UtshovChapter 1
1.1
जनमेजय उवाच
स्वर्गं त्रिविष्टपं प्राप्य मम पूर्वपितामहाः
पाण्डवा धार्तराष्ट्राश्च कानि स्थानानि भेजिरे
Janamejaya uvacha
Svargam trivishtapam prapya mama purvapitamahah
Pandava dhartarashtrashcha kani sthanani bhejire
1.2
एतदिच्छाम्यहं श्रोतुं सर्वविच्चासि मे मतः
महर्षिणाभ्यनुज्ञातो व्यासेनाद्भुतकर्मणा
Etadichchhamyaham shrotum sarvavichchasi me matah
Maharshinabhyanugyato vyasenadbhutakarmana
1.3
वैशंपायन उवाच
स्वर्गं त्रिविष्टपं प्राप्य तव पूर्वपितामहाः
युधिष्ठिरप्रभृतयो यदकुर्वत तच्छृणु
Vaishampayana uvacha
Svargam trivishtapam prapya tava purvapitamahah
Yudhishthiraprabhritayo yadakurvata tachchhrinu
1.4
स्वर्गं त्रिविष्टपं प्राप्य धर्मराजो युधिष्ठिरः
दुर्योधनं श्रिया जुष्टं ददर्शासीनमासने
Svargam trivishtapam prapya dharmarajo yudhishthirah
Duryodhanam shriya jushtam dadarshasinamasane
1.5
भ्राजमानमिवादित्यं वीरलक्ष्म्याभिसंवृतम्
देवैर्भ्राजिष्णुभिः साध्यैः सहितं पुण्यकर्मभिः
Bhrajamanamivadityam viralakshmyabhisanvritam
Devairbhrajishnubhih sadhyaih sahitam punyakarmabhih
1.6
ततो युधिष्ठिरो दृष्ट्वा दुर्योधनममर्षितः
सहसा संनिवृत्तोऽभूच्छ्रियं दृष्ट्वा सुयोधने
Tato yudhishthiro drishtva duryodhanamamarshitah
Sahasa sannivrittobhuchchhriyam drishtva suyodhane
1.7
ब्रुवन्नुच्चैर्वचस्तान्वै नाहं दुर्योधनेन वै
सहितः कामये लोकाँल्लुब्धेनादीर्घदर्शिना
Bruvannuchchairvachastanvai naham duryodhanena vai
Sahitah kamaye lokanllubdhenadirghadarshina
1.8
यत्कृते पृथिवी सर्वा सुहृदो बान्धवास्तथा
हतास्माभिः प्रसह्याजौ क्लिष्टैः पूर्वं महावने
Yatkrite prithivi sarva suhrido bandhavastatha
Hatasmabhih prasahyajau klishtaih purvam mahavane
1.9
द्रौपदी च सभामध्ये पाञ्चाली धर्मचारिणी
परिक्लिष्टानवद्याङ्गी पत्नी नो गुरुसंनिधौ
Draupadi cha sabhamadhye panchali dharmacharini
Pariklishtanavadyangi patni no gurusannidhau
1.10
स्वस्ति देवा न मे कामः सुयोधनमुदीक्षितुम्
तत्राहं गन्तुमिच्छामि यत्र ते भ्रातरो मम
Svasti deva na me kamah suyodhanamudikshitum
Tatraham gantumichchhami yatra te bhrataro mama
1.11
मैवमित्यब्रवीत्तं तु नारदः प्रहसन्निव
स्वर्गे निवासो राजेन्द्र विरुद्धं चापि नश्यति
Maivamityabravittam tu naradah prahasanniva
Svarge nivaso rajendra viruddham chapi nashyati
1.12
युधिष्ठिर महाबाहो मैवं वोचः कथंचन
दुर्योधनं प्रति नृपं शृणु चेदं वचो मम
Yudhishthira mahabaho maivam vochah kathanchana
Duryodhanam prati nripam shrinu chedam vacho mama
1.13
एष दुर्योधनो राजा पूज्यते त्रिदशैः सह
सद्भिश्च राजप्रवरैर्य इमे स्वर्गवासिनः
Esha duryodhano raja pujyate tridashaih saha
Sadbhishcha rajapravarairya ime svargavasinah
1.14
वीरलोकगतिं प्राप्तो युद्धे हुत्वात्मनस्तनुम्
यूयं सर्वे सुरसमा येन युद्धे समासिताः
Viralokagatim prapto yuddhe hutvatmanastanum
Yuyam sarve surasama yena yuddhe samasitah
1.15
स एष क्षत्रधर्मेण स्थानमेतदवाप्तवान्
भये महति योऽभीतो बभूव पृथिवीपतिः
Sa esha kshatradharmena sthanametadavaptavan
Bhaye mahati yobhito babhuva prithivipatih
1.16
न तन्मनसि कर्तव्यं पुत्र यद्द्यूतकारितम्
द्रौपद्याश्च परिक्लेशं न चिन्तयितुमर्हसि
Na tanmanasi kartavyam putra yaddyutakaritam
Draupadyashcha pariklesham na chintayitumarhasi
1.17
ये चान्येऽपि परिक्लेशा युष्माकं द्यूतकारिताः
संग्रामेष्वथ वान्यत्र न तान्संस्मर्तुमर्हसि
Ye chanyepi pariklesha yushmakam dyutakaritah
Sangrameshvatha vanyatra na tansansmartumarhasi
1.18
समागच्छ यथान्यायं राज्ञा दुर्योधनेन वै
स्वर्गोऽयं नेह वैराणि भवन्ति मनुजाधिप
Samagachchha yathanyayam ragya duryodhanena vai
Svargoyam neha vairani bhavanti manujadhipa
1.19
नारदेनैवमुक्तस्तु कुरुराजो युधिष्ठिरः
भ्रातॄन्पप्रच्छ मेधावी वाक्यमेतदुवाच ह
Naradenaivamuktastu kururajo yudhishthirah
Bhratrinpaprachchha medhavi vakyametaduvacha ha
1.20
यदि दुर्योधनस्यैते वीरलोकाः सनातनाः
अधर्मज्ञस्य पापस्य पृथिवीसुहृदद्रुहः
Yadi duryodhanasyaite viralokah sanatanah
Adharmagyasya papasya prithivisuhridadruhah
1.21
यत्कृते पृथिवी नष्टा सहया सरथद्विपा
वयं च मन्युना दग्धा वैरं प्रतिचिकीर्षवः
Yatkrite prithivi nashta sahaya sarathadvipa
Vayam cha manyuna dagdha vairam pratichikirshavah
1.22
ये ते वीरा महात्मानो भ्रातरो मे महाव्रताः
सत्यप्रतिज्ञा लोकस्य शूरा वै सत्यवादिनः
Ye te vira mahatmano bhrataro me mahavratah
Satyapratigya lokasya shura vai satyavadinah
1.23
तेषामिदानीं के लोका द्रष्टुमिच्छामि तानहम्
कर्णं चैव महात्मानं कौन्तेयं सत्यसंगरम्
Teshamidanim ke loka drashtumichchhami tanaham
Karnam chaiva mahatmanam kaunteyam satyasangaram
1.24
धृष्टद्युम्नं सात्यकिं च धृष्टद्युम्नस्य चात्मजान्
ये च शस्त्रैर्वधं प्राप्ताः क्षत्रधर्मेण पार्थिवाः
Dhrishtadyumnam satyakim cha dhrishtadyumnasya chatmajan
Ye cha shastrairvadham praptah kshatradharmena parthivah
1.25
क्व नु ते पार्थिवा ब्रह्मन्नैतान्पश्यामि नारद
विराटद्रुपदौ चैव धृष्टकेतुमुखांश्च तान्
Kva nu te parthiva brahmannaitanpashyami narada
Viratadrupadau chaiva dhrishtaketumukhanshcha tan
1.26
शिखण्डिनं च पाञ्चाल्यं द्रौपदेयांश्च सर्वशः
अभिमन्युं च दुर्धर्षं द्रष्टुमिच्छामि नारद
Shikhandinam cha panchalyam draupadeyanshcha sarvashah
Abhimanyum cha durdharsham drashtumichchhami narada