অধ্যায় 64

64.1

কর্ণ উবাচ
যা নঃ শ্রুতা মনুষ্যেষু স্ত্রিয়ো রূপেণ সংমতাঃ
তাসামেতাদৃশং কর্ম ন কস্যাংচন শুশ্রুমঃ

ক্রোধাবিষ্টেষু পার্থেষু ধার্তরাষ্ট্রেষু চাপ্যতি
দ্রৌপদী পাণ্ডুপুত্রাণাং কৃষ্ণা শান্তিরিহাভবৎ

অপ্লবেঽম্ভসি মগ্নানামপ্রতিষ্ঠে নিমজ্জতাম্
পাঞ্চালী পাণ্ডুপুত্রাণাং নৌরেষা পারগাভবৎ

বৈশংপায়ন উবাচ
তদ্বৈ শ্রুত্বা ভীমসেনঃ কুরুমধ্যেঽত্যমর্ষণঃ
স্ত্রী গতিঃ পাণ্ডুপুত্রাণামিত্যুবাচ সুদুর্মনাঃ

ত্রীণি জ্যোতীংষি পুরুষ ইতি বৈ দেবলোঽব্রবীৎ
অপত্যং কর্ম বিদ্যা চ যতঃ সৃষ্টাঃ প্রজাস্ততঃ

অমেধ্যে বৈ গতপ্রাণে শূন্যে জ্ঞাতিভিরুজ্ঝিতে
দেহে ত্রিতয়মেবৈতত্পুরুষস্যোপজায়তে

তন্নো জ্যোতিরভিহতং দারাণামভিমর্শনাৎ
ধনংজয় কথং স্বিত্স্যাদপত্যমভিমৃষ্টজম্

অর্জুন উবাচ
ন চৈবোক্তা ন চানুক্তা হীনতঃ পরুষা গিরঃ
ভারতাঃ প্রতিজল্পন্তি সদা তূত্তমপূরুষাঃ

স্মরন্তি সুকৃতান্যেব ন বৈরাণি কৃতানি চ
সন্তঃ প্রতিবিজানন্তো লব্ধ্বা প্রত্যয়মাত্মনঃ

ভীম উবাচ
ইহৈবৈতাংস্তুরা সর্বান্হন্মি শত্রূন্সমাগতান্
অথ নিষ্ক্রম্য রাজেন্দ্র সমূলান্কৃন্ধি ভারত

কিং নো বিবদিতেনেহ কিং নঃ ক্লেশেন ভারত
অদ্যৈবৈতান্নিহন্মীহ প্রশাধি বসুধামিমাম্

বৈশংপায়ন উবাচ
ইত্যুক্ত্বা ভীমসেনস্তু কনিষ্ঠৈর্ভ্রাতৃভির্বৃতঃ
মৃগমধ্যে যথা সিংহো মুহুঃ পরিঘমৈক্ষত

সান্ত্ব্যমানো বীজ্যমানঃ পার্থেনাক্লিষ্টকর্মণা
স্বিদ্যতে চ মহাবাহুরন্তর্দাহেন বীর্যবান্

ক্রুদ্ধস্য তস্য স্রোতোভ্যঃ কর্ণাদিভ্যো নরাধিপ
সধূমঃ সস্ফুলিঙ্গার্চিঃ পাবকঃ সমজায়ত

ভ্রুকুটীপুটদুষ্প্রেক্ষ্যমভবত্তস্য তন্মুখম্
যুগান্তকালে সংপ্রাপ্তে কৃতান্তস্যেব রূপিণঃ

যুধিষ্ঠিরস্তমাবার্য বাহুনা বাহুশালিনম্
মৈবমিত্যব্রবীচ্চৈনং জোষমাস্স্বেতি ভারত

নিবার্য তং মহাবাহুং কোপসংরক্তলোচনম্
পিতরং সমুপাতিষ্ঠদ্ধৃতরাষ্ট্রং কৃতাঞ্জলিঃ