Utshovঅধ্যায় 2
2.1
যুধিষ্ঠির উবাচ
নেহ পশ্যামি বিবুধা রাধেয়মমিতৌজসম্
ভ্রাতরৌ চ মহাত্মানৌ যুধামন্যূত্তমৌজসৌ
2.2
জুহুবুর্যে শরীরাণি রণবহ্নৌ মহারথাঃ
রাজানো রাজপুত্রাশ্চ যে মদর্থে হতা রণে
2.3
ক্ব তে মহারথাঃ সর্বে শার্দূলসমবিক্রমাঃ
তৈরপ্যয়ং জিতো লোকঃ কচ্চিত্পুরুষসত্তমৈঃ
2.4
যদি লোকানিমান্প্রাপ্তাস্তে চ সর্বে মহারথাঃ
স্থিতং বিত্ত হি মাং দেবাঃ সহিতং তৈর্মহাত্মভিঃ
2.5
কচ্চিন্ন তৈরবাপ্তোঽয়ং নৃপৈর্লোকোঽক্ষয়ঃ শুভঃ
ন তৈরহং বিনা বত্স্যে জ্ঞাতিভির্ভ্রাতৃভিস্তথা
2.6
মাতুর্হি বচনং শ্রুত্বা তদা সলিলকর্মণি
কর্ণস্য ক্রিয়তাং তোয়মিতি তপ্যামি তেন বৈ
2.7
ইদং চ পরিতপ্যামি পুনঃ পুনরহং সুরাঃ
যন্মাতুঃ সদৃশৌ পাদৌ তস্যাহমমিতৌজসঃ
2.8
দৃষ্ট্বৈব তং নানুগতঃ কর্ণং পরবলার্দনম্
ন হ্যস্মান্কর্ণসহিতাঞ্জয়েচ্ছক্রোঽপি সংয়ুগে
2.9
তমহং যত্রতত্রস্থং দ্রষ্টুমিচ্ছামি সূর্যজম্
অবিজ্ঞাতো ময়া যোঽসৌ ঘাতিতঃ সব্যসাচিনা
2.10
ভীমং চ ভীমবিক্রান্তং প্রাণেভ্যোঽপি প্রিয়ং মম
অর্জুনং চেন্দ্রসংকাশং যমৌ তৌ চ যমোপমৌ
2.11
দ্রষ্টুমিচ্ছামি তাং চাহং পাঞ্চালীং ধর্মচারিণীম্
ন চেহ স্থাতুমিচ্ছামি সত্যমেতদ্ব্রবীমি বঃ
2.12
কিং মে ভ্রাতৃবিহীনস্য স্বর্গেণ সুরসত্তমাঃ
যত্র তে স মম স্বর্গো নায়ং স্বর্গো মতো মম
2.13
দেবা ঊচুঃ
যদি বৈ তত্র তে শ্রদ্ধা গম্যতাং পুত্র মাচিরম্
প্রিয়ে হি তব বর্তামো দেবরাজস্য শাসনাৎ
2.14
বৈশংপায়ন উবাচ
ইত্যুক্ত্বা তং ততো দেবা দেবদূতমুপাদিশন্
যুধিষ্ঠিরস্য সুহৃদো দর্শয়েতি পরংতপ
2.15
ততঃ কুন্তীসুতো রাজা দেবদূতশ্চ জগ্মতুঃ
সহিতৌ রাজশার্দূল যত্র তে পুরুষর্ষভাঃ
2.16
অগ্রতো দেবদূতস্তু যয়ৌ রাজা চ পৃষ্ঠতঃ
পন্থানমশুভং দুর্গং সেবিতং পাপকর্মভিঃ
2.17
তমসা সংবৃতং ঘোরং কেশশৈবলশাদ্বলম্
যুক্তং পাপকৃতাং গন্ধৈর্মাংসশোণিতকর্দমম্
2.18
দংশোত্থানং সঝিল্লীকং মক্ষিকামশকাবৃতম্
ইতশ্চেতশ্চ কুণপৈঃ সমন্তাত্পরিবারিতম্
2.19
অস্থিকেশসমাকীর্ণং কৃমিকীটসমাকুলম্
জ্বলনেন প্রদীপ্তেন সমন্তাত্পরিবেষ্টিতম্
2.20
অয়োমুখৈশ্চ কাকোলৈর্গৃধ্রৈশ্চ সমভিদ্রুতম্
সূচীমুখৈস্তথা প্রেতৈর্বিন্ধ্যশৈলোপমৈর্বৃতম্
2.21
মেদোরুধিরয়ুক্তৈশ্চ ছিন্নবাহূরুপাণিভিঃ
নিকৃত্তোদরপাদৈশ্চ তত্র তত্র প্রবেরিতৈঃ
2.22
স তত্কুণপদুর্গন্ধমশিবং রোমহর্ষণম্
জগাম রাজা ধর্মাত্মা মধ্যে বহু বিচিন্তয়ন্
2.23
দদর্শোষ্ণোদকৈঃ পূর্ণাং নদীং চাপি সুদুর্গমাম্
অসিপত্রবনং চৈব নিশিতক্ষুরসংবৃতম্
2.24
করম্ভবালুকাস্তপ্তা আয়সীশ্চ শিলাঃ পৃথক্
লোহকুম্ভীশ্চ তৈলস্য ক্বাথ্যমানাঃ সমন্ততঃ
2.25
কূটশাল্মলিকং চাপি দুস্পর্শং তীক্ষ্ণকণ্টকম্
দদর্শ চাপি কৌন্তেয়ো যাতনাঃ পাপকর্মিণাম্
2.26
স তং দুর্গন্ধমালক্ষ্য দেবদূতমুবাচ হ
কিয়দধ্বানমস্মাভির্গন্তব্যমিদমীদৃশম্
2.27
ক্ব চ তে ভ্রাতরো মহ্যং তন্মমাখ্যাতুমর্হসি
দেশোঽয়ং কশ্চ দেবানামেতদিচ্ছামি বেদিতুম্
2.28
স সংনিববৃতে শ্রুত্বা ধর্মরাজস্য ভাষিতম্
দেবদূতোঽব্রবীচ্চৈনমেতাবদ্গমনং তব
2.29
নিবর্তিতব্যং হি ময়া তথাস্ম্যুক্তো দিবৌকসৈঃ
যদি শ্রান্তোঽসি রাজেন্দ্র ত্বমথাগন্তুমর্হসি
2.30
যুধিষ্ঠিরস্তু নির্বিণ্ণস্তেন গন্ধেন মূর্ছিতঃ
নিবর্তনে ধৃতমনাঃ পর্যাবর্তত ভারত
2.31
স সংনিবৃত্তো ধর্মাত্মা দুঃখশোকসমন্বিতঃ
শুশ্রাব তত্র বদতাং দীনা বাচঃ সমন্ততঃ
2.32
ভো ভো ধর্মজ রাজর্ষে পুণ্যাভিজন পাণ্ডব
অনুগ্রহার্থমস্মাকং তিষ্ঠ তাবন্মুহূর্তকম্
2.33
আয়াতি ত্বয়ি দুর্ধর্ষে বাতি পুণ্যঃ সমীরণঃ
তব গন্ধানুগস্তাত যেনাস্মান্সুখমাগমৎ
2.34
তে বয়ং পার্থ দীর্ঘস্য কালস্য পুরুষর্ষভ
সুখমাসাদয়িষ্যামস্ত্বাং দৃষ্ট্বা রাজসত্তম
2.35
সংতিষ্ঠস্ব মহাবাহো মুহূর্তমপি ভারত
ত্বয়ি তিষ্ঠতি কৌরব্য যাতনাস্মান্ন বাধতে
2.36
এবং বহুবিধা বাচঃ কৃপণা বেদনাবতাম্
তস্মিন্দেশে স শুশ্রাব সমন্তাদ্বদতাং নৃপ
2.37
তেষাং তদ্বচনং শ্রুত্বা দয়াবান্দীনভাষিণাম্
অহো কৃচ্ছ্রমিতি প্রাহ তস্থৌ স চ যুধিষ্ঠিরঃ
2.38
স তা গিরঃ পুরস্তাদ্বৈ শ্রুতপূর্বাঃ পুনঃ পুনঃ
গ্লানানাং দুঃখিতানাং চ নাভ্যজানত পাণ্ডবঃ
2.39
অবুধ্যমানস্তা বাচো ধর্মপুত্রো যুধিষ্ঠিরঃ
উবাচ কে ভবন্তো বৈ কিমর্থমিহ তিষ্ঠথ
2.40
ইত্যুক্তাস্তে ততঃ সর্বে সমন্তাদবভাষিরে
কর্ণোঽহং ভীমসেনোঽহমর্জুনোঽহমিতি প্রভো
2.41
নকুলঃ সহদেবোঽহং ধৃষ্টদ্যুম্নোঽহমিত্যুত
দ্রৌপদী দ্রৌপদেয়াশ্চ ইত্যেবং তে বিচুক্রুশুঃ
2.42
তা বাচঃ স তদা শ্রুত্বা তদ্দেশসদৃশীর্নৃপ
ততো বিমমৃশে রাজা কিং ন্বিদং দৈবকারিতম্
2.43
কিং নু তত্কলুষং কর্ম কৃতমেভির্মহাত্মভিঃ
কর্ণেন দ্রৌপদেয়ৈর্বা পাঞ্চাল্যা বা সুমধ্যয়া
2.44
য ইমে পাপগন্ধেঽস্মিন্দেশে সন্তি সুদারুণে
ন হি জানামি সর্বেষাং দুষ্কৃতং পুণ্যকর্মণাম্
2.45
কিং কৃত্বা ধৃতরাষ্ট্রস্য পুত্রো রাজা সুয়োধনঃ
তথা শ্রিয়া যুতঃ পাপঃ সহ সর্বৈঃ পদানুগৈঃ
2.46
মহেন্দ্র ইব লক্ষ্মীবানাস্তে পরমপূজিতঃ
কস্যেদানীং বিকারোঽয়ং যদিমে নরকং গতাঃ
2.47
সর্বধর্মবিদঃ শূরাঃ সত্যাগমপরায়ণাঃ
ক্ষাত্রধর্মপরাঃ প্রাজ্ঞা যজ্বানো ভূরিদক্ষিণাঃ
2.48
কিং নু সুপ্তোঽস্মি জাগর্মি চেতয়ানো ন চেতয়ে
অহো চিত্তবিকারোঽয়ং স্যাদ্বা মে চিত্তবিভ্রমঃ
2.49
এবং বহুবিধং রাজা বিমমর্শ যুধিষ্ঠিরঃ
দুঃখশোকসমাবিষ্টশ্চিন্তাব্যাকুলিতেন্দ্রিয়ঃ
2.50
ক্রোধমাহারয়চ্চৈব তীব্রং ধর্মসুতো নৃপঃ
দেবাংশ্চ গর্হয়ামাস ধর্মং চৈব যুধিষ্ঠিরঃ
2.51
স তীব্রগন্ধসংতপ্তো দেবদূতমুবাচ হ
গম্যতাং ভদ্র যেষাং ত্বং দূতস্তেষামুপান্তিকম্
2.52
ন হ্যহং তত্র যাস্যামি স্থিতোঽস্মীতি নিবেদ্যতাম্
মত্সংশ্রয়াদিমে দূত সুখিনো ভ্রাতরো হি মে
2.53
ইত্যুক্তঃ স তদা দূতঃ পাণ্ডুপুত্রেণ ধীমতা
জগাম তত্র যত্রাস্তে দেবরাজঃ শতক্রতুঃ
2.54
নিবেদয়ামাস চ তদ্ধর্মরাজচিকীর্ষিতম্
যথোক্তং ধর্মপুত্রেণ সর্বমেব জনাধিপ