UtshovChapter 59
59.1
दुर्योधन उवाच
एहि क्षत्तर्द्रौपदीमानयस्व; प्रियां भार्यां संमतां पाण्डवानाम्
संमार्जतां वेश्म परैतु शीघ्र;मानन्दो नः सह दासीभिरस्तु
Duryodhana uvacha
Ehi kshattardraupadimanayasva; priyam bharyam sammatam pandavanam
Sammarjatam veshma paraitu shighra;manando nah saha dasibhirastu
59.2
विदुर उवाच
दुर्विभाव्यं भवति त्वादृशेन; न मन्द संबुध्यसि पाशबद्धः
प्रपाते त्वं लम्बमानो न वेत्सि; व्याघ्रान्मृगः कोपयसेऽतिबाल्यात्
Vidura uvacha
Durvibhavyam bhavati tvadrishena; na manda sambudhyasi pashabaddhah
Prapate tvam lambamano na vetsi; vyaghranmrigah kopayasetibalyat
59.3
आशीविषाः शिरसि ते पूर्णकोशा महाविषाः
मा कोपिष्ठाः सुमन्दात्मन्मा गमस्त्वं यमक्षयम्
Ashivishah shirasi te purnakosha mahavishah
Ma kopishthah sumandatmanma gamastvam yamakshayam
59.4
न हि दासीत्वमापन्ना कृष्णा भवति भारत
अनीशेन हि राज्ञैषा पणे न्यस्तेति मे मतिः
Na hi dasitvamapanna krishna bhavati bharata
Anishena hi ragyaisha pane nyasteti me matih
59.5
अयं धत्ते वेणुरिवात्मघाती; फलं राजा धृतराष्ट्रस्य पुत्रः
द्यूतं हि वैराय महाभयाय; पक्वो न बुध्यत्ययमन्तकाले
Ayam dhatte venurivatmaghati; phalam raja dhritarashtrasya putrah
Dyutam hi vairaya mahabhayaya; pakvo na budhyatyayamantakale
59.6
नारुंतुदः स्यान्न नृशंसवादी; न हीनतः परमभ्याददीत
ययास्य वाचा पर उद्विजेत; न तां वदेद्रुशतीं पापलोक्याम्
Naruntudah syanna nrishansavadi; na hinatah paramabhyadadita
Yayasya vacha para udvijeta; na tam vadedrushatim papalokyam
59.7
समुच्चरन्त्यतिवादा हि वक्त्रा;द्यैराहतः शोचति रात्र्यहानि
परस्य नामर्मसु ते पतन्ति; तान्पण्डितो नावसृजेत्परेषु
Samuchcharantyativada hi vaktra;dyairahatah shochati ratryahani
Parasya namarmasu te patanti; tanpandito navasrijetpareshu
59.8
अजो हि शस्त्रमखनत्किलैकः; शस्त्रे विपन्ने पद्भिरपास्य भूमिम्
निकृन्तनं स्वस्य कण्ठस्य घोरं; तद्वद्वैरं मा खनीः पाण्डुपुत्रैः
Ajo hi shastramakhanatkilaikah; shastre vipanne padbhirapasya bhumim
Nikrintanam svasya kanthasya ghoram; tadvadvairam ma khanih panduputraih
59.9
न किंचिदीड्यं प्रवदन्ति पापं; वनेचरं वा गृहमेधिनं वा
तपस्विनं संपरिपूर्णविद्यं; भषन्ति हैवं श्वनराः सदैव
Na kinchididyam pravadanti papam; vanecharam va grihamedhinam va
Tapasvinam samparipurnavidyam; bhashanti haivam shvanarah sadaiva
59.10
द्वारं सुघोरं नरकस्य जिह्मं; न बुध्यसे धृतराष्ट्रस्य पुत्र
त्वामन्वेतारो बहवः कुरूणां; द्यूतोदये सह दुःशासनेन
Dvaram sughoram narakasya jihmam; na budhyase dhritarashtrasya putra
Tvamanvetaro bahavah kurunam; dyutodaye saha duhshasanena
59.11
मज्जन्त्यलाबूनि शिलाः प्लवन्ते; मुह्यन्ति नावोऽम्भसि शश्वदेव
मूढो राजा धृतराष्ट्रस्य पुत्रो; न मे वाचः पथ्यरूपाः शृणोति
Majjantyalabuni shilah plavante; muhyanti navombhasi shashvadeva
Mudho raja dhritarashtrasya putro; na me vachah pathyarupah shrinoti
59.12
अन्तो नूनं भवितायं कुरूणां; सुदारुणः सर्वहरो विनाशः
वाचः काव्याः सुहृदां पथ्यरूपा; न श्रूयन्ते वर्धते लोभ एव
Anto nunam bhavitayam kurunam; sudarunah sarvaharo vinashah
Vachah kavyah suhridam pathyarupa; na shruyante vardhate lobha eva