অধ্যায় 4

4.1

বৈশংপায়ন উবাচ
ততো যুধিষ্ঠিরো রাজা দেবৈঃ সর্ষিমরুদ্গণৈঃ
পূজ্যমানো যয়ৌ তত্র যত্র তে কুরুপুংগবাঃ

দদর্শ তত্র গোবিন্দং ব্রাহ্মেণ বপুষান্বিতম্
তেনৈব দৃষ্টপূর্বেণ সাদৃশ্যেনোপসূচিতম্

দীপ্যমানং স্ববপুষা দিব্যৈরস্ত্রৈরুপস্থিতম্
চক্রপ্রভৃতিভির্ঘোরৈর্দিব্যৈঃ পুরুষবিগ্রহৈঃ
উপাস্যমানং বীরেণ ফল্গুনেন সুবর্চসা

অপরস্মিন্নথোদ্দেশে কর্ণং শস্ত্রভৃতাং বরম্
দ্বাদশাদিত্যসহিতং দদর্শ কুরুনন্দনঃ

অথাপরস্মিন্নুদ্দেশে মরুদ্গণবৃতং প্রভুম্
ভীমসেনমথাপশ্যত্তেনৈব বপুষান্বিতম্

অশ্বিনোস্তু তথা স্থানে দীপ্যমানৌ স্বতেজসা
নকুলং সহদেবং চ দদর্শ কুরুনন্দনঃ

তথা দদর্শ পাঞ্চালীং কমলোত্পলমালিনীম্
বপুষা স্বর্গমাক্রম্য তিষ্ঠন্তীমর্কবর্চসম্

অথৈনাং সহসা রাজা প্রষ্টুমৈচ্ছদ্যুধিষ্ঠিরঃ
ততোঽস্য ভগবানিন্দ্রঃ কথয়ামাস দেবরাট্

শ্রীরেষা দ্রৌপদীরূপা ত্বদর্থে মানুষং গতা
অয়োনিজা লোককান্তা পুণ্যগন্ধা যুধিষ্ঠির

দ্রুপদস্য কুলে জাতা ভবদ্ভিশ্চোপজীবিতা
রত্যর্থং ভবতাং হ্যেষা নির্মিতা শূলপাণিনা

এতে পঞ্চ মহাভাগা গন্ধর্বাঃ পাবকপ্রভাঃ
দ্রৌপদ্যাস্তনয়া রাজন্যুষ্মাকমমিতৌজসঃ

পশ্য গন্ধর্বরাজানং ধৃতরাষ্ট্রং মনীষিণম্
এনং চ ত্বং বিজানীহি ভ্রাতরং পূর্বজং পিতুঃ

অয়ং তে পূর্বজো ভ্রাতা কৌন্তেয়ঃ পাবকদ্যুতিঃ
সূর্যপুত্রোঽগ্রজঃ শ্রেষ্ঠো রাধেয় ইতি বিশ্রুতঃ
আদিত্যসহিতো যাতি পশ্যৈনং পুরুষর্ষভ

সাধ্যানামথ দেবানাং বসূনাং মরুতামপি
গণেষু পশ্য রাজেন্দ্র বৃষ্ণ্যন্ধকমহারথান্
সাত্যকিপ্রমুখান্বীরান্ভোজাংশ্চৈব মহারথান্

সোমেন সহিতং পশ্য সৌভদ্রমপরাজিতম্
অভিমন্যুং মহেষ্বাসং নিশাকরসমদ্যুতিম্

এষ পাণ্ডুর্মহেষ্বাসঃ কুন্ত্যা মাদ্র্যা চ সংগতঃ
বিমানেন সদাভ্যেতি পিতা তব মমান্তিকম্

বসুভিঃ সহিতং পশ্য ভীষ্মং শাংতনবং নৃপম্
দ্রোণং বৃহস্পতেঃ পার্শ্বে গুরুমেনং নিশাময়

এতে চান্যে মহীপালা যোধাস্তব চ পাণ্ডব
গন্ধর্বৈঃ সহিতা যান্তি যক্ষৈঃ পুণ্যজনৈস্তথা

গুহ্যকানাং গতিং চাপি কেচিত্প্রাপ্তা নৃসত্তমাঃ
ত্যক্ত্বা দেহং জিতস্বর্গাঃ পুণ্যবাগ্বুদ্ধিকর্মভিঃ