অধ্যায় 57

57.1

দুর্যোধন উবাচ
পরেষামেব যশসা শ্লাঘসে ত্বং; সদা ছন্নঃ কুত্সয়ন্ধার্তরাষ্ট্রান্
জানীমস্ত্বাং বিদুর যত্প্রিয়স্ত্বং; বালানিবাস্মানবমন্যসে ত্বম্

সুবিজ্ঞেয়ঃ পুরুষোঽন্যত্রকামো; নিন্দাপ্রশংসে হি তথা যুনক্তি
জিহ্বা মনস্তে হৃদয়ং নির্ব্যনক্তি; জ্যায়ো নিরাহ মনসঃ প্রাতিকূল্যম্

উত্সঙ্গেন ব্যাল ইবাহৃতোঽসি; মার্জারবত্পোষকং চোপহংসি
ভর্তৃঘ্নত্বান্ন হি পাপীয় আহু;স্তস্মাত্ক্ষত্তঃ কিং ন বিভেষি পাপাৎ

জিত্বা শত্রূন্ফলমাপ্তং মহন্নো; মাস্মান্ক্ষত্তঃ পরুষাণীহ বোচঃ
দ্বিষদ্ভিস্ত্বং সংপ্রয়োগাভিনন্দী; মুহুর্দ্বেষং যাসি নঃ সংপ্রমোহাৎ

অমিত্রতাং যাতি নরোঽক্ষমং ব্রুব;ন্নিগূহতে গুহ্যমমিত্রসংস্তবে
তদাশ্রিতাপত্রপা কিং ন বাধতে; যদিচ্ছসি ত্বং তদিহাদ্য ভাষসে

মা নোঽবমংস্থা বিদ্ম মনস্তবেদং; শিক্ষস্ব বুদ্ধিং স্থবিরাণাং সকাশাৎ
যশো রক্ষস্ব বিদুর সংপ্রণীতং; মা ব্যাপৃতঃ পরকার্যেষু ভূস্ত্বম্

অহং কর্তেতি বিদুর মাবমংস্থা; মা নো নিত্যং পরুষাণীহ বোচঃ
ন ত্বাং পৃচ্ছামি বিদুর যদ্ধিতং মে; স্বস্তি ক্ষত্তর্মা তিতিক্ষূন্ক্ষিণু ত্বম্

একঃ শাস্তা ন দ্বিতীয়োঽস্তি শাস্তা; গর্ভে শয়ানং পুরুষং শাস্তি শাস্তা
তেনানুশিষ্টঃ প্রবণাদিবাম্ভো; যথা নিয়ুক্তোঽস্মি তথা বহামি

ভিনত্তি শিরসা শৈলমহিং ভোজয়তে চ যঃ
স এব তস্য কুরুতে কার্যাণামনুশাসনম্

যো বলাদনুশাস্তীহ সোঽমিত্রং তেন বিন্দতি
মিত্রতামনুবৃত্তং তু সমুপেক্ষেত পণ্ডিতঃ

প্রদীপ্য যঃ প্রদীপ্তাগ্নিং প্রাক্ত্বরন্নাভিধাবতি
ভস্মাপি ন স বিন্দেত শিষ্টং ক্বচন ভারত

ন বাসয়েত্পারবর্গ্যং দ্বিষন্তং; বিশেষতঃ ক্ষত্তরহিতং মনুষ্যম্
স যত্রেচ্ছসি বিদুর তত্র গচ্ছ; সুসান্ত্বিতাপি হ্যসতী স্ত্রী জহাতি

বিদুর উবাচ
এতাবতা যে পুরুষং ত্যজন্তি; তেষাং সখ্যমন্তবদ্ব্রূহি রাজন্
রাজ্ঞাং হি চিত্তানি পরিপ্লুতানি; সান্ত্বং দত্ত্বা মুসলৈর্ঘাতয়ন্তি

অবালস্ত্বং মন্যসে রাজপুত্র; বালোঽহমিত্যেব সুমন্দবুদ্ধে
যঃ সৌহৃদে পুরুষং স্থাপয়িত্বা; পশ্চাদেনং দূষয়তে স বালঃ

ন শ্রেয়সে নীয়তে মন্দবুদ্ধিঃ; স্ত্রী শ্রোত্রিয়স্যেব গৃহে প্রদুষ্টা
ধ্রুবং ন রোচেদ্ভরতর্ষভস্য; পতিঃ কুমার্যা ইব ষষ্টিবর্ষঃ

অনুপ্রিয়ং চেদনুকাঙ্ক্ষসে ত্বং; সর্বেষু কার্যেষু হিতাহিতেষু
স্ত্রিয়শ্চ রাজঞ্জডপঙ্গুকাংশ্চ; পৃচ্ছ ত্বং বৈ তাদৃশাংশ্চৈব মূঢান্

লভ্যঃ খলু প্রাতিপীয় নরোঽনুপ্রিয়বাগিহ
অপ্রিয়স্য তু পথ্যস্য বক্তা শ্রোতা চ দুর্লভঃ

যস্তু ধর্মে পরাশ্বস্য হিত্বা ভর্তুঃ প্রিয়াপ্রিয়ে
অপ্রিয়াণ্যাহ পথ্যানি তেন রাজা সহায়বান্

অব্যাধিজং কটুকং তীক্ষ্ণমুষ্ণং; যশোমুষং পরুষং পূতিগন্ধি
সতাং পেয়ং যন্ন পিবন্ত্যসন্তো; মন্যুং মহারাজ পিব প্রশাম্য

বৈচিত্রবীর্যস্য যশো ধনং চ; বাঞ্ছাম্যহং সহপুত্রস্য শশ্বৎ
যথা তথা বোঽস্তু নমশ্চ বোঽস্তু; মমাপি চ স্বস্তি দিশন্তু বিপ্রাঃ

আশীবিষান্নেত্রবিষান্কোপয়েন্ন তু পণ্ডিতঃ
এবং তেঽহং বদামীদং প্রয়তঃ কুরুনন্দন