Utshovঅধ্যায় 60
60.1
বৈশংপায়ন উবাচ
ধিগস্তু ক্ষত্তারমিতি ব্রুবাণো; দর্পেণ মত্তো ধৃতরাষ্ট্রস্য পুত্রঃ
অবৈক্ষত প্রাতিকামীং সভায়া;মুবাচ চৈনং পরমার্যমধ্যে
60.2
ত্বং প্রাতিকামিন্দ্রৌপদীমানয়স্ব; ন তে ভয়ং বিদ্যতে পাণ্ডবেভ্যঃ
ক্ষত্তা হ্যয়ং বিবদত্যেব ভীরু;র্ন চাস্মাকং বৃদ্ধিকামঃ সদৈব
60.3
এবমুক্তঃ প্রাতিকামী স সূতঃ; প্রায়াচ্ছীঘ্রং রাজবচো নিশম্য
প্রবিশ্য চ শ্বেব স সিংহগোষ্ঠং; সমাসদন্মহিষীং পাণ্ডবানাম্
60.4
প্রাতিকাম্যুবাচ
যুধিষ্ঠিরে দ্যূতমদেন মত্তে; দুর্যোধনো দ্রৌপদি ত্বামজৈষীৎ
সা প্রপদ্য ত্বং ধৃতরাষ্ট্রস্য বেশ্ম; নয়ামি ত্বাং কর্মণে যাজ্ঞসেনি
60.5
দ্রৌপদ্যুবাচ
কথং ত্বেবং বদসি প্রাতিকামি;ন্কো বৈ দীব্যেদ্ভার্যয়া রাজপুত্রঃ
মূঢো রাজা দ্যূতমদেন মত্ত; আহো নান্যত্কৈতবমস্য কিংচিৎ
60.6
প্রাতিকাম্যুবাচ
যদা নাভূত্কৈতবমন্যদস্য; তদাদেবীত্পাণ্ডবোঽজাতশত্রুঃ
ন্যস্তাঃ পূর্বং ভ্রাতরস্তেন রাজ্ঞা; স্বয়ং চাত্মা ত্বমথো রাজপুত্রি
60.7
দ্রৌপদ্যুবাচ
গচ্ছ ত্বং কিতবং গত্বা সভায়াং পৃচ্ছ সূতজ
কিং নু পূর্বং পরাজৈষীরাত্মানং মাং নু ভারত
এতজ্জ্ঞাত্বা ত্বমাগচ্ছ ততো মাং নয় সূতজ
60.8
বৈশংপায়ন উবাচ
সভাং গত্বা স চোবাচ দ্রৌপদ্যাস্তদ্বচস্তদা
কস্যেশো নঃ পরাজৈষীরিতি ত্বামাহ দ্রৌপদী
কিং নু পূর্বং পরাজৈষীরাত্মানমথ বাপি মাম্
60.9
যুধিষ্ঠিরস্তু নিশ্চেষ্টো গতসত্ত্ব ইবাভবৎ
ন তং সূতং প্রত্যুবাচ বচনং সাধ্বসাধু বা
60.10
দুর্যোধন উবাচ
ইহৈত্য কৃষ্ণা পাঞ্চালী প্রশ্নমেতং প্রভাষতাম্
ইহৈব সর্বে শৃণ্বন্তু তস্যা অস্য চ যদ্বচঃ
60.11
বৈশংপায়ন উবাচ
স গত্বা রাজভবনং দুর্যোধনবশানুগঃ
উবাচ দ্রৌপদীং সূতঃ প্রাতিকামী ব্যথন্নিব
60.12
সভ্যাস্ত্বমী রাজপুত্র্যাহ্বয়ন্তি; মন্যে প্রাপ্তঃ সংক্ষয়ঃ কৌরবাণাম্
ন বৈ সমৃদ্ধিং পালয়তে লঘীয়া;ন্যত্ত্বং সভামেষ্যসি রাজপুত্রি
60.13
দ্রৌপদ্যুবাচ
এবং নূনং ব্যদধাত্সংবিধাতা; স্পর্শাবুভৌ স্পৃশতো ধীরবালৌ
ধর্মং ত্বেকং পরমং প্রাহ লোকে; স নঃ শমং ধাস্যতি গোপ্যমানঃ
60.14
বৈশংপায়ন উবাচ
যুধিষ্ঠিরস্তু তচ্ছ্রুত্বা দুর্যোধনচিকীর্ষিতম্
দ্রৌপদ্যাঃ সংমতং দূতং প্রাহিণোদ্ভরতর্ষভ
60.15
একবস্ত্রা অধোনীবী রোদমানা রজস্বলা
সভামাগম্য পাঞ্চালী শ্বশুরস্যাগ্রতোঽভবৎ
60.16
ততস্তেষাং মুখমালোক্য রাজা; দুর্যোধনঃ সূতমুবাচ হৃষ্টঃ
ইহৈবৈতামানয় প্রাতিকামি;ন্প্রত্যক্ষমস্যাঃ কুরবো ব্রুবন্তু
60.17
ততঃ সূতস্তস্য বশানুগামী; ভীতশ্চ কোপাদ্দ্রুপদাত্মজায়াঃ
বিহায় মানং পুনরেব সভ্যা;নুবাচ কৃষ্ণাং কিমহং ব্রবীমি
60.18
দুর্যোধন উবাচ
দুঃশাসনৈষ মম সূতপুত্রো; বৃকোদরাদুদ্বিজতেঽল্পচেতাঃ
স্বয়ং প্রগৃহ্যানয় যাজ্ঞসেনীং; কিং তে করিষ্যন্ত্যবশাঃ সপত্নাঃ
60.19
ততঃ সমুত্থায় স রাজপুত্রঃ; শ্রুত্বা ভ্রাতুঃ কোপবিরক্তদৃষ্টিঃ
প্রবিশ্য তদ্বেশ্ম মহারথানা;মিত্যব্রবীদ্দ্রৌপদীং রাজপুত্রীম্
60.20
এহ্যেহি পাঞ্চালি জিতাসি কৃষ্ণে; দুর্যোধনং পশ্য বিমুক্তলজ্জা
কুরূন্ভজস্বায়তপদ্মনেত্রে; ধর্মেণ লব্ধাসি সভাং পরৈহি
60.21
ততঃ সমুত্থায় সুদুর্মনাঃ সা; বিবর্ণমামৃজ্য মুখং করেণ
আর্তা প্রদুদ্রাব যতঃ স্ত্রিয়স্তা; বৃদ্ধস্য রাজ্ঞঃ কুরুপুংগবস্য
60.22
ততো জবেনাভিসসার রোষা;দ্দুঃশাসনস্তামভিগর্জমানঃ
দীর্ঘেষু নীলেষ্বথ চোর্মিমত্সু; জগ্রাহ কেশেষু নরেন্দ্রপত্নীম্
60.23
যে রাজসূয়াবভৃথে জলেন; মহাক্রতৌ মন্ত্রপূতেন সিক্তাঃ
তে পাণ্ডবানাং পরিভূয় বীর্যং; বলাত্প্রমৃষ্টা ধৃতরাষ্ট্রজেন
60.24
স তাং পরামৃশ্য সভাসমীপ;মানীয় কৃষ্ণামতিকৃষ্ণকেশীম্
দুঃশাসনো নাথবতীমনাথব;চ্চকর্ষ বায়ুঃ কদলীমিবার্তাম্
60.25
সা কৃষ্যমাণা নমিতাঙ্গয়ষ্টিঃ; শনৈরুবাচাদ্য রজস্বলাস্মি
একং চ বাসো মম মন্দবুদ্ধে; সভাং নেতুং নার্হসি মামনার্য
60.26
ততোঽব্রবীত্তাং প্রসভং নিগৃহ্য; কেশেষু কৃষ্ণেষু তদা স কৃষ্ণাম্
কৃষ্ণং চ জিষ্ণুং চ হরিং নরং চ; ত্রাণায় বিক্রোশ নয়ামি হি ত্বাম্
60.27
রজস্বলা বা ভব যাজ্ঞসেনি; একাম্বরা বাপ্যথ বা বিবস্ত্রা
দ্যূতে জিতা চাসি কৃতাসি দাসী; দাসীষু কামশ্চ যথোপজোষম্
60.28
প্রকীর্ণকেশী পতিতার্ধবস্ত্রা; দুঃশাসনেন ব্যবধূয়মানা
হ্রীমত্যমর্ষেণ চ দহ্যমানা; শনৈরিদং বাক্যমুবাচ কৃষ্ণা
60.29
ইমে সভায়ামুপদিষ্টশাস্ত্রাঃ; ক্রিয়াবন্তঃ সর্ব এবেন্দ্রকল্পাঃ
গুরুস্থানা গুরবশ্চৈব সর্বে; তেষামগ্রে নোত্সহে স্থাতুমেবম্
60.30
নৃশংসকর্মংস্ত্বমনার্যবৃত্ত; মা মাং বিবস্ত্রাং কৃধি মা বিকার্ষীঃ
ন মর্ষয়েয়ুস্তব রাজপুত্রাঃ; সেন্দ্রাপি দেবা যদি তে সহায়াঃ
60.31
ধর্মে স্থিতো ধর্মসুতশ্চ রাজা; ধর্মশ্চ সূক্ষ্মো নিপুণোপলভ্যঃ
বাচাপি ভর্তুঃ পরমাণুমাত্রং; নেচ্ছামি দোষং স্বগুণান্বিসৃজ্য
60.32
ইদং ত্বনার্যং কুরুবীরমধ্যে; রজস্বলাং যত্পরিকর্ষসে মাম্
ন চাপি কশ্চিত্কুরুতেঽত্র পূজাং; ধ্রুবং তবেদং মতমন্বপদ্যন্
60.33
ধিগস্তু নষ্টঃ খলু ভারতানাং; ধর্মস্তথা ক্ষত্রবিদাং চ বৃত্তম্
যত্রাভ্যতীতাং কুরুধর্মবেলাং; প্রেক্ষন্তি সর্বে কুরবঃ সভায়াম্
60.34
দ্রোণস্য ভীষ্মস্য চ নাস্তি সত্ত্বং; ধ্রুবং তথৈবাস্য মহাত্মনোঽপি
রাজ্ঞস্তথা হীমমধর্মমুগ্রং; ন লক্ষয়ন্তে কুরুবৃদ্ধমুখ্যাঃ
60.35
তথা ব্রুবন্তী করুণং সুমধ্যমা; কাক্ষেণ ভর্তৄন্কুপিতানপশ্যৎ
সা পাণ্ডবান্কোপপরীতদেহা;ন্সংদীপয়ামাস কটাক্ষপাতৈঃ
60.36
হৃতেন রাজ্যেন তথা ধনেন; রত্নৈশ্চ মুখ্যৈর্ন তথা বভূব
যথার্তয়া কোপসমীরিতেন; কৃষ্ণাকটাক্ষেণ বভূব দুঃখম্
60.37
দুঃশাসনশ্চাপি সমীক্ষ্য কৃষ্ণা;মবেক্ষমাণাং কৃপণান্পতীংস্তান্
আধূয় বেগেন বিসংজ্ঞকল্পা;মুবাচ দাসীতি হসন্নিবোগ্রঃ
60.38
কর্ণস্তু তদ্বাক্যমতীব হৃষ্টঃ; সংপূজয়ামাস হসন্সশব্দম্
গান্ধাররাজঃ সুবলস্য পুত্র;স্তথৈব দুঃশাসনমভ্যনন্দৎ
60.39
সভ্যাস্তু যে তত্র বভূবুরন্যে; তাভ্যামৃতে ধার্তরাষ্ট্রেণ চৈব
তেষামভূদ্দুঃখমতীব কৃষ্ণাং; দৃষ্ট্বা সভায়াং পরিকৃষ্যমাণাম্
60.40
ভীষ্ম উবাচ
ন ধর্মসৌক্ষ্ম্যাত্সুভগে বিবক্তুং; শক্নোমি তে প্রশ্নমিমং যথাবৎ
অস্বো হ্যশক্তঃ পণিতুং পরস্বং; স্ত্রিয়শ্চ ভর্তুর্বশতাং সমীক্ষ্য
60.41
ত্যজেত সর্বাং পৃথিবীং সমৃদ্ধাং; যুধিষ্ঠিরঃ সত্যমথো ন জহ্যাৎ
উক্তং জিতোঽস্মীতি চ পাণ্ডবেন; তস্মান্ন শক্নোমি বিবেক্তুমেতৎ
60.42
দ্যূতেঽদ্বিতীয়ঃ শকুনির্নরেষু; কুন্তীসুতস্তেন নিসৃষ্টকামঃ
ন মন্যতে তাং নিকৃতিং মহাত্মা; তস্মান্ন তে প্রশ্নমিমং ব্রবীমি
60.43
দ্রৌপদ্যুবাচ
আহূয় রাজা কুশলৈঃ সভায়াং; দুষ্টাত্মভির্নৈকৃতিকৈরনার্যৈঃ
দ্যূতপ্রিয়ৈর্নাতিকৃতপ্রয়ত্নঃ; কস্মাদয়ং নাম নিসৃষ্টকামঃ
60.44
স শুদ্ধভাবো নিকৃতিপ্রবৃত্তি;মবুধ্যমানঃ কুরুপাণ্ডবাগ্র্যঃ
সংভূয় সর্বৈশ্চ জিতোঽপি যস্মা;ত্পশ্চাচ্চ যত্কৈতবমভ্যুপেতঃ
60.45
তিষ্ঠন্তি চেমে কুরবঃ সভায়া;মীশাঃ সুতানাং চ তথা স্নুষাণাম্
সমীক্ষ্য সর্বে মম চাপি বাক্যং; বিব্রূত মে প্রশ্নমিমং যথাবৎ
60.46
বৈশংপায়ন উবাচ
তথা ব্রুবন্তীং করুণং রুদন্তী;মবেক্ষমাণামসকৃত্পতীংস্তান্
দুঃশাসনঃ পরুষাণ্যপ্রিয়াণি; বাক্যান্যুবাচামধুরাণি চৈব
60.47
তাং কৃষ্যমাণাং চ রজস্বলাং চ; স্রস্তোত্তরীয়ামতদর্হমাণাম্
বৃকোদরঃ প্রেক্ষ্য যুধিষ্ঠিরং চ; চকার কোপং পরমার্তরূপঃ