Utshovঅধ্যায় 61
61.1
ভীম উবাচ
ভবন্তি দেশে বন্ধক্যঃ কিতবানাং যুধিষ্ঠির
ন তাভিরুত দীব্যন্তি দয়া চৈবাস্তি তাস্বপি
61.2
কাশ্যো যদ্বলিমাহার্ষীদ্দ্রব্যং যচ্চান্যদুত্তমম্
তথান্যে পৃথিবীপালা যানি রত্নান্যুপাহরন্
61.3
বাহনানি ধনং চৈব কবচান্যায়ুধানি চ
রাজ্যমাত্মা বয়ং চৈব কৈতবেন হৃতং পরৈঃ
61.4
ন চ মে তত্র কোপোঽভূত্সর্বস্যেশো হি নো ভবান্
ইদং ত্বতিকৃতং মন্যে দ্রৌপদী যত্র পণ্যতে
61.5
এষা হ্যনর্হতী বালা পাণ্ডবান্প্রাপ্য কৌরবৈঃ
ত্বত্কৃতে ক্লিশ্যতে ক্ষুদ্রৈর্নৃশংসৈর্নিকৃতিপ্রিয়ৈঃ
61.6
অস্যাঃ কৃতে মন্যুরয়ং ত্বয়ি রাজন্নিপাত্যতে
বাহূ তে সংপ্রধক্ষ্যামি সহদেবাগ্নিমানয়
61.7
অর্জুন উবাচ
ন পুরা ভীমসেন ত্বমীদৃশীর্বদিতা গিরঃ
পরৈস্তে নাশিতং নূনং নৃশংসৈর্ধর্মগৌরবম্
61.8
ন সকামাঃ পরে কার্যা ধর্মমেবাচরোত্তমম্
ভ্রাতরং ধার্মিকং জ্যেষ্ঠং নাতিক্রমিতুমর্হতি
61.9
আহূতো হি পরৈ রাজা ক্ষাত্রধর্মমনুস্মরন্
দীব্যতে পরকামেন তন্নঃ কীর্তিকরং মহৎ
61.10
ভীমসেন উবাচ
এবমস্মিকৃতং বিদ্যাং যদ্যস্যাহং ধনংজয়
দীপ্তেঽগ্নৌ সহিতৌ বাহূ নির্দহেয়ং বলাদিব
61.11
বৈশংপায়ন উবাচ
তথা তান্দুঃখিতান্দৃষ্ট্বা পাণ্ডবান্ধৃতরাষ্ট্রজঃ
ক্লিশ্যমানাং চ পাঞ্চালীং বিকর্ণ ইদমব্রবীৎ
61.12
যাজ্ঞসেন্যা যদুক্তং তদ্বাক্যং বিব্রূত পার্থিবাঃ
অবিবেকেন বাক্যস্য নরকঃ সদ্য এব নঃ
61.13
ভীষ্মশ্চ ধৃতরাষ্ট্রশ্চ কুরুবৃদ্ধতমাবুভৌ
সমেত্য নাহতুঃ কিংচিদ্বিদুরশ্চ মহামতিঃ
61.14
ভারদ্বাজোঽপি সর্বেষামাচার্যঃ কৃপ এব চ
অত এতাবপি প্রশ্নং নাহতুর্দ্বিজসত্তমৌ
61.15
যে ত্বন্যে পৃথিবীপালাঃ সমেতাঃ সর্বতো দিশঃ
কামক্রোধৌ সমুত্সৃজ্য তে ব্রুবন্তু যথামতি
61.16
যদিদং দ্রৌপদী বাক্যমুক্তবত্যসকৃচ্ছুভা
বিমৃশ্য কস্য কঃ পক্ষঃ পার্থিবা বদতোত্তরম্
61.17
এবং স বহুশঃ সর্বানুক্তবাংস্তান্সভাসদঃ
ন চ তে পৃথিবীপালাস্তমূচুঃ সাধ্বসাধু বা
61.18
উক্ত্বা তথাসকৃত্সর্বান্বিকর্ণঃ পৃথিবীপতীন্
পাণিং পাণৌ বিনিষ্পিষ্য নিঃশ্বসন্নিদমব্রবীৎ
61.19
বিব্রূত পৃথিবীপালা বাক্যং মা বা কথংচন
মন্যে ন্যায্যং যদত্রাহং তদ্ধি বক্ষ্যামি কৌরবাঃ
61.20
চত্বার্যাহুর্নরশ্রেষ্ঠা ব্যসনানি মহীক্ষিতাম্
মৃগয়াং পানমক্ষাংশ্চ গ্রাম্যে চৈবাতিসক্ততাম্
61.21
এতেষু হি নরঃ সক্তো ধর্মমুত্সৃজ্য বর্ততে
তথায়ুক্তেন চ কৃতাং ক্রিয়াং লোকো ন মন্যতে
61.22
তদয়ং পাণ্ডুপুত্রেণ ব্যসনে বর্ততা ভৃশম্
সমাহূতেন কিতবৈরাস্থিতো দ্রৌপদীপণঃ
61.23
সাধারণী চ সর্বেষাং পাণ্ডবানামনিন্দিতা
জিতেন পূর্বং চানেন পাণ্ডবেন কৃতঃ পণঃ
61.24
ইয়ং চ কীর্তিতা কৃষ্ণা সৌবলেন পণার্থিনা
এতত্সর্বং বিচার্যাহং মন্যে ন বিজিতামিমাম্
61.25
এতচ্ছ্রুত্বা মহান্নাদঃ সভ্যানামুদতিষ্ঠত
বিকর্ণং শংসমানানাং সৌবলং চ বিনিন্দতাম্
61.26
তস্মিন্নুপরতে শব্দে রাধেয়ঃ ক্রোধমূর্ছিতঃ
প্রগৃহ্য রুচিরং বাহুমিদং বচনমব্রবীৎ
61.27
দৃশ্যন্তে বৈ বিকর্ণে হি বৈকৃতানি বহূন্যপি
তজ্জস্তস্য বিনাশায় যথাগ্নিররণিপ্রজঃ
61.28
এতে ন কিংচিদপ্যাহুশ্চোদ্যমানাপি কৃষ্ণয়া
ধর্মেণ বিজিতাং মন্যে মন্যন্তে দ্রুপদাত্মজাম্
61.29
ত্বং তু কেবলবাল্যেন ধার্তরাষ্ট্র বিদীর্যসে
যদ্ব্রবীষি সভামধ্যে বালঃ স্থবিরভাষিতম্
61.30
ন চ ধর্মং যথাতত্ত্বং বেত্সি দুর্যোধনাবর
যদ্ব্রবীষি জিতাং কৃষ্ণামজিতেতি সুমন্দধীঃ
61.31
কথং হ্যবিজিতাং কৃষ্ণাং মন্যসে ধৃতরাষ্ট্রজ
যদা সভায়াং সর্বস্বং ন্যস্তবান্পাণ্ডবাগ্রজঃ
61.32
অভ্যন্তরা চ সর্বস্বে দ্রৌপদী ভরতর্ষভ
এবং ধর্মজিতাং কৃষ্ণাং মন্যসে ন জিতাং কথম্
61.33
কীর্তিতা দ্রৌপদী বাচা অনুজ্ঞাতা চ পাণ্ডবৈঃ
ভবত্যবিজিতা কেন হেতুনৈষা মতা তব
61.34
মন্যসে বা সভামেতামানীতামেকবাসসম্
অধর্মেণেতি তত্রাপি শৃণু মে বাক্যমুত্তরম্
61.35
একো ভর্তা স্ত্রিয়া দেবৈর্বিহিতঃ কুরুনন্দন
ইয়ং ত্বনেকবশগা বন্ধকীতি বিনিশ্চিতা
61.36
অস্যাঃ সভামানয়নং ন চিত্রমিতি মে মতিঃ
একাম্বরধরত্বং বাপ্যথ বাপি বিবস্ত্রতা
61.37
যচ্চৈষাং দ্রবিণং কিংচিদ্যা চৈষা যে চ পাণ্ডবাঃ
সৌবলেনেহ তত্সর্বং ধর্মেণ বিজিতং বসু
61.38
দুঃশাসন সুবালোঽয়ং বিকর্ণঃ প্রাজ্ঞবাদিকঃ
পাণ্ডবানাং চ বাসাংসি দ্রৌপদ্যাশ্চাপ্যুপাহর
61.39
তচ্ছ্রুত্বা পাণ্ডবাঃ সর্বে স্বানি বাসাংসি ভারত
অবকীর্যোত্তরীয়াণি সভায়াং সমুপাবিশন্
61.40
ততো দুঃশাসনো রাজন্দ্রৌপদ্যা বসনং বলাৎ
সভামধ্যে সমাক্ষিপ্য ব্যপক্রষ্টুং প্রচক্রমে
61.41
আকৃষ্যমাণে বসনে দ্রৌপদ্যাস্তু বিশাং পতে
তদ্রূপমপরং বস্ত্রং প্রাদুরাসীদনেকশঃ
61.42
ততো হলহলাশব্দস্তত্রাসীদ্ঘোরনিস্বনঃ
তদদ্ভুততমং লোকে বীক্ষ্য সর্বমহীক্ষিতাম্
61.43
শশাপ তত্র ভীমস্তু রাজমধ্যে মহাস্বনঃ
ক্রোধাদ্বিস্ফুরমাণোষ্ঠো বিনিষ্পিষ্য করে করম্
61.44
ইদং মে বাক্যমাদদ্ধ্বং ক্ষত্রিয়া লোকবাসিনঃ
নোক্তপূর্বং নরৈরন্যৈর্ন চান্যো যদ্বদিষ্যতি
61.45
যদ্যেতদেবমুক্ত্বা তু ন কুর্যাং পৃথিবীশ্বরাঃ
পিতামহানাং সর্বেষাং নাহং গতিমবাপ্নুয়াম্
61.46
অস্য পাপস্য দুর্জাতের্ভারতাপসদস্য চ
ন পিবেয়ং বলাদ্বক্ষো ভিত্ত্বা চেদ্রুধিরং যুধি
61.47
তস্য তে বচনং শ্রুত্বা সর্বলোকপ্রহর্ষণম্
প্রচক্রুর্বহুলাং পূজাং কুত্সন্তো ধৃতরাষ্ট্রজম্
61.48
যদা তু বাসসাং রাশিঃ সভামধ্যে সমাচিতঃ
ততো দুঃশাসনঃ শ্রান্তো ব্রীডিতঃ সমুপাবিশৎ
61.49
ধিক্শব্দস্তু ততস্তত্র সমভূল্লোমহর্ষণঃ
সভ্যানাং নরদেবানাং দৃষ্ট্বা কুন্তীসুতাংস্তদা
61.50
ন বিব্রুবন্তি কৌরব্যাঃ প্রশ্নমেতমিতি স্ম হ
স জনঃ ক্রোশতি স্মাত্র ধৃতরাষ্ট্রং বিগর্হয়ন্
61.51
ততো বাহূ সমুচ্ছ্রিত্য নিবার্য চ সভাসদঃ
বিদুরঃ সর্বধর্মজ্ঞ ইদং বচনমব্রবীৎ
61.52
বিদুর উবাচ
দ্রৌপদী প্রশ্নমুক্ত্বৈবং রোরবীতি হ্যনাথবৎ
ন চ বিব্রূত তং প্রশ্নং সভ্যা ধর্মোঽত্র পীড্যতে
61.53
সভাং প্রপদ্যতে হ্যার্তঃ প্রজ্বলন্নিব হব্যবাট্
তং বৈ সত্যেন ধর্মেণ সভ্যাঃ প্রশময়ন্ত্যুত
61.54
ধর্মপ্রশ্নমথো ব্রূয়াদার্তঃ সভ্যেষু মানবঃ
বিব্রূয়ুস্তত্র তে প্রশ্নং কামক্রোধবশাতিগাঃ
61.55
বিকর্ণেন যথাপ্রজ্ঞমুক্তঃ প্রশ্নো নরাধিপাঃ
ভবন্তোঽপি হি তং প্রশ্নং বিব্রুবন্তু যথামতি
61.56
যো হি প্রশ্নং ন বিব্রূয়াদ্ধর্মদর্শী সভাং গতঃ
অনৃতে যা ফলাবাপ্তিস্তস্যাঃ সোঽর্ধং সমশ্নুতে
61.57
যঃ পুনর্বিতথং ব্রূয়াদ্ধর্মদর্শী সভাং গতঃ
অনৃতস্য ফলং কৃত্স্নং সংপ্রাপ্নোতীতি নিশ্চয়ঃ
61.58
অত্রাপ্যুদাহরন্তীমমিতিহাসং পুরাতনম্
প্রহ্লাদস্য চ সংবাদং মুনেরাঙ্গিরসস্য চ
61.59
প্রহ্লাদো নাম দৈত্যেন্দ্রস্তস্য পুত্রো বিরোচনঃ
কন্যাহেতোরাঙ্গিরসং সুধন্বানমুপাদ্রবৎ
61.60
অহং জ্যায়ানহং জ্যায়ানিতি কন্যেপ্সয়া তদা
তয়োর্দেবনমত্রাসীত্প্রাণয়োরিতি নঃ শ্রুতম্
61.61
তয়োঃ প্রশ্নবিবাদোঽভূত্প্রহ্লাদং তাবপৃচ্ছতাম্
জ্যায়ান্ক আবয়োরেকঃ প্রশ্নং প্রব্রূহি মা মৃষা
61.62
স বৈ বিবদনাদ্ভীতঃ সুধন্বানং ব্যলোকয়ৎ
তং সুধন্বাব্রবীত্ক্রুদ্ধো ব্রহ্মদণ্ড ইব জ্বলন্
61.63
যদি বৈ বক্ষ্যসি মৃষা প্রহ্লাদাথ ন বক্ষ্যসি
শতধা তে শিরো বজ্রী বজ্রেণ প্রহরিষ্যতি
61.64
সুধন্বনা তথোক্তঃ সন্ব্যথিতোঽশ্বত্থপর্ণবৎ
জগাম কশ্যপং দৈত্যঃ পরিপ্রষ্টুং মহৌজসম্
61.65
প্রহ্লাদ উবাচ
ত্বং বৈ ধর্মস্য বিজ্ঞাতা দৈবস্যেহাসুরস্য চ
ব্রাহ্মণস্য মহাপ্রাজ্ঞ ধর্মকৃচ্ছ্রমিদং শৃণু
61.66
যো বৈ প্রশ্নং ন বিব্রূয়াদ্বিতথং বাপি নির্দিশেৎ
কে বৈ তস্য পরে লোকাস্তন্মমাচক্ষ্ব পৃচ্ছতঃ
61.67
কশ্যপ উবাচ
জানন্ন বিব্রুবন্প্রশ্নং কামাত্ক্রোধাত্তথা ভয়াৎ
সহস্রং বারুণান্পাশানাত্মনি প্রতিমুঞ্চতি
61.68
তস্য সংবত্সরে পূর্ণে পাশ একঃ প্রমুচ্যতে
তস্মাত্সত্যং তু বক্তব্যং জানতা সত্যমঞ্জসা
61.69
বিদ্ধো ধর্মো হ্যধর্মেণ সভাং যত্র প্রপদ্যতে
ন চাস্য শল্যং কৃন্তন্তি বিদ্ধাস্তত্র সভাসদঃ
61.70
অর্ধং হরতি বৈ শ্রেষ্ঠঃ পাদো ভবতি কর্তৃষু
পাদশ্চৈব সভাসত্সু যে ন নিন্দন্তি নিন্দিতম্
61.71
অনেনা ভবতি শ্রেষ্ঠো মুচ্যন্তে চ সভাসদঃ
এনো গচ্ছতি কর্তারং নিন্দার্হো যত্র নিন্দ্যতে
61.72
বিতথং তু বদেয়ুর্যে ধর্মং প্রহ্লাদ পৃচ্ছতে
ইষ্টাপূর্তং চ তে ঘ্নন্তি সপ্ত চৈব পরাবরান্
61.73
হৃতস্বস্য হি যদ্দুঃখং হতপুত্রস্য চাপি যৎ
ঋণিনং প্রতি যচ্চৈব রাজ্ঞা গ্রস্তস্য চাপি যৎ
61.74
স্ত্রিয়াঃ পত্যা বিহীনায়াঃ সার্থাদ্ভ্রষ্টস্য চৈব যৎ
অধ্যূঢায়াশ্চ যদ্দুঃখং সাক্ষিভির্বিহতস্য চ
61.75
এতানি বৈ সমান্যাহুর্দুঃখানি ত্রিদশেশ্বরাঃ
তানি সর্বাণি দুঃখানি প্রাপ্নোতি বিতথং ব্রুবন্
61.76
সমক্ষদর্শনাত্সাক্ষ্যং শ্রবণাচ্চেতি ধারণাৎ
তস্মাত্সত্যং ব্রুবন্সাক্ষী ধর্মার্থাভ্যাং ন হীয়তে
61.77
বিদুর উবাচ
কশ্যপস্য বচঃ শ্রুত্বা প্রহ্লাদঃ পুত্রমব্রবীৎ
শ্রেয়ান্সুধন্বা ত্বত্তো বৈ মত্তঃ শ্রেয়াংস্তথাঙ্গিরাঃ
61.78
মাতা সুধন্বনশ্চাপি শ্রেয়সী মাতৃতস্তব
বিরোচন সুধন্বায়ং প্রাণানামীশ্বরস্তব
61.79
সুধন্বোবাচ
পুত্রস্নেহং পরিত্যজ্য যস্ত্বং ধর্মে প্রতিষ্ঠিতঃ
অনুজানামি তে পুত্রং জীবত্বেষ শতং সমাঃ
61.80
বিদুর উবাচ
এবং বৈ পরমং ধর্মং শ্রুত্বা সর্বে সভাসদঃ
যথাপ্রশ্নং তু কৃষ্ণায়া মন্যধ্বং তত্র কিং পরম্
61.81
বৈশংপায়ন উবাচ
বিদুরস্য বচঃ শ্রুত্বা নোচুঃ কিংচন পার্থিবাঃ
কর্ণো দুঃশাসনং ত্বাহ কৃষ্ণাং দাসীং গৃহান্নয়
61.82
তাং বেপমানাং সব্রীডাং প্রলপন্তীং স্ম পাণ্ডবান্
দুঃশাসনঃ সভামধ্যে বিচকর্ষ তপস্বিনীম্