UtshovChapter 56
56.1
विदुर उवाच
द्यूतं मूलं कलहस्यानुपाति; मिथोभेदाय महते वा रणाय
यदास्थितोऽयं धृतराष्ट्रस्य पुत्रो; दुर्योधनः सृजते वैरमुग्रम्
Vidura uvacha
Dyutam mulam kalahasyanupati; mithobhedaya mahate va ranaya
Yadasthitoyam dhritarashtrasya putro; duryodhanah srijate vairamugram
56.2
प्रातिपीयाः शांतनवा भैमसेनाः सबाह्लिकाः
दुर्योधनापराधेन कृच्छ्रं प्राप्स्यन्ति सर्वशः
Pratipiyah shantanava bhaimasenah sabahlikah
Duryodhanaparadhena krichchhram prapsyanti sarvashah
56.3
दुर्योधनो मदेनैव क्षेमं राष्ट्रादपोहति
विषाणं गौरिव मदात्स्वयमारुजते बलात्
Duryodhano madenaiva kshemam rashtradapohati
Vishanam gauriva madatsvayamarujate balat
56.4
यश्चित्तमन्वेति परस्य राज;न्वीरः कविः स्वामतिपत्य दृष्टिम्
नावं समुद्र इव बालनेत्रा;मारुह्य घोरे व्यसने निमज्जेत्
Yashchittamanveti parasya raja;nvirah kavih svamatipatya drishtim
Navam samudra iva balanetra;maruhya ghore vyasane nimajjet
56.5
दुर्योधनो ग्लहते पाण्डवेन; प्रियायसे त्वं जयतीति तच्च
अतिनर्माज्जायते संप्रहारो; यतो विनाशः समुपैति पुंसाम्
Duryodhano glahate pandavena; priyayase tvam jayatiti tachcha
Atinarmajjayate sampraharo; yato vinashah samupaiti punsam
56.6
आकर्षस्तेऽवाक्फलः कुप्रणीतो; हृदि प्रौढो मन्त्रपदः समाधिः
युधिष्ठिरेण सफलः संस्तवोऽस्तु; साम्नः सुरिक्तोऽरिमतेः सुधन्वा
Akarshastevakphalah kupranito; hridi praudho mantrapadah samadhih
Yudhishthirena saphalah sanstavostu; samnah suriktorimateh sudhanva
56.7
प्रातिपीयाः शांतनवाश्च राज;न्काव्यां वाचं शृणुत मात्यगाद्वः
वैश्वानरं प्रज्वलितं सुघोर;मयुद्धेन प्रशमयतोत्पतन्तम्
Pratipiyah shantanavashcha raja;nkavyam vacham shrinuta matyagadvah
Vaishvanaram prajvalitam sughora;mayuddhena prashamayatotpatantam
56.8
यदा मन्युं पाण्डवोऽजातशत्रु;र्न संयच्छेदक्षमयाभिभूतः
वृकोदरः सव्यसाची यमौ च; कोऽत्र द्वीपः स्यात्तुमुले वस्तदानीम्
Yada manyum pandavojatashatru;rna sanyachchhedakshamayabhibhutah
Vrikodarah savyasachi yamau cha; kotra dvipah syattumule vastadanim
56.9
महाराज प्रभवस्त्वं धनानां; पुरा द्यूतान्मनसा यावदिच्छेः
बहु वित्तं पाण्डवांश्चेज्जयेस्त्वं; किं तेन स्याद्वसु विन्देह पार्थान्
Maharaja prabhavastvam dhananam; pura dyutanmanasa yavadichchheh
Bahu vittam pandavanshchejjayestvam; kim tena syadvasu vindeha parthan
56.10
जानीमहे देवितं सौबलस्य; वेद द्यूते निकृतिं पार्वतीयः
यतः प्राप्तः शकुनिस्तत्र यातु; मायायोधी भारत पार्वतीयः
Janimahe devitam saubalasya; veda dyute nikritim parvatiyah
Yatah praptah shakunistatra yatu; mayayodhi bharata parvatiyah