অধ্যায় 56

56.1

বিদুর উবাচ
দ্যূতং মূলং কলহস্যানুপাতি; মিথোভেদায় মহতে বা রণায়
যদাস্থিতোঽয়ং ধৃতরাষ্ট্রস্য পুত্রো; দুর্যোধনঃ সৃজতে বৈরমুগ্রম্

প্রাতিপীয়াঃ শাংতনবা ভৈমসেনাঃ সবাহ্লিকাঃ
দুর্যোধনাপরাধেন কৃচ্ছ্রং প্রাপ্স্যন্তি সর্বশঃ

দুর্যোধনো মদেনৈব ক্ষেমং রাষ্ট্রাদপোহতি
বিষাণং গৌরিব মদাত্স্বয়মারুজতে বলাৎ

যশ্চিত্তমন্বেতি পরস্য রাজ;ন্বীরঃ কবিঃ স্বামতিপত্য দৃষ্টিম্
নাবং সমুদ্র ইব বালনেত্রা;মারুহ্য ঘোরে ব্যসনে নিমজ্জেৎ

দুর্যোধনো গ্লহতে পাণ্ডবেন; প্রিয়ায়সে ত্বং জয়তীতি তচ্চ
অতিনর্মাজ্জায়তে সংপ্রহারো; যতো বিনাশঃ সমুপৈতি পুংসাম্

আকর্ষস্তেঽবাক্ফলঃ কুপ্রণীতো; হৃদি প্রৌঢো মন্ত্রপদঃ সমাধিঃ
যুধিষ্ঠিরেণ সফলঃ সংস্তবোঽস্তু; সাম্নঃ সুরিক্তোঽরিমতেঃ সুধন্বা

প্রাতিপীয়াঃ শাংতনবাশ্চ রাজ;ন্কাব্যাং বাচং শৃণুত মাত্যগাদ্বঃ
বৈশ্বানরং প্রজ্বলিতং সুঘোর;ময়ুদ্ধেন প্রশময়তোত্পতন্তম্

যদা মন্যুং পাণ্ডবোঽজাতশত্রু;র্ন সংয়চ্ছেদক্ষময়াভিভূতঃ
বৃকোদরঃ সব্যসাচী যমৌ চ; কোঽত্র দ্বীপঃ স্যাত্তুমুলে বস্তদানীম্

মহারাজ প্রভবস্ত্বং ধনানাং; পুরা দ্যূতান্মনসা যাবদিচ্ছেঃ
বহু বিত্তং পাণ্ডবাংশ্চেজ্জয়েস্ত্বং; কিং তেন স্যাদ্বসু বিন্দেহ পার্থান্

জানীমহে দেবিতং সৌবলস্য; বেদ দ্যূতে নিকৃতিং পার্বতীয়ঃ
যতঃ প্রাপ্তঃ শকুনিস্তত্র যাতু; মায়ায়োধী ভারত পার্বতীয়ঃ