অধ্যায় 2

2.1

বৈশংপায়ন উবাচ
ততস্তে নিয়তাত্মান উদীচীং দিশমাস্থিতাঃ
দদৃশুর্যোগয়ুক্তাশ্চ হিমবন্তং মহাগিরিম্

2.2

তং চাপ্যতিক্রমন্তস্তে দদৃশুর্বালুকার্ণবম্
অবৈক্ষন্ত মহাশৈলং মেরুং শিখরিণাং বরম্

2.3

তেষাং তু গচ্ছতাং শীঘ্রং সর্বেষাং যোগধর্মিণাম্
যাজ্ঞসেনী ভ্রষ্টয়োগা নিপপাত মহীতলে

2.4

তাং তু প্রপতিতাং দৃষ্ট্বা ভীমসেনো মহাবলঃ
উবাচ ধর্মরাজানং যাজ্ঞসেনীমবেক্ষ্য হ

2.5

নাধর্মশ্চরিতঃ কশ্চিদ্রাজপুত্র্যা পরংতপ
কারণং কিং নু তদ্রাজন্যত্কৃষ্ণা পতিতা ভুবি

2.6

যুধিষ্ঠির উবাচ
পক্ষপাতো মহানস্যা বিশেষেণ ধনংজয়ে
তস্যৈতত্ফলমদ্যৈষা ভুঙ্ক্তে পুরুষসত্তম

2.7

বৈশংপায়ন উবাচ
এবমুক্ত্বানবেক্ষ্যৈনাং যয়ৌ ধর্মসুতো নৃপঃ
সমাধায় মনো ধীমান্ধর্মাত্মা পুরুষর্ষভঃ

2.8

সহদেবস্ততো ধীমান্নিপপাত মহীতলে
তং চাপি পতিতং দৃষ্ট্বা ভীমো রাজানমব্রবীৎ

2.9

যোঽয়মস্মাসু সর্বেষু শুশ্রূষুরনহংকৃতঃ
সোঽয়ং মাদ্রবতীপুত্রঃ কস্মান্নিপতিতো ভুবি

2.10

যুধিষ্ঠির উবাচ
আত্মনঃ সদৃশং প্রাজ্ঞং নৈষোঽমন্যত কংচন
তেন দোষেণ পতিতস্তস্মাদেষ নৃপাত্মজঃ

2.11

বৈশংপায়ন উবাচ
ইত্যুক্ত্বা তু সমুত্সৃজ্য সহদেবং যয়ৌ তদা
ভ্রাতৃভিঃ সহ কৌন্তেয়ঃ শুনা চৈব যুধিষ্ঠিরঃ

2.12

কৃষ্ণাং নিপতিতাং দৃষ্ট্বা সহদেবং চ পাণ্ডবম্
আর্তো বন্ধুপ্রিয়ঃ শূরো নকুলো নিপপাত হ

2.13

তস্মিন্নিপতিতে বীরে নকুলে চারুদর্শনে
পুনরেব তদা ভীমো রাজানমিদমব্রবীৎ

2.14

যোঽয়মক্ষতধর্মাত্মা ভ্রাতা বচনকারকঃ
রূপেণাপ্রতিমো লোকে নকুলঃ পতিতো ভুবি

2.15

ইত্যুক্তো ভীমসেনেন প্রত্যুবাচ যুধিষ্ঠিরঃ
নকুলং প্রতি ধর্মাত্মা সর্ববুদ্ধিমতাং বরঃ

2.16

রূপেণ মত্সমো নাস্তি কশ্চিদিত্যস্য দর্শনম্
অধিকশ্চাহমেবৈক ইত্যস্য মনসি স্থিতম্

2.17

নকুলঃ পতিতস্তস্মাদাগচ্ছ ত্বং বৃকোদর
যস্য যদ্বিহিতং বীর সোঽবশ্যং তদুপাশ্নুতে

2.18

তাংস্তু প্রপতিতান্দৃষ্ট্বা পাণ্ডবঃ শ্বেতবাহনঃ
পপাত শোকসংতপ্তস্ততোঽনু পরবীরহা

2.19

তস্মিংস্তু পুরুষব্যাঘ্রে পতিতে শক্রতেজসি
ম্রিয়মাণে দুরাধর্ষে ভীমো রাজানমব্রবীৎ

2.20

অনৃতং ন স্মরাম্যস্য স্বৈরেষ্বপি মহাত্মনঃ
অথ কস্য বিকারোঽয়ং যেনায়ং পতিতো ভুবি

2.21

যুধিষ্ঠির উবাচ
একাহ্না নির্দহেয়ং বৈ শত্রূনিত্যর্জুনোঽব্রবীৎ
ন চ তত্কৃতবানেষ শূরমানী ততোঽপতৎ

2.22

অবমেনে ধনুর্গ্রাহানেষ সর্বাংশ্চ ফল্গুনঃ
যথা চোক্তং তথা চৈব কর্তব্যং ভূতিমিচ্ছতা

2.23

বৈশংপায়ন উবাচ
ইত্যুক্ত্বা প্রস্থিতো রাজা ভীমোঽথ নিপপাত হ
পতিতশ্চাব্রবীদ্ভীমো ধর্মরাজং যুধিষ্ঠিরম্

2.24

ভো ভো রাজন্নবেক্ষস্ব পতিতোঽহং প্রিয়স্তব
কিংনিমিত্তং চ পতনং ব্রূহি মে যদি বেত্থ হ

2.25

যুধিষ্ঠির উবাচ
অতিভুক্তং চ ভবতা প্রাণেন চ বিকত্থসে
অনবেক্ষ্য পরং পার্থ তেনাসি পতিতঃ ক্ষিতৌ

2.26

বৈশংপায়ন উবাচ
ইত্যুক্ত্বা তং মহাবাহুর্জগামানবলোকয়ন্
শ্বা ত্বেকোঽনুয়য়ৌ যস্তে বহুশঃ কীর্তিতো ময়া

Contains text from DharmicData, made available under the Open Database License (ODbL). Simple meanings are written by AI and can contain mistakes.