UtshovChapter 61
61.1
भीम उवाच
भवन्ति देशे बन्धक्यः कितवानां युधिष्ठिर
न ताभिरुत दीव्यन्ति दया चैवास्ति तास्वपि
Bhima uvacha
Bhavanti deshe bandhakyah kitavanam yudhishthira
Na tabhiruta divyanti daya chaivasti tasvapi
61.2
काश्यो यद्बलिमाहार्षीद्द्रव्यं यच्चान्यदुत्तमम्
तथान्ये पृथिवीपाला यानि रत्नान्युपाहरन्
Kashyo yadbalimaharshiddravyam yachchanyaduttamam
Tathanye prithivipala yani ratnanyupaharan
61.3
वाहनानि धनं चैव कवचान्यायुधानि च
राज्यमात्मा वयं चैव कैतवेन हृतं परैः
Vahanani dhanam chaiva kavachanyayudhani cha
Rajyamatma vayam chaiva kaitavena hritam paraih
61.4
न च मे तत्र कोपोऽभूत्सर्वस्येशो हि नो भवान्
इदं त्वतिकृतं मन्ये द्रौपदी यत्र पण्यते
Na cha me tatra kopobhutsarvasyesho hi no bhavan
Idam tvatikritam manye draupadi yatra panyate
61.5
एषा ह्यनर्हती बाला पाण्डवान्प्राप्य कौरवैः
त्वत्कृते क्लिश्यते क्षुद्रैर्नृशंसैर्निकृतिप्रियैः
Esha hyanarhati bala pandavanprapya kauravaih
Tvatkrite klishyate kshudrairnrishansairnikritipriyaih
61.6
अस्याः कृते मन्युरयं त्वयि राजन्निपात्यते
बाहू ते संप्रधक्ष्यामि सहदेवाग्निमानय
Asyah krite manyurayam tvayi rajannipatyate
Bahu te sampradhakshyami sahadevagnimanaya
61.7
अर्जुन उवाच
न पुरा भीमसेन त्वमीदृशीर्वदिता गिरः
परैस्ते नाशितं नूनं नृशंसैर्धर्मगौरवम्
Arjuna uvacha
Na pura bhimasena tvamidrishirvadita girah
Paraiste nashitam nunam nrishansairdharmagauravam
61.8
न सकामाः परे कार्या धर्ममेवाचरोत्तमम्
भ्रातरं धार्मिकं ज्येष्ठं नातिक्रमितुमर्हति
Na sakamah pare karya dharmamevacharottamam
Bhrataram dharmikam jyeshtham natikramitumarhati
61.9
आहूतो हि परै राजा क्षात्रधर्ममनुस्मरन्
दीव्यते परकामेन तन्नः कीर्तिकरं महत्
Ahuto hi parai raja kshatradharmamanusmaran
Divyate parakamena tannah kirtikaram mahat
61.10
भीमसेन उवाच
एवमस्मिकृतं विद्यां यद्यस्याहं धनंजय
दीप्तेऽग्नौ सहितौ बाहू निर्दहेयं बलादिव
Bhimasena uvacha
Evamasmikritam vidyam yadyasyaham dhananjaya
Diptegnau sahitau bahu nirdaheyam baladiva
61.11
वैशंपायन उवाच
तथा तान्दुःखितान्दृष्ट्वा पाण्डवान्धृतराष्ट्रजः
क्लिश्यमानां च पाञ्चालीं विकर्ण इदमब्रवीत्
Vaishampayana uvacha
Tatha tanduhkhitandrishtva pandavandhritarashtrajah
Klishyamanam cha panchalim vikarna idamabravit
61.12
याज्ञसेन्या यदुक्तं तद्वाक्यं विब्रूत पार्थिवाः
अविवेकेन वाक्यस्य नरकः सद्य एव नः
Yagyasenya yaduktam tadvakyam vibruta parthivah
Avivekena vakyasya narakah sadya eva nah
61.13
भीष्मश्च धृतराष्ट्रश्च कुरुवृद्धतमावुभौ
समेत्य नाहतुः किंचिद्विदुरश्च महामतिः
Bhishmashcha dhritarashtrashcha kuruvriddhatamavubhau
Sametya nahatuh kinchidvidurashcha mahamatih
61.14
भारद्वाजोऽपि सर्वेषामाचार्यः कृप एव च
अत एतावपि प्रश्नं नाहतुर्द्विजसत्तमौ
Bharadvajopi sarveshamacharyah kripa eva cha
Ata etavapi prashnam nahaturdvijasattamau
61.15
ये त्वन्ये पृथिवीपालाः समेताः सर्वतो दिशः
कामक्रोधौ समुत्सृज्य ते ब्रुवन्तु यथामति
Ye tvanye prithivipalah sametah sarvato dishah
Kamakrodhau samutsrijya te bruvantu yathamati
61.16
यदिदं द्रौपदी वाक्यमुक्तवत्यसकृच्छुभा
विमृश्य कस्य कः पक्षः पार्थिवा वदतोत्तरम्
Yadidam draupadi vakyamuktavatyasakrichchhubha
Vimrishya kasya kah pakshah parthiva vadatottaram
61.17
एवं स बहुशः सर्वानुक्तवांस्तान्सभासदः
न च ते पृथिवीपालास्तमूचुः साध्वसाधु वा
Evam sa bahushah sarvanuktavanstansabhasadah
Na cha te prithivipalastamuchuh sadhvasadhu va
61.18
उक्त्वा तथासकृत्सर्वान्विकर्णः पृथिवीपतीन्
पाणिं पाणौ विनिष्पिष्य निःश्वसन्निदमब्रवीत्
Uktva tathasakritsarvanvikarnah prithivipatin
Panim panau vinishpishya nihshvasannidamabravit
61.19
विब्रूत पृथिवीपाला वाक्यं मा वा कथंचन
मन्ये न्याय्यं यदत्राहं तद्धि वक्ष्यामि कौरवाः
Vibruta prithivipala vakyam ma va kathanchana
Manye nyayyam yadatraham taddhi vakshyami kauravah
61.20
चत्वार्याहुर्नरश्रेष्ठा व्यसनानि महीक्षिताम्
मृगयां पानमक्षांश्च ग्राम्ये चैवातिसक्तताम्
Chatvaryahurnarashreshtha vyasanani mahikshitam
Mrigayam panamakshanshcha gramye chaivatisaktatam
61.21
एतेषु हि नरः सक्तो धर्ममुत्सृज्य वर्तते
तथायुक्तेन च कृतां क्रियां लोको न मन्यते
Eteshu hi narah sakto dharmamutsrijya vartate
Tathayuktena cha kritam kriyam loko na manyate
61.22
तदयं पाण्डुपुत्रेण व्यसने वर्तता भृशम्
समाहूतेन कितवैरास्थितो द्रौपदीपणः
Tadayam panduputrena vyasane vartata bhrisham
Samahutena kitavairasthito draupadipanah
61.23
साधारणी च सर्वेषां पाण्डवानामनिन्दिता
जितेन पूर्वं चानेन पाण्डवेन कृतः पणः
Sadharani cha sarvesham pandavanamanindita
Jitena purvam chanena pandavena kritah panah
61.24
इयं च कीर्तिता कृष्णा सौबलेन पणार्थिना
एतत्सर्वं विचार्याहं मन्ये न विजितामिमाम्
Iyam cha kirtita krishna saubalena panarthina
Etatsarvam vicharyaham manye na vijitamimam
61.25
एतच्छ्रुत्वा महान्नादः सभ्यानामुदतिष्ठत
विकर्णं शंसमानानां सौबलं च विनिन्दताम्
Etachchhrutva mahannadah sabhyanamudatishthata
Vikarnam shansamananam saubalam cha vinindatam
61.26
तस्मिन्नुपरते शब्दे राधेयः क्रोधमूर्छितः
प्रगृह्य रुचिरं बाहुमिदं वचनमब्रवीत्
Tasminnuparate shabde radheyah krodhamurchhitah
Pragrihya ruchiram bahumidam vachanamabravit
61.27
दृश्यन्ते वै विकर्णे हि वैकृतानि बहून्यपि
तज्जस्तस्य विनाशाय यथाग्निररणिप्रजः
Drishyante vai vikarne hi vaikritani bahunyapi
Tajjastasya vinashaya yathagniraraniprajah
61.28
एते न किंचिदप्याहुश्चोद्यमानापि कृष्णया
धर्मेण विजितां मन्ये मन्यन्ते द्रुपदात्मजाम्
Ete na kinchidapyahushchodyamanapi krishnaya
Dharmena vijitam manye manyante drupadatmajam
61.29
त्वं तु केवलबाल्येन धार्तराष्ट्र विदीर्यसे
यद्ब्रवीषि सभामध्ये बालः स्थविरभाषितम्
Tvam tu kevalabalyena dhartarashtra vidiryase
Yadbravishi sabhamadhye balah sthavirabhashitam
61.30
न च धर्मं यथातत्त्वं वेत्सि दुर्योधनावर
यद्ब्रवीषि जितां कृष्णामजितेति सुमन्दधीः
Na cha dharmam yathatattvam vetsi duryodhanavara
Yadbravishi jitam krishnamajiteti sumandadhih
61.31
कथं ह्यविजितां कृष्णां मन्यसे धृतराष्ट्रज
यदा सभायां सर्वस्वं न्यस्तवान्पाण्डवाग्रजः
Katham hyavijitam krishnam manyase dhritarashtraja
Yada sabhayam sarvasvam nyastavanpandavagrajah
61.32
अभ्यन्तरा च सर्वस्वे द्रौपदी भरतर्षभ
एवं धर्मजितां कृष्णां मन्यसे न जितां कथम्
Abhyantara cha sarvasve draupadi bharatarshabha
Evam dharmajitam krishnam manyase na jitam katham
61.33
कीर्तिता द्रौपदी वाचा अनुज्ञाता च पाण्डवैः
भवत्यविजिता केन हेतुनैषा मता तव
Kirtita draupadi vacha anugyata cha pandavaih
Bhavatyavijita kena hetunaisha mata tava
61.34
मन्यसे वा सभामेतामानीतामेकवाससम्
अधर्मेणेति तत्रापि शृणु मे वाक्यमुत्तरम्
Manyase va sabhametamanitamekavasasam
Adharmeneti tatrapi shrinu me vakyamuttaram
61.35
एको भर्ता स्त्रिया देवैर्विहितः कुरुनन्दन
इयं त्वनेकवशगा बन्धकीति विनिश्चिता
Eko bharta striya devairvihitah kurunandana
Iyam tvanekavashaga bandhakiti vinishchita
61.36
अस्याः सभामानयनं न चित्रमिति मे मतिः
एकाम्बरधरत्वं वाप्यथ वापि विवस्त्रता
Asyah sabhamanayanam na chitramiti me matih
Ekambaradharatvam vapyatha vapi vivastrata
61.37
यच्चैषां द्रविणं किंचिद्या चैषा ये च पाण्डवाः
सौबलेनेह तत्सर्वं धर्मेण विजितं वसु
Yachchaisham dravinam kinchidya chaisha ye cha pandavah
Saubaleneha tatsarvam dharmena vijitam vasu
61.38
दुःशासन सुबालोऽयं विकर्णः प्राज्ञवादिकः
पाण्डवानां च वासांसि द्रौपद्याश्चाप्युपाहर
Duhshasana subaloyam vikarnah pragyavadikah
Pandavanam cha vasansi draupadyashchapyupahara
61.39
तच्छ्रुत्वा पाण्डवाः सर्वे स्वानि वासांसि भारत
अवकीर्योत्तरीयाणि सभायां समुपाविशन्
Tachchhrutva pandavah sarve svani vasansi bharata
Avakiryottariyani sabhayam samupavishan
61.40
ततो दुःशासनो राजन्द्रौपद्या वसनं बलात्
सभामध्ये समाक्षिप्य व्यपक्रष्टुं प्रचक्रमे
Tato duhshasano rajandraupadya vasanam balat
Sabhamadhye samakshipya vyapakrashtum prachakrame
61.41
आकृष्यमाणे वसने द्रौपद्यास्तु विशां पते
तद्रूपमपरं वस्त्रं प्रादुरासीदनेकशः
Akrishyamane vasane draupadyastu visham pate
Tadrupamaparam vastram pradurasidanekashah
61.42
ततो हलहलाशब्दस्तत्रासीद्घोरनिस्वनः
तदद्भुततमं लोके वीक्ष्य सर्वमहीक्षिताम्
Tato halahalashabdastatrasidghoranisvanah
Tadadbhutatamam loke vikshya sarvamahikshitam
61.43
शशाप तत्र भीमस्तु राजमध्ये महास्वनः
क्रोधाद्विस्फुरमाणोष्ठो विनिष्पिष्य करे करम्
Shashapa tatra bhimastu rajamadhye mahasvanah
Krodhadvisphuramanoshtho vinishpishya kare karam
61.44
इदं मे वाक्यमादद्ध्वं क्षत्रिया लोकवासिनः
नोक्तपूर्वं नरैरन्यैर्न चान्यो यद्वदिष्यति
Idam me vakyamadaddhvam kshatriya lokavasinah
Noktapurvam narairanyairna chanyo yadvadishyati
61.45
यद्येतदेवमुक्त्वा तु न कुर्यां पृथिवीश्वराः
पितामहानां सर्वेषां नाहं गतिमवाप्नुयाम्
Yadyetadevamuktva tu na kuryam prithivishvarah
Pitamahanam sarvesham naham gatimavapnuyam
61.46
अस्य पापस्य दुर्जातेर्भारतापसदस्य च
न पिबेयं बलाद्वक्षो भित्त्वा चेद्रुधिरं युधि
Asya papasya durjaterbharatapasadasya cha
Na pibeyam baladvaksho bhittva chedrudhiram yudhi
61.47
तस्य ते वचनं श्रुत्वा सर्वलोकप्रहर्षणम्
प्रचक्रुर्बहुलां पूजां कुत्सन्तो धृतराष्ट्रजम्
Tasya te vachanam shrutva sarvalokapraharshanam
Prachakrurbahulam pujam kutsanto dhritarashtrajam
61.48
यदा तु वाससां राशिः सभामध्ये समाचितः
ततो दुःशासनः श्रान्तो व्रीडितः समुपाविशत्
Yada tu vasasam rashih sabhamadhye samachitah
Tato duhshasanah shranto vriditah samupavishat
61.49
धिक्शब्दस्तु ततस्तत्र समभूल्लोमहर्षणः
सभ्यानां नरदेवानां दृष्ट्वा कुन्तीसुतांस्तदा
Dhikshabdastu tatastatra samabhullomaharshanah
Sabhyanam naradevanam drishtva kuntisutanstada
61.50
न विब्रुवन्ति कौरव्याः प्रश्नमेतमिति स्म ह
स जनः क्रोशति स्मात्र धृतराष्ट्रं विगर्हयन्
Na vibruvanti kauravyah prashnametamiti sma ha
Sa janah kroshati smatra dhritarashtram vigarhayan
61.51
ततो बाहू समुच्छ्रित्य निवार्य च सभासदः
विदुरः सर्वधर्मज्ञ इदं वचनमब्रवीत्
Tato bahu samuchchhritya nivarya cha sabhasadah
Vidurah sarvadharmagya idam vachanamabravit
61.52
विदुर उवाच
द्रौपदी प्रश्नमुक्त्वैवं रोरवीति ह्यनाथवत्
न च विब्रूत तं प्रश्नं सभ्या धर्मोऽत्र पीड्यते
Vidura uvacha
Draupadi prashnamuktvaivam roraviti hyanathavat
Na cha vibruta tam prashnam sabhya dharmotra pidyate
61.53
सभां प्रपद्यते ह्यार्तः प्रज्वलन्निव हव्यवाट्
तं वै सत्येन धर्मेण सभ्याः प्रशमयन्त्युत
Sabham prapadyate hyartah prajvalanniva havyavat
Tam vai satyena dharmena sabhyah prashamayantyuta
61.54
धर्मप्रश्नमथो ब्रूयादार्तः सभ्येषु मानवः
विब्रूयुस्तत्र ते प्रश्नं कामक्रोधवशातिगाः
Dharmaprashnamatho bruyadartah sabhyeshu manavah
Vibruyustatra te prashnam kamakrodhavashatigah
61.55
विकर्णेन यथाप्रज्ञमुक्तः प्रश्नो नराधिपाः
भवन्तोऽपि हि तं प्रश्नं विब्रुवन्तु यथामति
Vikarnena yathapragyamuktah prashno naradhipah
Bhavantopi hi tam prashnam vibruvantu yathamati
61.56
यो हि प्रश्नं न विब्रूयाद्धर्मदर्शी सभां गतः
अनृते या फलावाप्तिस्तस्याः सोऽर्धं समश्नुते
Yo hi prashnam na vibruyaddharmadarshi sabham gatah
Anrite ya phalavaptistasyah sordham samashnute
61.57
यः पुनर्वितथं ब्रूयाद्धर्मदर्शी सभां गतः
अनृतस्य फलं कृत्स्नं संप्राप्नोतीति निश्चयः
Yah punarvitatham bruyaddharmadarshi sabham gatah
Anritasya phalam kritsnam samprapnotiti nishchayah
61.58
अत्राप्युदाहरन्तीममितिहासं पुरातनम्
प्रह्लादस्य च संवादं मुनेराङ्गिरसस्य च
Atrapyudaharantimamitihasam puratanam
Prahladasya cha sanvadam munerangirasasya cha
61.59
प्रह्लादो नाम दैत्येन्द्रस्तस्य पुत्रो विरोचनः
कन्याहेतोराङ्गिरसं सुधन्वानमुपाद्रवत्
Prahlado nama daityendrastasya putro virochanah
Kanyahetorangirasam sudhanvanamupadravat
61.60
अहं ज्यायानहं ज्यायानिति कन्येप्सया तदा
तयोर्देवनमत्रासीत्प्राणयोरिति नः श्रुतम्
Aham jyayanaham jyayaniti kanyepsaya tada
Tayordevanamatrasitpranayoriti nah shrutam
61.61
तयोः प्रश्नविवादोऽभूत्प्रह्लादं तावपृच्छताम्
ज्यायान्क आवयोरेकः प्रश्नं प्रब्रूहि मा मृषा
Tayoh prashnavivadobhutprahladam tavaprichchhatam
Jyayanka avayorekah prashnam prabruhi ma mrisha
61.62
स वै विवदनाद्भीतः सुधन्वानं व्यलोकयत्
तं सुधन्वाब्रवीत्क्रुद्धो ब्रह्मदण्ड इव ज्वलन्
Sa vai vivadanadbhitah sudhanvanam vyalokayat
Tam sudhanvabravitkruddho brahmadanda iva jvalan
61.63
यदि वै वक्ष्यसि मृषा प्रह्लादाथ न वक्ष्यसि
शतधा ते शिरो वज्री वज्रेण प्रहरिष्यति
Yadi vai vakshyasi mrisha prahladatha na vakshyasi
Shatadha te shiro vajri vajrena praharishyati
61.64
सुधन्वना तथोक्तः सन्व्यथितोऽश्वत्थपर्णवत्
जगाम कश्यपं दैत्यः परिप्रष्टुं महौजसम्
Sudhanvana tathoktah sanvyathitoshvatthaparnavat
Jagama kashyapam daityah pariprashtum mahaujasam
61.65
प्रह्लाद उवाच
त्वं वै धर्मस्य विज्ञाता दैवस्येहासुरस्य च
ब्राह्मणस्य महाप्राज्ञ धर्मकृच्छ्रमिदं शृणु
Prahlada uvacha
Tvam vai dharmasya vigyata daivasyehasurasya cha
Brahmanasya mahapragya dharmakrichchhramidam shrinu
61.66
यो वै प्रश्नं न विब्रूयाद्वितथं वापि निर्दिशेत्
के वै तस्य परे लोकास्तन्ममाचक्ष्व पृच्छतः
Yo vai prashnam na vibruyadvitatham vapi nirdishet
Ke vai tasya pare lokastanmamachakshva prichchhatah
61.67
कश्यप उवाच
जानन्न विब्रुवन्प्रश्नं कामात्क्रोधात्तथा भयात्
सहस्रं वारुणान्पाशानात्मनि प्रतिमुञ्चति
Kashyapa uvacha
Jananna vibruvanprashnam kamatkrodhattatha bhayat
Sahasram varunanpashanatmani pratimunchati
61.68
तस्य संवत्सरे पूर्णे पाश एकः प्रमुच्यते
तस्मात्सत्यं तु वक्तव्यं जानता सत्यमञ्जसा
Tasya sanvatsare purne pasha ekah pramuchyate
Tasmatsatyam tu vaktavyam janata satyamanjasa
61.69
विद्धो धर्मो ह्यधर्मेण सभां यत्र प्रपद्यते
न चास्य शल्यं कृन्तन्ति विद्धास्तत्र सभासदः
Viddho dharmo hyadharmena sabham yatra prapadyate
Na chasya shalyam krintanti viddhastatra sabhasadah
61.70
अर्धं हरति वै श्रेष्ठः पादो भवति कर्तृषु
पादश्चैव सभासत्सु ये न निन्दन्ति निन्दितम्
Ardham harati vai shreshthah pado bhavati kartrishu
Padashchaiva sabhasatsu ye na nindanti ninditam
61.71
अनेना भवति श्रेष्ठो मुच्यन्ते च सभासदः
एनो गच्छति कर्तारं निन्दार्हो यत्र निन्द्यते
Anena bhavati shreshtho muchyante cha sabhasadah
Eno gachchhati kartaram nindarho yatra nindyate
61.72
वितथं तु वदेयुर्ये धर्मं प्रह्लाद पृच्छते
इष्टापूर्तं च ते घ्नन्ति सप्त चैव परावरान्
Vitatham tu vadeyurye dharmam prahlada prichchhate
Ishtapurtam cha te ghnanti sapta chaiva paravaran
61.73
हृतस्वस्य हि यद्दुःखं हतपुत्रस्य चापि यत्
ऋणिनं प्रति यच्चैव राज्ञा ग्रस्तस्य चापि यत्
Hritasvasya hi yadduhkham hataputrasya chapi yat
Rininam prati yachchaiva ragya grastasya chapi yat
61.74
स्त्रियाः पत्या विहीनायाः सार्थाद्भ्रष्टस्य चैव यत्
अध्यूढायाश्च यद्दुःखं साक्षिभिर्विहतस्य च
Striyah patya vihinayah sarthadbhrashtasya chaiva yat
Adhyudhayashcha yadduhkham sakshibhirvihatasya cha
61.75
एतानि वै समान्याहुर्दुःखानि त्रिदशेश्वराः
तानि सर्वाणि दुःखानि प्राप्नोति वितथं ब्रुवन्
Etani vai samanyahurduhkhani tridasheshvarah
Tani sarvani duhkhani prapnoti vitatham bruvan
61.76
समक्षदर्शनात्साक्ष्यं श्रवणाच्चेति धारणात्
तस्मात्सत्यं ब्रुवन्साक्षी धर्मार्थाभ्यां न हीयते
Samakshadarshanatsakshyam shravanachcheti dharanat
Tasmatsatyam bruvansakshi dharmarthabhyam na hiyate
61.77
विदुर उवाच
कश्यपस्य वचः श्रुत्वा प्रह्लादः पुत्रमब्रवीत्
श्रेयान्सुधन्वा त्वत्तो वै मत्तः श्रेयांस्तथाङ्गिराः
Vidura uvacha
Kashyapasya vachah shrutva prahladah putramabravit
Shreyansudhanva tvatto vai mattah shreyanstathangirah
61.78
माता सुधन्वनश्चापि श्रेयसी मातृतस्तव
विरोचन सुधन्वायं प्राणानामीश्वरस्तव
Mata sudhanvanashchapi shreyasi matritastava
Virochana sudhanvayam prananamishvarastava
61.79
सुधन्वोवाच
पुत्रस्नेहं परित्यज्य यस्त्वं धर्मे प्रतिष्ठितः
अनुजानामि ते पुत्रं जीवत्वेष शतं समाः
Sudhanvovacha
Putrasneham parityajya yastvam dharme pratishthitah
Anujanami te putram jivatvesha shatam samah
61.80
विदुर उवाच
एवं वै परमं धर्मं श्रुत्वा सर्वे सभासदः
यथाप्रश्नं तु कृष्णाया मन्यध्वं तत्र किं परम्
Vidura uvacha
Evam vai paramam dharmam shrutva sarve sabhasadah
Yathaprashnam tu krishnaya manyadhvam tatra kim param
61.81
वैशंपायन उवाच
विदुरस्य वचः श्रुत्वा नोचुः किंचन पार्थिवाः
कर्णो दुःशासनं त्वाह कृष्णां दासीं गृहान्नय
Vaishampayana uvacha
Vidurasya vachah shrutva nochuh kinchana parthivah
Karno duhshasanam tvaha krishnam dasim grihannaya
61.82
तां वेपमानां सव्रीडां प्रलपन्तीं स्म पाण्डवान्
दुःशासनः सभामध्ये विचकर्ष तपस्विनीम्
Tam vepamanam savridam pralapantim sma pandavan
Duhshasanah sabhamadhye vichakarsha tapasvinim