UtshovChapter 65
65.1
युधिष्ठिर उवाच
राजन्किं करवामस्ते प्रशाध्यस्मांस्त्वमीश्वरः
नित्यं हि स्थातुमिच्छामस्तव भारत शासने
Yudhishthira uvacha
Rajankim karavamaste prashadhyasmanstvamishvarah
Nityam hi sthatumichchhamastava bharata shasane
65.2
धृतराष्ट्र उवाच
अजातशत्रो भद्रं ते अरिष्टं स्वस्ति गच्छत
अनुज्ञाताः सहधनाः स्वराज्यमनुशासत
Dhritarashtra uvacha
Ajatashatro bhadram te arishtam svasti gachchhata
Anugyatah sahadhanah svarajyamanushasata
65.3
इदं त्वेवावबोद्धव्यं वृद्धस्य मम शासनम्
धिया निगदितं कृत्स्नं पथ्यं निःश्रेयसं परम्
Idam tvevavaboddhavyam vriddhasya mama shasanam
Dhiya nigaditam kritsnam pathyam nihshreyasam param
65.4
वेत्थ त्वं तात धर्माणां गतिं सूक्ष्मां युधिष्ठिर
विनीतोऽसि महाप्राज्ञ वृद्धानां पर्युपासिता
Vettha tvam tata dharmanam gatim sukshmam yudhishthira
Vinitosi mahapragya vriddhanam paryupasita
65.5
यतो बुद्धिस्ततः शान्तिः प्रशमं गच्छ भारत
नादारौ क्रमते शस्त्रं दारौ शस्त्रं निपात्यते
Yato buddhistatah shantih prashamam gachchha bharata
Nadarau kramate shastram darau shastram nipatyate
65.6
न वैराण्यभिजानन्ति गुणान्पश्यन्ति नागुणान्
विरोधं नाधिगच्छन्ति ये त उत्तमपूरुषाः
Na vairanyabhijananti gunanpashyanti nagunan
Virodham nadhigachchhanti ye ta uttamapurushah
65.7
संवादे परुषाण्याहुर्युधिष्ठिर नराधमाः
प्रत्याहुर्मध्यमास्त्वेतानुक्ताः परुषमुत्तरम्
Sanvade parushanyahuryudhishthira naradhamah
Pratyahurmadhyamastvetanuktah parushamuttaram
65.8
नैवोक्ता नैव चानुक्ता अहिताः परुषा गिरः
प्रतिजल्पन्ति वै धीराः सदा उत्तमपूरुषाः
Naivokta naiva chanukta ahitah parusha girah
Pratijalpanti vai dhirah sada uttamapurushah
65.9
स्मरन्ति सुकृतान्येव न वैराणि कृतान्यपि
सन्तः प्रतिविजानन्तो लब्ध्वा प्रत्ययमात्मनः
Smaranti sukritanyeva na vairani kritanyapi
Santah prativijananto labdhva pratyayamatmanah
65.10
तथाचरितमार्येण त्वयास्मिन्सत्समागमे
दुर्योधनस्य पारुष्यं तत्तात हृदि मा कृथाः
Tathacharitamaryena tvayasminsatsamagame
Duryodhanasya parushyam tattata hridi ma krithah
65.11
मातरं चैव गान्धारीं मां च त्वद्गुणकाङ्क्षिणम्
उपस्थितं वृद्धमन्धं पितरं पश्य भारत
Mataram chaiva gandharim mam cha tvadgunakankshinam
Upasthitam vriddhamandham pitaram pashya bharata
65.12
प्रेक्षापूर्वं मया द्यूतमिदमासीदुपेक्षितम्
मित्राणि द्रष्टुकामेन पुत्राणां च बलाबलम्
Prekshapurvam maya dyutamidamasidupekshitam
Mitrani drashtukamena putranam cha balabalam
65.13
अशोच्याः कुरवो राजन्येषां त्वमनुशासिता
मन्त्री च विदुरो धीमान्सर्वशास्त्रविशारदः
Ashochyah kuravo rajanyesham tvamanushasita
Mantri cha viduro dhimansarvashastravisharadah
65.14
त्वयि धर्मोऽर्जुने वीर्यं भीमसेने पराक्रमः
श्रद्धा च गुरुशुश्रूषा यमयोः पुरुषाग्र्ययोः
Tvayi dharmorjune viryam bhimasene parakramah
Shraddha cha gurushushrusha yamayoh purushagryayoh
65.15
अजातशत्रो भद्रं ते खाण्डवप्रस्थमाविश
भ्रातृभिस्तेऽस्तु सौभ्रात्रं धर्मे ते धीयतां मनः
Ajatashatro bhadram te khandavaprasthamavisha
Bhratribhistestu saubhratram dharme te dhiyatam manah
65.16
वैशंपायन उवाच
इत्युक्तो भरतश्रेष्ठो धर्मराजो युधिष्ठिरः
कृत्वार्यसमयं सर्वं प्रतस्थे भ्रातृभिः सह
Vaishampayana uvacha
Ityukto bharatashreshtho dharmarajo yudhishthirah
Kritvaryasamayam sarvam pratasthe bhratribhih saha
65.17
ते रथान्मेघसंकाशानास्थाय सह कृष्णया
प्रययुर्हृष्टमनस इन्द्रप्रस्थं पुरोत्तमम्
Te rathanmeghasankashanasthaya saha krishnaya
Prayayurhrishtamanasa indraprastham purottamam