Utshovঅধ্যায় 62
62.1
দ্রৌপদ্যুবাচ
পুরস্তাত্করণীয়ং মে ন কৃতং কার্যমুত্তরম্
বিহ্বলাস্মি কৃতানেন কর্ষতা বলিনা বলাৎ
62.2
অভিবাদং করোম্যেষাং গুরূণাং কুরুসংসদি
ন মে স্যাদপরাধোঽয়ং যদিদং ন কৃতং ময়া
62.3
বৈশংপায়ন উবাচ
সা তেন চ সমুদ্ধূতা দুঃখেন চ তপস্বিনী
পতিতা বিললাপেদং সভায়ামতথোচিতা
62.4
দ্রৌপদ্যুবাচ
স্বয়ংবরে যাস্মি নৃপৈর্দৃষ্টা রঙ্গে সমাগতৈঃ
ন দৃষ্টপূর্বা চান্যত্র সাহমদ্য সভাং গতা
62.5
যাং ন বায়ুর্ন চাদিত্যো দৃষ্টবন্তৌ পুরা গৃহে
সাহমদ্য সভামধ্যে দৃশ্যামি কুরুসংসদি
62.6
যাং ন মৃষ্যন্তি বাতেন স্পৃশ্যমানাং পুরা গৃহে
স্পৃশ্যমানাং সহন্তেঽদ্য পাণ্ডবাস্তাং দুরাত্মনা
62.7
মৃষ্যন্তে কুরবশ্চেমে মন্যে কালস্য পর্যয়ম্
স্নুষাং দুহিতরং চৈব ক্লিশ্যমানামনর্হতীম্
62.8
কিং ত্বতঃ কৃপণং ভূয়ো যদহং স্ত্রী সতী শুভা
সভামধ্যং বিগাহেঽদ্য ক্ব নু ধর্মো মহীক্ষিতাম্
62.9
ধর্ম্যাঃ স্ত্রিয়ঃ সভাং পূর্বং ন নয়ন্তীতি নঃ শ্রুতম্
স নষ্টঃ কৌরবেয়েষু পূর্বো ধর্মঃ সনাতনঃ
62.10
কথং হি ভার্যা পাণ্ডূনাং পার্ষতস্য স্বসা সতী
বাসুদেবস্য চ সখী পার্থিবানাং সভামিয়াম্
62.11
তামিমাং ধর্মরাজস্য ভার্যাং সদৃশবর্ণজাম্
ব্রূত দাসীমদাসীং বা তত্করিষ্যামি কৌরবাঃ
62.12
অয়ং হি মাং দৃঢং ক্ষুদ্রঃ কৌরবাণাং যশোহরঃ
ক্লিশ্নাতি নাহং তত্সোঢুং চিরং শক্ষ্যামি কৌরবাঃ
62.13
জিতাং বাপ্যজিতাং বাপি মন্যধ্বং বা যথা নৃপাঃ
তথা প্রত্যুক্তমিচ্ছামি তত্করিষ্যামি কৌরবাঃ
62.14
ভীষ্ম উবাচ
উক্তবানস্মি কল্যাণি ধর্মস্য তু পরাং গতিম্
লোকে ন শক্যতে গন্তুমপি বিপ্রৈর্মহাত্মভিঃ
62.15
বলবাংস্তু যথা ধর্মং লোকে পশ্যতি পূরুষঃ
স ধর্মো ধর্মবেলায়াং ভবত্যভিহিতঃ পরৈঃ
62.16
ন বিবেক্তুং চ তে প্রশ্নমেতং শক্নোমি নিশ্চয়াৎ
সূক্ষ্মত্বাদ্গহনত্বাচ্চ কার্যস্যাস্য চ গৌরবাৎ
62.17
নূনমন্তঃ কুলস্যাস্য ভবিতা নচিরাদিব
তথা হি কুরবঃ সর্বে লোভমোহপরায়ণাঃ
62.18
কুলেষু জাতাঃ কল্যাণি ব্যসনাভ্যাহতা ভৃশম্
ধর্ম্যান্মার্গান্ন চ্যবন্তে যথা নস্ত্বং বধূঃ স্থিতা
62.19
উপপন্নং চ পাঞ্চালি তবেদং বৃত্তমীদৃশম্
যত্কৃচ্ছ্রমপি সংপ্রাপ্তা ধর্মমেবান্ববেক্ষসে
62.20
এতে দ্রোণাদয়শ্চৈব বৃদ্ধা ধর্মবিদো জনাঃ
শূন্যৈঃ শরীরৈস্তিষ্ঠন্তি গতাসব ইবানতাঃ
62.21
যুধিষ্ঠিরস্তু প্রশ্নেঽস্মিন্প্রমাণমিতি মে মতিঃ
অজিতাং বা জিতাং বাপি স্বয়ং ব্যাহর্তুমর্হতি
62.22
বৈশংপায়ন উবাচ
তথা তু দৃষ্ট্বা বহু তত্তদেবং; রোরূয়মাণাং কুররীমিবার্তাম্
নোচুর্বচঃ সাধ্বথ বাপ্যসাধু; মহীক্ষিতো ধার্তরাষ্ট্রস্য ভীতাঃ
62.23
দৃষ্ট্বা তু তান্পার্থিবপুত্রপৌত্রাং;স্তূষ্ণীংভূতান্ধৃতরাষ্ট্রস্য পুত্রঃ
স্ময়ন্নিবেদং বচনং বভাষে; পাঞ্চালরাজস্য সুতাং তদানীম্
62.24
তিষ্ঠত্বয়ং প্রশ্ন উদারসত্ত্বে; ভীমেঽর্জুনে সহদেবে তথৈব
পত্যৌ চ তে নকুলে যাজ্ঞসেনি; বদন্ত্বেতে বচনং ত্বত্প্রসূতম্
62.25
অনীশ্বরং বিব্রুবন্ত্বার্যমধ্যে; যুধিষ্ঠিরং তব পাঞ্চালি হেতোঃ
কুর্বন্তু সর্বে চানৃতং ধর্মরাজং; পাঞ্চালি ত্বং মোক্ষ্যসে দাসভাবাৎ
62.26
ধর্মে স্থিতো ধর্মরাজো মহাত্মা; স্বয়ং চেদং কথয়ত্বিন্দ্রকল্পঃ
ঈশো বা তে যদ্যনীশোঽথ বৈষ; বাক্যাদস্য ক্ষিপ্রমেকং ভজস্ব
62.27
সর্বে হীমে কৌরবেয়াঃ সভায়াং; দুঃখান্তরে বর্তমানাস্তবৈব
ন বিব্রুবন্ত্যার্যসত্ত্বা যথাব;ত্পতীংশ্চ তে সমবেক্ষ্যাল্পভাগ্যান্
62.28
ততঃ সভ্যাঃ কুরুরাজস্য তত্র; বাক্যং সর্বে প্রশশংসুস্তদোচ্চৈঃ
চেলাবেধাংশ্চাপি চক্রুর্নদন্তো; হা হেত্যাসীদপি চৈবাত্র নাদঃ
সর্বে চাসন্পার্থিবাঃ প্রীতিমন্তঃ; কুরুশ্রেষ্ঠং ধার্মিকং পূজয়ন্তঃ
62.29
যুধিষ্ঠিরং চ তে সর্বে সমুদৈক্ষন্ত পার্থিবাঃ
কিং নু বক্ষ্যতি ধর্মজ্ঞ ইতি সাচীকৃতাননাঃ
62.30
কিং নু বক্ষ্যতি বীভত্সুরজিতো যুধি পাণ্ডবঃ
ভীমসেনো যমৌ চেতি ভৃশং কৌতূহলান্বিতাঃ
62.31
তস্মিন্নুপরতে শব্দে ভীমসেনোঽব্রবীদিদম্
প্রগৃহ্য বিপুলং বৃত্তং ভুজং চন্দনরূষিতম্
62.32
যদ্যেষ গুরুরস্মাকং ধর্মরাজো যুধিষ্ঠিরঃ
ন প্রভুঃ স্যাত্কুলস্যাস্য ন বয়ং মর্ষয়েমহি
62.33
ঈশো নঃ পুণ্যতপসাং প্রাণানামপি চেশ্বরঃ
মন্যতে জিতমাত্মানং যদ্যেষ বিজিতা বয়ম্
62.34
ন হি মুচ্যেত জীবন্মে পদা ভূমিমুপস্পৃশন্
মর্ত্যধর্মা পরামৃশ্য পাঞ্চাল্যা মূর্ধজানিমান্
62.35
পশ্যধ্বমায়তৌ বৃত্তৌ ভুজৌ মে পরিঘাবিব
নৈতয়োরন্তরং প্রাপ্য মুচ্যেতাপি শতক্রতুঃ
62.36
ধর্মপাশসিতস্ত্বেবং নাধিগচ্ছামি সংকটম্
গৌরবেণ নিরুদ্ধশ্চ নিগ্রহাদর্জুনস্য চ
62.37
ধর্মরাজনিসৃষ্টস্তু সিংহঃ ক্ষুদ্রমৃগানিব
ধার্তরাষ্ট্রানিমান্পাপান্নিষ্পিষেয়ং তলাসিভিঃ
62.38
তমুবাচ তদা ভীষ্মো দ্রোণো বিদুর এব চ
ক্ষম্যতামেবমিত্যেবং সর্বং সংভবতি ত্বয়ি