Utshovঅধ্যায় 5
5.1
জনমেজয় উবাচ
ভীষ্মদ্রোণৌ মহাত্মানৌ ধৃতরাষ্ট্রশ্চ পার্থিবঃ
বিরাটদ্রুপদৌ চোভৌ শঙ্খশ্চৈবোত্তরস্তথা
5.2
ধৃষ্টকেতুর্জয়ত্সেনো রাজা চৈব স সত্যজিৎ
দুর্যোধনসুতাশ্চৈব শকুনিশ্চৈব সৌবলঃ
5.3
কর্ণপুত্রাশ্চ বিক্রান্তা রাজা চৈব জয়দ্রথঃ
ঘটোত্কচাদয়শ্চৈব যে চান্যে নানুকীর্তিতাঃ
5.4
যে চান্যে কীর্তিতাস্তত্র রাজানো দীপ্তমূর্তয়ঃ
স্বর্গে কালং কিয়ন্তং তে তস্থুস্তদপি শংস মে
5.5
আহোস্বিচ্ছাশ্বতং স্থানং তেষাং তত্র দ্বিজোত্তম
অন্তে বা কর্মণঃ কাং তে গতিং প্রাপ্তা নরর্ষভাঃ
এতদিচ্ছাম্যহং শ্রোতুং প্রোচ্যমানং ত্বয়া দ্বিজ
5.6
সূত উবাচ
ইত্যুক্তঃ স তু বিপ্রর্ষিরনুজ্ঞাতো মহাত্মনা
ব্যাসেন তস্য নৃপতেরাখ্যাতুমুপচক্রমে
5.7
বৈশংপায়ন উবাচ
গন্তব্যং কর্মণামন্তে সর্বেণ মনুজাধিপ
শৃণু গুহ্যমিদং রাজন্দেবানাং ভরতর্ষভ
যদুবাচ মহাতেজা দিব্যচক্ষুঃ প্রতাপবান্
5.8
মুনিঃ পুরাণঃ কৌরব্য পারাশর্যো মহাব্রতঃ
অগাধবুদ্ধিঃ সর্বজ্ঞো গতিজ্ঞঃ সর্বকর্মণাম্
5.9
বসূনেব মহাতেজা ভীষ্মঃ প্রাপ মহাদ্যুতিঃ
অষ্টাবেব হি দৃশ্যন্তে বসবো ভরতর্ষভ
5.10
বৃহস্পতিং বিবেশাথ দ্রোণো হ্যঙ্গিরসাং বরম্
কৃতবর্মা তু হার্দিক্যঃ প্রবিবেশ মরুদ্গণম্
5.11
সনত্কুমারং প্রদ্যুম্নঃ প্রবিবেশ যথাগতম্
ধৃতরাষ্ট্রো ধনেশস্য লোকান্প্রাপ দুরাসদান্
5.12
ধৃতরাষ্ট্রেণ সহিতা গান্ধারী চ যশস্বিনী
পত্নীভ্যাং সহিতঃ পাণ্ডুর্মহেন্দ্রসদনং যয়ৌ
5.13
বিরাটদ্রুপদৌ চোভৌ ধৃষ্টকেতুশ্চ পার্থিবঃ
নিশঠাক্রূরসাম্বাশ্চ ভানুঃ কম্পো বিডূরথঃ
5.14
ভূরিশ্রবাঃ শলশ্চৈব ভূরিশ্চ পৃথিবীপতিঃ
উগ্রসেনস্তথা কংসো বসুদেবশ্চ বীর্যবান্
5.15
উত্তরশ্চ সহ ভ্রাত্রা শঙ্খেন নরপুংগবঃ
বিশ্বেষাং দেবতানাং তে বিবিশুর্নরসত্তমাঃ
5.16
বর্চা নাম মহাতেজাঃ সোমপুত্রঃ প্রতাপবান্
সোঽভিমন্যুর্নৃসিংহস্য ফল্গুনস্য সুতোঽভবৎ
5.17
স যুদ্ধ্বা ক্ষত্রধর্মেণ যথা নান্যঃ পুমান্ক্বচিৎ
বিবেশ সোমং ধর্মাত্মা কর্মণোঽন্তে মহারথঃ
5.18
আবিবেশ রবিং কর্ণঃ পিতরং পুরুষর্ষভ
দ্বাপরং শকুনিঃ প্রাপ ধৃষ্টদ্যুম্নস্তু পাবকম্
5.19
ধৃতরাষ্ট্রাত্মজাঃ সর্বে যাতুধানা বলোত্কটাঃ
ঋদ্ধিমন্তো মহাত্মানঃ শস্ত্রপূতা দিবং গতাঃ
ধর্মমেবাবিশত্ক্ষত্তা রাজা চৈব যুধিষ্ঠিরঃ
5.20
অনন্তো ভগবান্দেবঃ প্রবিবেশ রসাতলম্
পিতামহনিয়োগাদ্ধি যো যোগাদ্গামধারয়ৎ
5.21
ষোডশস্ত্রীসহস্রাণি বাসুদেবপরিগ্রহঃ
ন্যমজ্জন্ত সরস্বত্যাং কালেন জনমেজয়
তাশ্চাপ্যপ্সরসো ভূত্বা বাসুদেবমুপাগমন্
5.22
হতাস্তস্মিন্মহায়ুদ্ধে যে বীরাস্তু মহারথাঃ
ঘটোত্কচাদয়ঃ সর্বে দেবান্যক্ষাংশ্চ ভেজিরে
5.23
দুর্যোধনসহায়াশ্চ রাক্ষসাঃ পরিকীর্তিতাঃ
প্রাপ্তাস্তে ক্রমশো রাজন্সর্বলোকাননুত্তমান্
5.24
ভবনং চ মহেন্দ্রস্য কুবেরস্য চ ধীমতঃ
বরুণস্য তথা লোকান্বিবিশুঃ পুরুষর্ষভাঃ
5.25
এতত্তে সর্বমাখ্যাতং বিস্তরেণ মহাদ্যুতে
কুরূণাং চরিতং কৃত্স্নং পাণ্ডবানাং চ ভারত
5.26
সূত উবাচ
এতচ্ছ্রুত্বা দ্বিজশ্রেষ্ঠাত্স রাজা জনমেজয়ঃ
বিস্মিতোঽভবদত্যর্থং যজ্ঞকর্মান্তরেষ্বথ
5.27
ততঃ সমাপয়ামাসুঃ কর্ম তত্তস্য যাজকাঃ
আস্তীকশ্চাভবত্প্রীতঃ পরিমোক্ষ্য ভুজংগমান্
5.28
ততো দ্বিজাতীন্সর্বাংস্তান্দক্ষিণাভিরতোষয়ৎ
পূজিতাশ্চাপি তে রাজ্ঞা ততো জগ্মুর্যথাগতম্
5.29
বিসর্জয়িত্বা বিপ্রাংস্তান্রাজাপি জনমেজয়ঃ
ততস্তক্ষশিলায়াঃ স পুনরায়াদ্গজাহ্বয়ম্
5.30
এতত্তে সর্বমাখ্যাতং বৈশংপায়নকীর্তিতম্
ব্যাসাজ্ঞয়া সমাখ্যাতং সর্পসত্রে নৃপস্য হ
5.31
পুণ্যোঽয়মিতিহাসাখ্যঃ পবিত্রং চেদমুত্তমম্
কৃষ্ণেন মুনিনা বিপ্র নিয়তং সত্যবাদিনা
5.32
সর্বজ্ঞেন বিধিজ্ঞেন ধর্মজ্ঞানবতা সতা
অতীন্দ্রিয়েণ শুচিনা তপসা ভাবিতাত্মনা
5.33
ঐশ্বর্যে বর্ততা চৈব সাংখ্যয়োগবিদা তথা
নৈকতন্ত্রবিবুদ্ধেন দৃষ্ট্বা দিব্যেন চক্ষুষা
5.34
কীর্তিং প্রথয়তা লোকে পাণ্ডবানাং মহাত্মনাম্
অন্যেষাং ক্ষত্রিয়াণাং চ ভূরিদ্রবিণতেজসাম্
5.35
য ইদং শ্রাবয়েদ্বিদ্বান্সদা পর্বণি পর্বণি
ধূতপাপ্মা জিতস্বর্গো ব্রহ্মভূয়ায় গচ্ছতি
5.36
যশ্চেদং শ্রাবয়েচ্ছ্রাদ্ধে ব্রাহ্মণান্পাদমন্ততঃ
অক্ষয্যমন্নপানং বৈ পিতৄংস্তস্যোপতিষ্ঠতে
5.37
অহ্না যদেনঃ কুরুতে ইন্দ্রিয়ৈর্মনসাপি বা
মহাভারতমাখ্যায় পশ্চাত্সংধ্যাং প্রমুচ্যতে
5.38
ধর্মে চার্থে চ কামে চ মোক্ষে চ ভরতর্ষভ
যদিহাস্তি তদন্যত্র যন্নেহাস্তি ন তত্ক্বচিৎ
5.39
জয়ো নামেতিহাসোঽয়ং শ্রোতব্যো ভূতিমিচ্ছতা
রাজ্ঞা রাজসুতৈশ্চাপি গর্ভিণ্যা চৈব যোষিতা
5.40
স্বর্গকামো লভেত্স্বর্গং জয়কামো লভেজ্জয়ম্
গর্ভিণী লভতে পুত্রং কন্যাং বা বহুভাগিনীম্
5.41
অনাগতং ত্রিভির্বর্ষৈঃ কৃষ্ণদ্বৈপায়নঃ প্রভুঃ
সংদর্ভং ভারতস্যাস্য কৃতবান্ধর্মকাম্যয়া
5.42
নারদোঽশ্রাবয়দ্দেবানসিতো দেবলঃ পিতৄন্
রক্ষো যক্ষাঞ্শুকো মর্ত্যান্বৈশংপায়ন এব তু
5.43
ইতিহাসমিমং পুণ্যং মহার্থং বেদসংমিতম্
শ্রাবয়েদ্যস্তু বর্ণাংস্ত্রীন্কৃত্বা ব্রাহ্মণমগ্রতঃ
5.44
স নরঃ পাপনির্মুক্তঃ কীর্তিং প্রাপ্যেহ শৌনক
গচ্ছেত্পরমিকাং সিদ্ধিমত্র মে নাস্তি সংশয়ঃ
5.45
ভারতাধ্যয়নাত্পুণ্যাদপি পাদমধীয়তঃ
শ্রদ্দধানস্য পূয়ন্তে সর্বপাপান্যশেষতঃ
5.46
মহর্ষির্ভগবান্ব্যাসঃ কৃত্বেমাং সংহিতাং পুরা
শ্লোকৈশ্চতুর্ভির্ভগবান্পুত্রমধ্যাপয়চ্ছুকম্
5.47
মাতাপিতৃসহস্রাণি পুত্রদারশতানি চ
সংসারেষ্বনুভূতানি যান্তি যাস্যন্তি চাপরে
5.48
হর্ষস্থানসহস্রাণি ভয়স্থানশতানি চ
দিবসে দিবসে মূঢমাবিশন্তি ন পণ্ডিতম্
5.49
ঊর্ধ্ববাহুর্বিরৌম্যেষ ন চ কশ্চিচ্ছৃণোতি মে
ধর্মাদর্থশ্চ কামশ্চ স কিমর্থং ন সেব্যতে
5.50
ন জাতু কামান্ন ভয়ান্ন লোভা;দ্ধর্মং ত্যজেজ্জীবিতস্যাপি হেতোঃ
নিত্যো ধর্মঃ সুখদুঃখে ত্বনিত্যে; জীবো নিত্যো হেতুরস্য ত্বনিত্যঃ
5.51
ইমাং ভারতসাবিত্রীং প্রাতরুত্থায় যঃ পঠেৎ
স ভারতফলং প্রাপ্য পরং ব্রহ্মাধিগচ্ছতি
5.52
যথা সমুদ্রো ভগবান্যথা চ হিমবান্গিরিঃ
খ্যাতাবুভৌ রত্ননিধী তথা ভারতমুচ্যতে
5.53
মহাভারতমাখ্যানং যঃ পঠেত্সুসমাহিতঃ
স গচ্ছেত্পরমাং সিদ্ধিমিতি মে নাস্তি সংশয়ঃ
5.54
দ্বৈপায়নোষ্ঠপুটনিঃসৃতমপ্রমেয়ং; পুণ্যং পবিত্রমথ পাপহরং শিবং চ
যো ভারতং সমধিগচ্ছতি বাচ্যমানং; কিং তস্য পুষ্করজলৈরভিষেচনেন