Utshovঅধ্যায় 63
63.1
কর্ণ উবাচ
ত্রয়ঃ কিলেমে অধনা ভবন্তি; দাসঃ শিষ্যশ্চাস্বতন্ত্রা চ নারী
দাসস্য পত্নী ত্বং ধনমস্য ভদ্রে; হীনেশ্বরা দাসধনং চ দাসী
63.2
প্রবিশ্য সা নঃ পরিচারৈর্ভজস্ব; তত্তে কার্যং শিষ্টমাবেশ্য বেশ্ম
ঈশাঃ স্ম সর্বে তব রাজপুত্রি; ভবন্তি তে ধার্তরাষ্ট্রা ন পার্থাঃ
63.3
অন্যং বৃণীষ্ব পতিমাশু ভামিনি; যস্মাদ্দাস্যং ন লভসে দেবনেন
অনবদ্যা বৈ পতিষু কামবৃত্তি;র্নিত্যং দাস্যে বিদিতং বৈ তবাস্তু
63.4
পরাজিতো নকুলো ভীমসেনো; যুধিষ্ঠিরঃ সহদেবোঽর্জুনশ্চ
দাসীভূতা প্রবিশ যাজ্ঞসেনি; পরাজিতাস্তে পতয়ো ন সন্তি
63.5
প্রয়োজনং চাত্মনি কিং নু মন্যতে; পরাক্রমং পৌরুষং চেহ পার্থঃ
পাঞ্চাল্যস্য দ্রুপদস্যাত্মজামিমাং; সভামধ্যে যোঽতিদেবীদ্গ্লহেষু
63.6
বৈশংপায়ন উবাচ
তদ্বৈ শ্রুত্বা ভীমসেনোঽত্যমর্ষী; ভৃশং নিশশ্বাস তদার্তরূপঃ
রাজানুগো ধর্মপাশানুবদ্ধো; দহন্নিবৈনং কোপবিরক্তদৃষ্টিঃ
63.7
ভীম উবাচ
নাহং কুপ্যে সূতপুত্রস্য রাজ;ন্নেষ সত্যং দাসধর্মঃ প্রবিষ্টঃ
কিং বিদ্বিষো বাদ্য মাং ধারয়েয়ু;র্নাদেবীস্ত্বং যদ্যনয়া নরেন্দ্র
63.8
বৈশংপায়ন উবাচ
রাধেয়স্য বচঃ শ্রুত্বা রাজা দুর্যোধনস্তদা
যুধিষ্ঠিরমুবাচেদং তূষ্ণীংভূতমচেতসম্
63.9
ভীমার্জুনৌ যমৌ চৈব স্থিতৌ তে নৃপ শাসনে
প্রশ্নং প্রব্রূহি কৃষ্ণাং ত্বমজিতাং যদি মন্যসে
63.10
এবমুক্ত্বা স কৌন্তেয়মপোহ্য বসনং স্বকম্
স্ময়ন্নিবৈক্ষত্পাঞ্চালীমৈশ্বর্যমদমোহিতঃ
63.11
কদলীদণ্ডসদৃশং সর্বলক্ষণপূজিতম্
গজহস্তপ্রতীকাশং বজ্রপ্রতিমগৌরবম্
63.12
অভ্যুত্স্ময়িত্বা রাধেয়ং ভীমমাধর্ষয়ন্নিব
দ্রৌপদ্যাঃ প্রেক্ষমাণায়াঃ সব্যমূরুমদর্শয়ৎ
63.13
বৃকোদরস্তদালোক্য নেত্রে উত্ফাল্য লোহিতে
প্রোবাচ রাজমধ্যে তং সভাং বিশ্রাবয়ন্নিব
63.14
পিতৃভিঃ সহ সালোক্যং মা স্ম গচ্ছেদ্বৃকোদরঃ
যদ্যেতমূরুং গদয়া ন ভিন্দ্যাং তে মহাহবে
63.15
ক্রুদ্ধস্য তস্য স্রোতোভ্যঃ সর্বেভ্যঃ পাবকার্চিষঃ
বৃক্ষস্যেব বিনিশ্চেরুঃ কোটরেভ্যঃ প্রদহ্যতঃ
63.16
বিদুর উবাচ
পরং ভয়ং পশ্যত ভীমসেনা;দ্বুধ্যধ্বং রাজ্ঞো বরুণস্যেব পাশাৎ
দৈবেরিতো নূনময়ং পুরস্তা;ত্পরোঽনয়ো ভরতেষূদপাদি
63.17
অতিদ্যূতং কৃতমিদং ধার্তরাষ্ট্রা; যেঽস্যাং স্ত্রিয়ং বিবদধ্বং সভায়াম্
যোগক্ষেমো দৃশ্যতে বো মহাভয়ঃ; পাপান্মন্ত্রান্কুরবো মন্ত্রয়ন্তি
63.18
ইমং ধর্মং কুরবো জানতাশু; দুর্দৃষ্টেঽস্মিন্পরিষত্সংপ্রদুষ্যেৎ
ইমাং চেত্পূর্বং কিতবোঽগ্লহীষ্য;দীশোঽভবিষ্যদপরাজিতাত্মা
63.19
স্বপ্নে যথৈতদ্ধি ধনং জিতং স্যা;ত্তদেবং মন্যে যস্য দীব্যত্যনীশঃ
গান্ধারিপুত্রস্য বচো নিশম্য; ধর্মাদস্মাত্কুরবো মাপয়াত
63.20
দুর্যোধন উবাচ
ভীমস্য বাক্যে তদ্বদেবার্জুনস্য; স্থিতোঽহং বৈ যময়োশ্চৈবমেব
যুধিষ্ঠিরং চেত্প্রবদন্ত্যনীশ;মথো দাস্যান্মোক্ষ্যসে যাজ্ঞসেনি
63.21
অর্জুন উবাচ
ঈশো রাজা পূর্বমাসীদ্গ্লহে নঃ; কুন্তীপুত্রো ধর্মরাজো মহাত্মা
ঈশস্ত্বয়ং কস্য পরাজিতাত্মা; তজ্জানীধ্বং কুরবঃ সর্ব এব
63.22
বৈশংপায়ন উবাচ
ততো রাজ্ঞো ধৃতরাষ্ট্রস্য গেহে; গোমায়ুরুচ্চৈর্ব্যাহরদগ্নিহোত্রে
তং রাসভাঃ প্রত্যভাষন্ত রাজ;ন্সমন্ততঃ পক্ষিণশ্চৈব রৌদ্রাঃ
63.23
তং চ শব্দং বিদুরস্তত্ত্ববেদী; শুশ্রাব ঘোরং সুবলাত্মজা চ
ভীষ্মদ্রোণৌ গৌতমশ্চাপি বিদ্বা;ন্স্বস্তি স্বস্তীত্যপি চৈবাহুরুচ্চৈঃ
63.24
ততো গান্ধারী বিদুরশ্চৈব বিদ্বাং;স্তমুত্পাতং ঘোরমালক্ষ্য রাজ্ঞে
নিবেদয়ামাসতুরার্তবত্তদা; ততো রাজা বাক্যমিদং বভাষে
63.25
হতোঽসি দুর্যোধন মন্দবুদ্ধে; যস্ত্বং সভায়াং কুরুপুংগবানাম্
স্ত্রিয়ং সমাভাষসি দুর্বিনীত; বিশেষতো দ্রৌপদীং ধর্মপত্নীম্
63.26
এবমুক্ত্বা ধৃতরাষ্ট্রো মনীষী; হিতান্বেষী বান্ধবানামপায়াৎ
কৃষ্ণাং পাঞ্চালীমব্রবীত্সান্ত্বপূর্বং; বিমৃশ্যৈতত্প্রজ্ঞয়া তত্ত্ববুদ্ধিঃ
63.27
ধৃতরাষ্ট্র উবাচ
বরং বৃণীষ্ব পাঞ্চালি মত্তো যদভিকাঙ্ক্ষসি
বধূনাং হি বিশিষ্টা মে ত্বং ধর্মপরমা সতী
63.28
দ্রৌপদ্যুবাচ
দদাসি চেদ্বরং মহ্যং বৃণোমি ভরতর্ষভ
সর্বধর্মানুগঃ শ্রীমানদাসোঽস্তু যুধিষ্ঠিরঃ
63.29
মনস্বিনমজানন্তো মা বৈ ব্রূয়ুঃ কুমারকাঃ
এষ বৈ দাসপুত্রেতি প্রতিবিন্ধ্যং তমাগতম্
63.30
রাজপুত্রঃ পুরা ভূত্বা যথা নান্যঃ পুমান্ক্বচিৎ
লালিতো দাসপুত্রত্বং পশ্যন্নশ্যেদ্ধি ভারত
63.31
ধৃতরাষ্ট্র উবাচ
দ্বিতীয়ং তে বরং ভদ্রে দদামি বরয়স্ব মাম্
মনো হি মে বিতরতি নৈকং ত্বং বরমর্হসি
63.32
দ্রৌপদ্যুবাচ
সরথৌ সধনুষ্কৌ চ ভীমসেনধনংজয়ৌ
নকুলং সহদেবং চ দ্বিতীয়ং বরয়ে বরম্
63.33
ধৃতরাষ্ট্র উবাচ
তৃতীয়ং বরয়াস্মত্তো নাসি দ্বাভ্যাং সুসত্কৃতা
ত্বং হি সর্বস্নুষাণাং মে শ্রেয়সী ধর্মচারিণী
63.34
দ্রৌপদ্যুবাচ
লোভো ধর্মস্য নাশায় ভগবন্নাহমুত্সহে
অনর্হা বরমাদাতুং তৃতীয়ং রাজসত্তম
63.35
একমাহুর্বৈশ্যবরং দ্বৌ তু ক্ষত্রস্ত্রিয়া বরৌ
ত্রয়স্তু রাজ্ঞো রাজেন্দ্র ব্রাহ্মণস্য শতং বরাঃ
63.36
পাপীয়াংস ইমে ভূত্বা সংতীর্ণাঃ পতয়ো মম
বেত্স্যন্তি চৈব ভদ্রাণি রাজন্পুণ্যেন কর্মণা