Utshovঅধ্যায় 59
59.1
দুর্যোধন উবাচ
এহি ক্ষত্তর্দ্রৌপদীমানয়স্ব; প্রিয়াং ভার্যাং সংমতাং পাণ্ডবানাম্
সংমার্জতাং বেশ্ম পরৈতু শীঘ্র;মানন্দো নঃ সহ দাসীভিরস্তু
59.2
বিদুর উবাচ
দুর্বিভাব্যং ভবতি ত্বাদৃশেন; ন মন্দ সংবুধ্যসি পাশবদ্ধঃ
প্রপাতে ত্বং লম্বমানো ন বেত্সি; ব্যাঘ্রান্মৃগঃ কোপয়সেঽতিবাল্যাৎ
59.3
আশীবিষাঃ শিরসি তে পূর্ণকোশা মহাবিষাঃ
মা কোপিষ্ঠাঃ সুমন্দাত্মন্মা গমস্ত্বং যমক্ষয়ম্
59.4
ন হি দাসীত্বমাপন্না কৃষ্ণা ভবতি ভারত
অনীশেন হি রাজ্ঞৈষা পণে ন্যস্তেতি মে মতিঃ
59.5
অয়ং ধত্তে বেণুরিবাত্মঘাতী; ফলং রাজা ধৃতরাষ্ট্রস্য পুত্রঃ
দ্যূতং হি বৈরায় মহাভয়ায়; পক্বো ন বুধ্যত্যয়মন্তকালে
59.6
নারুংতুদঃ স্যান্ন নৃশংসবাদী; ন হীনতঃ পরমভ্যাদদীত
যয়াস্য বাচা পর উদ্বিজেত; ন তাং বদেদ্রুশতীং পাপলোক্যাম্
59.7
সমুচ্চরন্ত্যতিবাদা হি বক্ত্রা;দ্যৈরাহতঃ শোচতি রাত্র্যহানি
পরস্য নামর্মসু তে পতন্তি; তান্পণ্ডিতো নাবসৃজেত্পরেষু
59.8
অজো হি শস্ত্রমখনত্কিলৈকঃ; শস্ত্রে বিপন্নে পদ্ভিরপাস্য ভূমিম্
নিকৃন্তনং স্বস্য কণ্ঠস্য ঘোরং; তদ্বদ্বৈরং মা খনীঃ পাণ্ডুপুত্রৈঃ
59.9
ন কিংচিদীড্যং প্রবদন্তি পাপং; বনেচরং বা গৃহমেধিনং বা
তপস্বিনং সংপরিপূর্ণবিদ্যং; ভষন্তি হৈবং শ্বনরাঃ সদৈব
59.10
দ্বারং সুঘোরং নরকস্য জিহ্মং; ন বুধ্যসে ধৃতরাষ্ট্রস্য পুত্র
ত্বামন্বেতারো বহবঃ কুরূণাং; দ্যূতোদয়ে সহ দুঃশাসনেন
59.11
মজ্জন্ত্যলাবূনি শিলাঃ প্লবন্তে; মুহ্যন্তি নাবোঽম্ভসি শশ্বদেব
মূঢো রাজা ধৃতরাষ্ট্রস্য পুত্রো; ন মে বাচঃ পথ্যরূপাঃ শৃণোতি
59.12
অন্তো নূনং ভবিতায়ং কুরূণাং; সুদারুণঃ সর্বহরো বিনাশঃ
বাচঃ কাব্যাঃ সুহৃদাং পথ্যরূপা; ন শ্রূয়ন্তে বর্ধতে লোভ এব