Utshovঅধ্যায় 3
3.1
বৈশংপায়ন উবাচ
ততঃ সংনাদয়ঞ্শক্রো দিবং ভূমিং চ সর্বশঃ
রথেনোপয়য়ৌ পার্থমারোহেত্যব্রবীচ্চ তম্
3.2
স ভ্রাতৄন্পতিতান্দৃষ্ট্বা ধর্মরাজো যুধিষ্ঠিরঃ
অব্রবীচ্ছোকসংতপ্তঃ সহস্রাক্ষমিদং বচঃ
3.3
ভ্রাতরঃ পতিতা মেঽত্র আগচ্ছেয়ুর্ময়া সহ
ন বিনা ভ্রাতৃভিঃ স্বর্গমিচ্ছে গন্তুং সুরেশ্বর
3.4
সুকুমারী সুখার্হা চ রাজপুত্রী পুরংদর
সাস্মাভিঃ সহ গচ্ছেত তদ্ভবাননুমন্যতাম্
3.5
ইন্দ্র উবাচ
ভ্রাতৄন্দ্রক্ষ্যসি পুত্রাংস্ত্বমগ্রতস্ত্রিদিবং গতান্
কৃষ্ণয়া সহিতান্সর্বান্মা শুচো ভরতর্ষভ
3.6
নিক্ষিপ্য মানুষং দেহং গতাস্তে ভরতর্ষভ
অনেন ত্বং শরীরেণ স্বর্গং গন্তা ন সংশয়ঃ
3.7
যুধিষ্ঠির উবাচ
অয়ং শ্বা ভূতভব্যেশ ভক্তো মাং নিত্যমেব হ
স গচ্ছেত ময়া সার্ধমানৃশংস্যা হি মে মতিঃ
3.8
ইন্দ্র উবাচ
অমর্ত্যত্বং মত্সমত্বং চ রাজ;ঞ্শ্রিয়ং কৃত্স্নাং মহতীং চৈব কীর্তিম্
সংপ্রাপ্তোঽদ্য স্বর্গসুখানি চ ত্বং; ত্যজ শ্বানং নাত্র নৃশংসমস্তি
3.9
যুধিষ্ঠির উবাচ
অনার্যমার্যেণ সহস্রনেত্র; শক্যং কর্তুং দুষ্করমেতদার্য
মা মে শ্রিয়া সংগমনং তয়াস্তু; যস্যাঃ কৃতে ভক্তজনং ত্যজেয়ম্
3.10
ইন্দ্র উবাচ
স্বর্গে লোকে শ্ববতাং নাস্তি ধিষ্ণ্য;মিষ্টাপূর্তং ক্রোধবশা হরন্তি
ততো বিচার্য ক্রিয়তাং ধর্মরাজ; ত্যজ শ্বানং নাত্র নৃশংসমস্তি
3.11
যুধিষ্ঠির উবাচ
ভক্তত্যাগং প্রাহুরত্যন্তপাপং; তুল্যং লোকে ব্রহ্মবধ্যাকৃতেন
তস্মান্নাহং জাতু কথংচনাদ্য; ত্যক্ষ্যাম্যেনং স্বসুখার্থী মহেন্দ্র
3.12
ইন্দ্র উবাচ
শুনা দৃষ্টং ক্রোধবশা হরন্তি; যদ্দত্তমিষ্টং বিবৃতমথো হুতং চ
তস্মাচ্ছুনস্ত্যাগমিমং কুরুষ্ব; শুনস্ত্যাগাত্প্রাপ্স্যসে দেবলোকম্
3.13
ত্যক্ত্বা ভ্রাতৄন্দয়িতাং চাপি কৃষ্ণাং; প্রাপ্তো লোকঃ কর্মণা স্বেন বীর
শ্বানং চৈনং ন ত্যজসে কথং নু; ত্যাগং কৃত্স্নং চাস্থিতো মুহ্যসেঽদ্য
3.14
যুধিষ্ঠির উবাচ
ন বিদ্যতে সংধিরথাপি বিগ্রহো; মৃতৈর্মর্ত্যৈরিতি লোকেষু নিষ্ঠা
ন তে ময়া জীবয়িতুং হি শক্যা; তস্মাত্ত্যাগস্তেষু কৃতো ন জীবতাম্
3.15
প্রতিপ্রদানং শরণাগতস্য; স্ত্রিয়া বধো ব্রাহ্মণস্বাপহারঃ
মিত্রদ্রোহস্তানি চত্বারি শক্র; ভক্তত্যাগশ্চৈব সমো মতো মে
3.16
বৈশংপায়ন উবাচ
তদ্ধর্মরাজস্য বচো নিশম্য; ধর্মস্বরূপী ভগবানুবাচ
যুধিষ্ঠিরং প্রীতিয়ুক্তো নরেন্দ্রং; শ্লক্ষ্ণৈর্বাক্যৈঃ সংস্তবসংপ্রয়ুক্তৈঃ
3.17
অভিজাতোঽসি রাজেন্দ্র পিতুর্বৃত্তেন মেধয়া
অনুক্রোশেন চানেন সর্বভূতেষু ভারত
3.18
পুরা দ্বৈতবনে চাসি ময়া পুত্র পরীক্ষিতঃ
পানীয়ার্থে পরাক্রান্তা যত্র তে ভ্রাতরো হতাঃ
3.19
ভীমার্জুনৌ পরিত্যজ্য যত্র ত্বং ভ্রাতরাবুভৌ
মাত্রোঃ সাম্যমভীপ্সন্বৈ নকুলং জীবমিচ্ছসি
3.20
অয়ং শ্বা ভক্ত ইত্যেব ত্যক্তো দেবরথস্ত্বয়া
তস্মাত্স্বর্গে ন তে তুল্যঃ কশ্চিদস্তি নরাধিপ
3.21
অতস্তবাক্ষয়া লোকাঃ স্বশরীরেণ ভারত
প্রাপ্তোঽসি ভরতশ্রেষ্ঠ দিব্যাং গতিমনুত্তমাম্
3.22
ততো ধর্মশ্চ শক্রশ্চ মরুতশ্চাশ্বিনাবপি
দেবা দেবর্ষয়শ্চৈব রথমারোপ্য পাণ্ডবম্
3.23
প্রয়য়ুঃ স্বৈর্বিমানৈস্তে সিদ্ধাঃ কামবিহারিণঃ
সর্বে বিরজসঃ পুণ্যাঃ পুণ্যবাগ্বুদ্ধিকর্মিণঃ
3.24
স তং রথং সমাস্থায় রাজা কুরুকুলোদ্বহঃ
ঊর্ধ্বমাচক্রমে শীঘ্রং তেজসাবৃত্য রোদসী
3.25
ততো দেবনিকায়স্থো নারদঃ সর্বলোকবিৎ
উবাচোচ্চৈস্তদা বাক্যং বৃহদ্বাদী বৃহত্তপাঃ
3.26
যেঽপি রাজর্ষয়ঃ সর্বে তে চাপি সমুপস্থিতাঃ
কীর্তিং প্রচ্ছাদ্য তেষাং বৈ কুরুরাজোঽধিতিষ্ঠতি
3.27
লোকানাবৃত্য যশসা তেজসা বৃত্তসংপদা
স্বশরীরেণ সংপ্রাপ্তং নান্যং শুশ্রুম পাণ্ডবাৎ
3.28
নারদস্য বচঃ শ্রুত্বা রাজা বচনমব্রবীৎ
দেবানামন্ত্র্য ধর্মাত্মা স্বপক্ষাংশ্চৈব পার্থিবান্
3.29
শুভং বা যদি বা পাপং ভ্রাতৄণাং স্থানমদ্য মে
তদেব প্রাপ্তুমিচ্ছামি লোকানন্যান্ন কাময়ে
3.30
রাজ্ঞস্তু বচনং শ্রুত্বা দেবরাজঃ পুরংদরঃ
আনৃশংস্যসমায়ুক্তং প্রত্যুবাচ যুধিষ্ঠিরম্
3.31
স্থানেঽস্মিন্বস রাজেন্দ্র কর্মভির্নির্জিতে শুভৈঃ
কিং ত্বং মানুষ্যকং স্নেহমদ্যাপি পরিকর্ষসি
3.32
সিদ্ধিং প্রাপ্তোঽসি পরমাং যথা নান্যঃ পুমান্ক্বচিৎ
নৈব তে ভ্রাতরঃ স্থানং সংপ্রাপ্তাঃ কুরুনন্দন
3.33
অদ্যাপি মানুষো ভাবঃ স্পৃশতে ত্বাং নরাধিপ
স্বর্গোঽয়ং পশ্য দেবর্ষীন্সিদ্ধাংশ্চ ত্রিদিবালয়ান্
3.34
যুধিষ্ঠিরস্তু দেবেন্দ্রমেবংবাদিনমীশ্বরম্
পুনরেবাব্রবীদ্ধীমানিদং বচনমর্থবৎ
3.35
তৈর্বিনা নোত্সহে বস্তুমিহ দৈত্যনিবর্হণ
গন্তুমিচ্ছামি তত্রাহং যত্র মে ভ্রাতরো গতাঃ
3.36
যত্র সা বৃহতী শ্যামা বুদ্ধিসত্ত্বগুণান্বিতা
দ্রৌপদী যোষিতাং শ্রেষ্ঠা যত্র চৈব প্রিয়া মম