UtshovChapter 67
67.1
वैशंपायन उवाच
ततो व्यध्वगतं पार्थं प्रातिकामी युधिष्ठिरम्
उवाच वचनाद्राज्ञो धृतराष्ट्रस्य धीमतः
Vaishampayana uvacha
Tato vyadhvagatam partham pratikami yudhishthiram
Uvacha vachanadragyo dhritarashtrasya dhimatah
67.2
उपस्तीर्णा सभा राजन्नक्षानुप्त्वा युधिष्ठिर
एहि पाण्डव दीव्येति पिता त्वामाह भारत
Upastirna sabha rajannakshanuptva yudhishthira
Ehi pandava divyeti pita tvamaha bharata
67.3
युधिष्ठिर उवाच
धातुर्नियोगाद्भूतानि प्राप्नुवन्ति शुभाशुभम्
न निवृत्तिस्तयोरस्ति देवितव्यं पुनर्यदि
Yudhishthira uvacha
Dhaturniyogadbhutani prapnuvanti shubhashubham
Na nivrittistayorasti devitavyam punaryadi
67.4
अक्षद्यूते समाह्वानं नियोगात्स्थविरस्य च
जानन्नपि क्षयकरं नातिक्रमितुमुत्सहे
Akshadyute samahvanam niyogatsthavirasya cha
Janannapi kshayakaram natikramitumutsahe
67.5
वैशंपायन उवाच
इति ब्रुवन्निववृते भ्रातृभिः सह पाण्डवः
जानंश्च शकुनेर्मायां पार्थो द्यूतमियात्पुनः
Vaishampayana uvacha
Iti bruvannivavrite bhratribhih saha pandavah
Jananshcha shakunermayam partho dyutamiyatpunah
67.6
विविशुस्ते सभां तां तु पुनरेव महारथाः
व्यथयन्ति स्म चेतांसि सुहृदां भरतर्षभाः
Vivishuste sabham tam tu punareva maharathah
Vyathayanti sma chetansi suhridam bharatarshabhah
67.7
यथोपजोषमासीनाः पुनर्द्यूतप्रवृत्तये
सर्वलोकविनाशाय दैवेनोपनिपीडिताः
Yathopajoshamasinah punardyutapravrittaye
Sarvalokavinashaya daivenopanipiditah
67.8
शकुनिरुवाच
अमुञ्चत्स्थविरो यद्वो धनं पूजितमेव तत्
महाधनं ग्लहं त्वेकं शृणु मे भरतर्षभ
Shakuniruvacha
Amunchatsthaviro yadvo dhanam pujitameva tat
Mahadhanam glaham tvekam shrinu me bharatarshabha
67.9
वयं द्वादश वर्षाणि युष्माभिर्द्यूतनिर्जिताः
प्रविशेम महारण्यं रौरवाजिनवाससः
Vayam dvadasha varshani yushmabhirdyutanirjitah
Pravishema maharanyam rauravajinavasasah
67.10
त्रयोदशं च सजने अज्ञाताः परिवत्सरम्
ज्ञाताश्च पुनरन्यानि वने वर्षाणि द्वादश
Trayodasham cha sajane agyatah parivatsaram
Gyatashcha punaranyani vane varshani dvadasha
67.11
अस्माभिर्वा जिता यूयं वने वर्षाणि द्वादश
वसध्वं कृष्णया सार्धमजिनैः प्रतिवासिताः
Asmabhirva jita yuyam vane varshani dvadasha
Vasadhvam krishnaya sardhamajinaih prativasitah
67.12
त्रयोदशे च निर्वृत्ते पुनरेव यथोचितम्
स्वराज्यं प्रतिपत्तव्यमितरैरथ वेतरैः
Trayodashe cha nirvritte punareva yathochitam
Svarajyam pratipattavyamitarairatha vetaraih
67.13
अनेन व्यवसायेन सहास्माभिर्युधिष्ठिर
अक्षानुप्त्वा पुनर्द्यूतमेहि दीव्यस्व भारत
Anena vyavasayena sahasmabhiryudhishthira
Akshanuptva punardyutamehi divyasva bharata
67.14
सभासद ऊचुः
अहो धिग्बान्धवा नैनं बोधयन्ति महद्भयम्
बुद्ध्या बोध्यं न बुध्यन्ते स्वयं च भरतर्षभाः
Sabhasada uchuh
Aho dhigbandhava nainam bodhayanti mahadbhayam
Buddhya bodhyam na budhyante svayam cha bharatarshabhah
67.15
वैशंपायन उवाच
जनप्रवादान्सुबहूनिति शृण्वन्नराधिपः
ह्रिया च धर्मसङ्गाच्च पार्थो द्यूतमियात्पुनः
Vaishampayana uvacha
Janapravadansubahuniti shrinvannaradhipah
Hriya cha dharmasangachcha partho dyutamiyatpunah
67.16
जानन्नपि महाबुद्धिः पुनर्द्यूतमवर्तयत्
अप्ययं न विनाशः स्यात्कुरूणामिति चिन्तयन्
Janannapi mahabuddhih punardyutamavartayat
Apyayam na vinashah syatkurunamiti chintayan
67.17
युधिष्ठिर उवाच
कथं वै मद्विधो राजा स्वधर्ममनुपालयन्
आहूतो विनिवर्तेत दीव्यामि शकुने त्वया
Yudhishthira uvacha
Katham vai madvidho raja svadharmamanupalayan
Ahuto vinivarteta divyami shakune tvaya
67.18
शकुनिरुवाच
गवाश्वं बहुधेनूकमपर्यन्तमजाविकम्
गजाः कोशो हिरण्यं च दासीदासं च सर्वशः
Shakuniruvacha
Gavashvam bahudhenukamaparyantamajavikam
Gajah kosho hiranyam cha dasidasam cha sarvashah
67.19
एष नो ग्लह एवैको वनवासाय पाण्डवाः
यूयं वयं वा विजिता वसेम वनमाश्रिताः
Esha no glaha evaiko vanavasaya pandavah
Yuyam vayam va vijita vasema vanamashritah
67.20
अनेन व्यवसायेन दीव्याम भरतर्षभ
समुत्क्षेपेण चैकेन वनवासाय भारत
Anena vyavasayena divyama bharatarshabha
Samutkshepena chaikena vanavasaya bharata
67.21
वैशंपायन उवाच
प्रतिजग्राह तं पार्थो ग्लहं जग्राह सौबलः
जितमित्येव शकुनिर्युधिष्ठिरमभाषत
Vaishampayana uvacha
Pratijagraha tam partho glaham jagraha saubalah
Jitamityeva shakuniryudhishthiramabhashata