্ঞ বৃদ্ধানাং পর্যুপাসিতা

যতো বুদ্ধিস্ততঃ শান্তিঃ প্রশমং গচ্ছ ভারত
নাদারৌ ক্রমতে শস্ত্রং দারৌ শস্ত্রং নিপাত্যতে

ন বৈরাণ্যভিজানন্তি গুণান্পশ্যন্তি নাগুণান্
বিরোধং নাধিগচ্ছন্তি যে ত উত্তমপূরুষাঃ

সংবাদে পরুষাণ্যাহুর্যুধিষ্ঠির নরাধমাঃ
প্রত্যাহুর্মধ্যমাস্ত্বেতানুক্তাঃ পরুষমুত্তরম্

নৈবোক্তা নৈব চানুক্তা অহিতাঃ পরুষা গিরঃ
প্রতিজল্পন্তি বৈ ধীরাঃ সদা উত্তমপূরুষাঃ

স্মরন্তি সুকৃতান্যেব ন বৈরাণি কৃতান্যপি
সন্তঃ প্রতিবিজানন্তো লব্ধ্বা প্রত্যয়মাত্মনঃ

তথাচরিতমার্যেণ ত্বয়াস্মিন্সত্সমাগমে
দুর্যোধনস্য পারুষ্যং তত্তাত হৃদি মা কৃথাঃ

মাতরং চৈব গান্ধারীং মাং চ ত্বদ্গুণকাঙ্ক্ষিণম্
উপস্থিতং বৃদ্ধমন্ধং পিতরং পশ্য ভারত

প্রেক্ষাপূর্বং ময়া দ্যূতমিদমাসীদুপেক্ষিতম্
মিত্রাণি দ্রষ্টুকামেন পুত্রাণাং চ বলাবলম্

অশোচ্যাঃ কুরবো রাজন্যেষাং ত্বমনুশাসিতা
মন্ত্রী চ বিদুরো ধীমান্সর্বশাস্ত্রবিশারদঃ

ত্বয়ি ধর্মোঽর্জুনে বীর্যং ভীমসেনে পরাক্রমঃ
শ্রদ্ধা চ গুরুশুশ্রূষা যময়োঃ পুরুষাগ্র্যয়োঃ

অজাতশত্রো ভদ্রং তে খাণ্ডবপ্রস্থমাবিশ
ভ্রাতৃভিস্তেঽস্তু সৌভ্রাত্রং ধর্মে তে ধীয়তাং মনঃ

বৈশংপায়ন উবাচ
ইত্যুক্তো ভরতশ্রেষ্ঠো ধর্মরাজো যুধিষ্ঠিরঃ
কৃত্বার্যসময়ং সর্বং প্রতস্থে ভ্রাতৃভিঃ সহ

তে রথান্মেঘসংকাশানাস্থায় সহ কৃষ্ণয়া
প্রয়য়ুর্হৃষ্টমনস ইন্দ্রপ্রস্থং পুরোত্তমম্