Utshovঅধ্যায় 1
1.1
জনমেজয় উবাচ
স্বর্গং ত্রিবিষ্টপং প্রাপ্য মম পূর্বপিতামহাঃ
পাণ্ডবা ধার্তরাষ্ট্রাশ্চ কানি স্থানানি ভেজিরে
1.2
এতদিচ্ছাম্যহং শ্রোতুং সর্ববিচ্চাসি মে মতঃ
মহর্ষিণাভ্যনুজ্ঞাতো ব্যাসেনাদ্ভুতকর্মণা
1.3
বৈশংপায়ন উবাচ
স্বর্গং ত্রিবিষ্টপং প্রাপ্য তব পূর্বপিতামহাঃ
যুধিষ্ঠিরপ্রভৃতয়ো যদকুর্বত তচ্ছৃণু
1.4
স্বর্গং ত্রিবিষ্টপং প্রাপ্য ধর্মরাজো যুধিষ্ঠিরঃ
দুর্যোধনং শ্রিয়া জুষ্টং দদর্শাসীনমাসনে
1.5
ভ্রাজমানমিবাদিত্যং বীরলক্ষ্ম্যাভিসংবৃতম্
দেবৈর্ভ্রাজিষ্ণুভিঃ সাধ্যৈঃ সহিতং পুণ্যকর্মভিঃ
1.6
ততো যুধিষ্ঠিরো দৃষ্ট্বা দুর্যোধনমমর্ষিতঃ
সহসা সংনিবৃত্তোঽভূচ্ছ্রিয়ং দৃষ্ট্বা সুয়োধনে
1.7
ব্রুবন্নুচ্চৈর্বচস্তান্বৈ নাহং দুর্যোধনেন বৈ
সহিতঃ কাময়ে লোকাঁল্লুব্ধেনাদীর্ঘদর্শিনা
1.8
যত্কৃতে পৃথিবী সর্বা সুহৃদো বান্ধবাস্তথা
হতাস্মাভিঃ প্রসহ্যাজৌ ক্লিষ্টৈঃ পূর্বং মহাবনে
1.9
দ্রৌপদী চ সভামধ্যে পাঞ্চালী ধর্মচারিণী
পরিক্লিষ্টানবদ্যাঙ্গী পত্নী নো গুরুসংনিধৌ
1.10
স্বস্তি দেবা ন মে কামঃ সুয়োধনমুদীক্ষিতুম্
তত্রাহং গন্তুমিচ্ছামি যত্র তে ভ্রাতরো মম
1.11
মৈবমিত্যব্রবীত্তং তু নারদঃ প্রহসন্নিব
স্বর্গে নিবাসো রাজেন্দ্র বিরুদ্ধং চাপি নশ্যতি
1.12
যুধিষ্ঠির মহাবাহো মৈবং বোচঃ কথংচন
দুর্যোধনং প্রতি নৃপং শৃণু চেদং বচো মম
1.13
এষ দুর্যোধনো রাজা পূজ্যতে ত্রিদশৈঃ সহ
সদ্ভিশ্চ রাজপ্রবরৈর্য ইমে স্বর্গবাসিনঃ
1.14
বীরলোকগতিং প্রাপ্তো যুদ্ধে হুত্বাত্মনস্তনুম্
যূয়ং সর্বে সুরসমা যেন যুদ্ধে সমাসিতাঃ
1.15
স এষ ক্ষত্রধর্মেণ স্থানমেতদবাপ্তবান্
ভয়ে মহতি যোঽভীতো বভূব পৃথিবীপতিঃ
1.16
ন তন্মনসি কর্তব্যং পুত্র যদ্দ্যূতকারিতম্
দ্রৌপদ্যাশ্চ পরিক্লেশং ন চিন্তয়িতুমর্হসি
1.17
যে চান্যেঽপি পরিক্লেশা যুষ্মাকং দ্যূতকারিতাঃ
সংগ্রামেষ্বথ বান্যত্র ন তান্সংস্মর্তুমর্হসি
1.18
সমাগচ্ছ যথান্যায়ং রাজ্ঞা দুর্যোধনেন বৈ
স্বর্গোঽয়ং নেহ বৈরাণি ভবন্তি মনুজাধিপ
1.19
নারদেনৈবমুক্তস্তু কুরুরাজো যুধিষ্ঠিরঃ
ভ্রাতৄন্পপ্রচ্ছ মেধাবী বাক্যমেতদুবাচ হ
1.20
যদি দুর্যোধনস্যৈতে বীরলোকাঃ সনাতনাঃ
অধর্মজ্ঞস্য পাপস্য পৃথিবীসুহৃদদ্রুহঃ
1.21
যত্কৃতে পৃথিবী নষ্টা সহয়া সরথদ্বিপা
বয়ং চ মন্যুনা দগ্ধা বৈরং প্রতিচিকীর্ষবঃ
1.22
যে তে বীরা মহাত্মানো ভ্রাতরো মে মহাব্রতাঃ
সত্যপ্রতিজ্ঞা লোকস্য শূরা বৈ সত্যবাদিনঃ
1.23
তেষামিদানীং কে লোকা দ্রষ্টুমিচ্ছামি তানহম্
কর্ণং চৈব মহাত্মানং কৌন্তেয়ং সত্যসংগরম্
1.24
ধৃষ্টদ্যুম্নং সাত্যকিং চ ধৃষ্টদ্যুম্নস্য চাত্মজান্
যে চ শস্ত্রৈর্বধং প্রাপ্তাঃ ক্ষত্রধর্মেণ পার্থিবাঃ
1.25
ক্ব নু তে পার্থিবা ব্রহ্মন্নৈতান্পশ্যামি নারদ
বিরাটদ্রুপদৌ চৈব ধৃষ্টকেতুমুখাংশ্চ তান্
1.26
শিখণ্ডিনং চ পাঞ্চাল্যং দ্রৌপদেয়াংশ্চ সর্বশঃ
অভিমন্যুং চ দুর্ধর্ষং দ্রষ্টুমিচ্ছামি নারদ