অধ্যায় 55

55.1

বিদুর উবাচ
মহারাজ বিজানীহি যত্ত্বাং বক্ষ্যামি তচ্ছৃণু
মুমূর্ষোরৌষধমিব ন রোচেতাপি তে শ্রুতম্

যদ্বৈ পুরা জাতমাত্রো রুরাব; গোমায়ুবদ্বিস্বরং পাপচেতাঃ
দুর্যোধনো ভারতানাং কুলঘ্নঃ; সোঽয়ং যুক্তো ভবিতা কালহেতুঃ

গৃহে বসন্তং গোমায়ুং ত্বং বৈ মত্বা ন বুধ্যসে
দুর্যোধনস্য রূপেণ শৃণু কাব্যাং গিরং মম

মধু বৈ মাধ্বিকো লব্ধ্বা প্রপাতং নাববুধ্যতে
আরুহ্য তং মজ্জতি বা পতনং বাধিগচ্ছতি

সোঽয়ং মত্তোঽক্ষদেবেন মধুবন্ন পরীক্ষতে
প্রপাতং বুধ্যতে নৈব বৈরং কৃত্বা মহারথৈঃ

বিদিতং তে মহারাজ রাজস্বেবাসমঞ্জসম্
অন্ধকা যাদবা ভোজাঃ সমেতাঃ কংসমত্যজন্

নিয়োগাচ্চ হতে তস্মিন্কৃষ্ণেনামিত্রঘাতিনা
এবং তে জ্ঞাতয়ঃ সর্বে মোদমানাঃ শতং সমাঃ

ত্বন্নিয়ুক্তঃ সব্যসাচী নিগৃহ্ণাতু সুয়োধনম্
নিগ্রহাদস্য পাপস্য মোদন্তাং কুরবঃ সুখম্

কাকেনেমাংশ্চিত্রবর্হাঞ্শার্দূলান্ক্রোষ্টুকেন চ
ক্রীণীষ্ব পাণ্ডবান্রাজন্মা মজ্জীঃ শোকসাগরে

ত্যজেত্কুলার্থে পুরুষং গ্রামস্যার্থে কুলং ত্যজেৎ
গ্রামং জনপদস্যার্থে আত্মার্থে পৃথিবীং ত্যজেৎ

সর্বজ্ঞঃ সর্বভাবজ্ঞঃ সর্বশত্রুভয়ংকরঃ
ইতি স্ম ভাষতে কাব্যো জম্ভত্যাগে মহাসুরান্

হিরণ্যষ্ঠীবিনঃ কশ্চিত্পক্ষিণো বনগোচরান্
গৃহে কিল কৃতাবাসাঁল্লোভাদ্রাজন্নপীডয়ৎ

সদোপভোজ্যাঁল্লোভান্ধো হিরণ্যার্থে পরংতপ
আয়তিং চ তদাত্বং চ উভে সদ্যো ব্যনাশয়ৎ

তদাত্বকামঃ পাণ্ডূংস্ত্বং মা দ্রুহো ভরতর্ষভ
মোহাত্মা তপ্যসে পশ্চাত্পক্ষিহা পুরুষো যথা

জাতং জাতং পাণ্ডবেভ্যঃ পুষ্পমাদত্স্ব ভারত
মালাকার ইবারামে স্নেহং কুর্বন্পুনঃ পুনঃ

বৃক্ষানঙ্গারকারীব মৈনান্ধাক্ষীঃ সমূলকান্
মা গমঃ সসুতামাত্যঃ সবলশ্চ পরাভবম্

সমবেতান্হি কঃ পার্থান্প্রতিয়ুধ্যেত ভারত
মরুদ্ভিঃ সহিতো রাজন্নপি সাক্ষান্মরুত্পতিঃ