Utshovঅধ্যায় 3
3.1
বৈশংপায়ন উবাচ
স্থিতে মুহূর্তং পার্থে তু ধর্মরাজে যুধিষ্ঠিরে
আজগ্মুস্তত্র কৌরব্য দেবাঃ শক্রপুরোগমাঃ
3.2
স্বয়ং বিগ্রহবান্ধর্মো রাজানং প্রসমীক্ষিতুম্
তত্রাজগাম যত্রাসৌ কুরুরাজো যুধিষ্ঠিরঃ
3.3
তেষু ভাস্বরদেহেষু পুণ্যাভিজনকর্মসু
সমাগতেষু দেবেষু ব্যগমত্তত্তমো নৃপ
3.4
নাদৃশ্যন্ত চ তাস্তত্র যাতনাঃ পাপকর্মিণাম্
নদী বৈতরণী চৈব কূটশাল্মলিনা সহ
3.5
লোহকুম্ভ্যঃ শিলাশ্চৈব নাদৃশ্যন্ত ভয়ানকাঃ
বিকৃতানি শরীরাণি যানি তত্র সমন্ততঃ
দদর্শ রাজা কৌন্তেয়স্তান্যদৃশ্যানি চাভবন্
3.6
ততো বায়ুঃ সুখস্পর্শঃ পুণ্যগন্ধবহঃ শিবঃ
ববৌ দেবসমীপস্থঃ শীতলোঽতীব ভারত
3.7
মরুতঃ সহ শক্রেণ বসবশ্চাশ্বিনৌ সহ
সাধ্যা রুদ্রাস্তথাদিত্যা যে চান্যেঽপি দিবৌকসঃ
3.8
সর্বে তত্র সমাজগ্মুঃ সিদ্ধাশ্চ পরমর্ষয়ঃ
যত্র রাজা মহাতেজা ধর্মপুত্রঃ স্থিতোঽভবৎ
3.9
ততঃ শক্রঃ সুরপতিঃ শ্রিয়া পরময়া যুতঃ
যুধিষ্ঠিরমুবাচেদং সান্ত্বপূর্বমিদং বচঃ
3.10
যুধিষ্ঠির মহাবাহো প্রীতা দেবগণাস্তব
এহ্যেহি পুরুষব্যাঘ্র কৃতমেতাবতা বিভো
সিদ্ধিঃ প্রাপ্তা ত্বয়া রাজঁল্লোকাশ্চাপ্যক্ষয়াস্তব
3.11
ন চ মন্যুস্ত্বয়া কার্যঃ শৃণু চেদং বচো মম
অবশ্যং নরকস্তাত দ্রষ্টব্যঃ সর্বরাজভিঃ
3.12
শুভানামশুভানাং চ দ্বৌ রাশী পুরুষর্ষভ
যঃ পূর্বং সুকৃতং ভুঙ্ক্তে পশ্চান্নিরয়মেতি সঃ
পূর্বং নরকভাগ্যস্তু পশ্চাত্স্বর্গমুপৈতি সঃ
3.13
ভূয়িষ্ঠং পাপকর্মা যঃ স পূর্বং স্বর্গমশ্নুতে
তেন ত্বমেবং গমিতো ময়া শ্রেয়োর্থিনা নৃপ
3.14
ব্যাজেন হি ত্বয়া দ্রোণ উপচীর্ণঃ সুতং প্রতি
ব্যাজেনৈব ততো রাজন্দর্শিতো নরকস্তব
3.15
যথৈব ত্বং তথা ভীমস্তথা পার্থো যমৌ তথা
দ্রৌপদী চ তথা কৃষ্ণা ব্যাজেন নরকং গতাঃ
3.16
আগচ্ছ নরশার্দূল মুক্তাস্তে চৈব কিল্বিষাৎ
স্বপক্ষাশ্চৈব যে তুভ্যং পার্থিবা নিহতা রণে
সর্বে স্বর্গমনুপ্রাপ্তাস্তান্পশ্য পুরুষর্ষভ
3.17
কর্ণশ্চৈব মহেষ্বাসঃ সর্বশস্ত্রভৃতাং বরঃ
স গতঃ পরমাং সিদ্ধিং যদর্থং পরিতপ্যসে
3.18
তং পশ্য পুরুষব্যাঘ্রমাদিত্যতনয়ং বিভো
স্বস্থানস্থং মহাবাহো জহি শোকং নরর্ষভ
3.19
ভ্রাতৄংশ্চান্যাংস্তথা পশ্য স্বপক্ষাংশ্চৈব পার্থিবান্
স্বং স্বং স্থানমনুপ্রাপ্তান্ব্যেতু তে মানসো জ্বরঃ
3.20
অনুভূয় পূর্বং ত্বং কৃচ্ছ্রমিতঃ প্রভৃতি কৌরব
বিহরস্ব ময়া সার্ধং গতশোকো নিরাময়ঃ
3.21
কর্মণাং তাত পুণ্যানাং জিতানাং তপসা স্বয়ম্
দানানাং চ মহাবাহো ফলং প্রাপ্নুহি পাণ্ডব
3.22
অদ্য ত্বাং দেবগন্ধর্বা দিব্যাশ্চাপ্সরসো দিবি
উপসেবন্তু কল্যাণং বিরজোম্বরবাসসঃ
3.23
রাজসূয়জিতাঁল্লোকানশ্বমেধাভিবর্ধিতান্
প্রাপ্নুহি ত্বং মহাবাহো তপসশ্চ ফলং মহৎ
3.24
উপর্যুপরি রাজ্ঞাং হি তব লোকা যুধিষ্ঠির
হরিশ্চন্দ্রসমাঃ পার্থ যেষু ত্বং বিহরিষ্যসি
3.25
মান্ধাতা যত্র রাজর্ষির্যত্র রাজা ভগীরথঃ
দৌঃষন্তির্যত্র ভরতস্তত্র ত্বং বিহরিষ্যসি
3.26
এষা দেবনদী পুণ্যা পার্থ ত্রৈলোক্যপাবনী
আকাশগঙ্গা রাজেন্দ্র তত্রাপ্লুত্য গমিষ্যসি
3.27
অত্র স্নাতস্য তে ভাবো মানুষো বিগমিষ্যতি
গতশোকো নিরায়াসো মুক্তবৈরো ভবিষ্যসি
3.28
এবং ব্রুবতি দেবেন্দ্রে কৌরবেন্দ্রং যুধিষ্ঠিরম্
ধর্মো বিগ্রহবান্সাক্ষাদুবাচ সুতমাত্মনঃ
3.29
ভো ভো রাজন্মহাপ্রাজ্ঞ প্রীতোঽস্মি তব পুত্রক
মদ্ভক্ত্যা সত্যবাক্যেন ক্ষময়া চ দমেন চ
3.30
এষা তৃতীয়া জিজ্ঞাসা তব রাজন্কৃতা ময়া
ন শক্যসে চালয়িতুং স্বভাবাত্পার্থ হেতুভিঃ
3.31
পূর্বং পরীক্ষিতো হি ত্বমাসীর্দ্বৈতবনং প্রতি
অরণীসহিতস্যার্থে তচ্চ নিস্তীর্ণবানসি
3.32
সোদর্যেষু বিনষ্টেষু দ্রৌপদ্যাং তত্র ভারত
শ্বরূপধারিণা পুত্র পুনস্ত্বং মে পরীক্ষিতঃ
3.33
ইদং তৃতীয়ং ভ্রাতৄণামর্থে যত্স্থাতুমিচ্ছসি
বিশুদ্ধোঽসি মহাভাগ সুখী বিগতকল্মষঃ
3.34
ন চ তে ভ্রাতরঃ পার্থ নরকস্থা বিশাং পতে
মায়ৈষা দেবরাজেন মহেন্দ্রেণ প্রয়োজিতা
3.35
অবশ্যং নরকস্তাত দ্রষ্টব্যঃ সর্বরাজভিঃ
ততস্ত্বয়া প্রাপ্তমিদং মুহূর্তং দুঃখমুত্তমম্
3.36
ন সব্যসাচী ভীমো বা যমৌ বা পুরুষর্ষভৌ
কর্ণো বা সত্যবাক্শূরো নরকার্হাশ্চিরং নৃপ
3.37
ন কৃষ্ণা রাজপুত্রী চ নরকার্হা যুধিষ্ঠির
এহ্যেহি ভরতশ্রেষ্ঠ পশ্য গঙ্গাং ত্রিলোকগাম্
3.38
এবমুক্তঃ স রাজর্ষিস্তব পূর্বপিতামহঃ
জগাম সহ ধর্মেণ সর্বৈশ্চ ত্রিদশালয়ৈঃ
3.39
গঙ্গাং দেবনদীং পুণ্যাং পাবনীমৃষিসংস্তুতাম্
অবগাহ্য তু তাং রাজা তনুং তত্যাজ মানুষীম্
3.40
ততো দিব্যবপুর্ভূত্বা ধর্মরাজো যুধিষ্ঠিরঃ
নির্বৈরো গতসংতাপো জলে তস্মিন্সমাপ্লুতঃ
3.41
ততো যয়ৌ বৃতো দেবৈঃ কুরুরাজো যুধিষ্ঠিরঃ
ধর্মেণ সহিতো ধীমান্স্তূয়মানো মহর্ষিভিঃ