Utshovঅধ্যায় 1
1.1
জনমেজয় উবাচ
এবং বৃষ্ণ্যন্ধককুলে শ্রুত্বা মৌসলমাহবম্
পাণ্ডবাঃ কিমকুর্বন্ত তথা কৃষ্ণে দিবং গতে
1.2
বৈশংপায়ন উবাচ
শ্রুত্বৈব কৌরবো রাজা বৃষ্ণীনাং কদনং মহৎ
প্রস্থানে মতিমাধায় বাক্যমর্জুনমব্রবীৎ
1.3
কালঃ পচতি ভূতানি সর্বাণ্যেব মহামতে
কর্মন্যাসমহং মন্যে ত্বমপি দ্রষ্টুমর্হসি
1.4
ইত্যুক্তঃ স তু কৌন্তেয়ঃ কালঃ কাল ইতি ব্রুবন্
অন্বপদ্যত তদ্বাক্যং ভ্রাতুর্জ্যেষ্ঠস্য বীর্যবান্
1.5
অর্জুনস্য মতং জ্ঞাত্বা ভীমসেনো যমৌ তথা
অন্বপদ্যন্ত তদ্বাক্যং যদুক্তং সব্যসাচিনা
1.6
ততো যুয়ুত্সুমানায্য প্রব্রজন্ধর্মকাম্যয়া
রাজ্যং পরিদদৌ সর্বং বৈশ্যাপুত্রে যুধিষ্ঠিরঃ
1.7
অভিষিচ্য স্বরাজ্যে তু তং রাজানং পরিক্ষিতম্
দুঃখার্তশ্চাব্রবীদ্রাজা সুভদ্রাং পাণ্ডবাগ্রজঃ
1.8
এষ পুত্রস্য তে পুত্রঃ কুরুরাজো ভবিষ্যতি
যদূনাং পরিশেষশ্চ বজ্রো রাজা কৃতশ্চ হ
1.9
পরিক্ষিদ্ধাস্তিনপুরে শক্রপ্রস্থে তু যাদবঃ
বজ্রো রাজা ত্বয়া রক্ষ্যো মা চাধর্মে মনঃ কৃথাঃ
1.10
ইত্যুক্ত্বা ধর্মরাজঃ স বাসুদেবস্য ধীমতঃ
মাতুলস্য চ বৃদ্ধস্য রামাদীনাং তথৈব চ
1.11
ভ্রাতৃভিঃ সহ ধর্মাত্মা কৃত্বোদকমতন্দ্রিতঃ
শ্রাদ্ধান্যুদ্দিশ্য সর্বেষাং চকার বিধিবত্তদা
1.12
দদৌ রত্নানি বাসাংসি গ্রামানশ্বান্রথানপি
স্ত্রিয়শ্চ দ্বিজমুখ্যেভ্যো গবাং শতসহস্রশঃ
1.13
কৃপমভ্যর্চ্য চ গুরুমর্থমানপুরস্কৃতম্
শিষ্যং পরিক্ষিতং তস্মৈ দদৌ ভরতসত্তমঃ
1.14
ততস্তু প্রকৃতীঃ সর্বাঃ সমানায্য যুধিষ্ঠিরঃ
সর্বমাচষ্ট রাজর্ষিশ্চিকীর্ষিতমথাত্মনঃ
1.15
তে শ্রুত্বৈব বচস্তস্য পৌরজানপদা জনাঃ
ভৃশমুদ্বিগ্নমনসো নাভ্যনন্দন্ত তদ্বচঃ
1.16
নৈবং কর্তব্যমিতি তে তদোচুস্তে নরাধিপম্
ন চ রাজা তথাকার্ষীত্কালপর্যায়ধর্মবিৎ
1.17
ততোঽনুমান্য ধর্মাত্মা পৌরজানপদং জনম্
গমনায় মতিং চক্রে ভ্রাতরশ্চাস্য তে তদা
1.18
ততঃ স রাজা কৌরব্যো ধর্মপুত্রো যুধিষ্ঠিরঃ
উত্সৃজ্যাভরণান্যঙ্গাজ্জগৃহে বল্কলান্যুত
1.19
ভীমার্জুনৌ যমৌ চৈব দ্রৌপদী চ যশস্বিনী
তথৈব সর্বে জগৃহুর্বল্কলানি জনাধিপ
1.20
বিধিবত্কারয়িত্বেষ্টিং নৈষ্ঠিকীং ভরতর্ষভ
সমুত্সৃজ্যাপ্সু সর্বেঽগ্নীন্প্রতস্থুর্নরপুংগবাঃ
1.21
ততঃ প্ররুরুদুঃ সর্বাঃ স্ত্রিয়ো দৃষ্ট্বা নরর্ষভান্
প্রস্থিতান্দ্রৌপদীষষ্ঠান্পুরা দ্যূতজিতান্যথা
1.22
হর্ষোঽভবচ্চ সর্বেষাং ভ্রাতৄণাং গমনং প্রতি
যুধিষ্ঠিরমতং জ্ঞাত্বা বৃষ্ণিক্ষয়মবেক্ষ্য চ
1.23
ভ্রাতরঃ পঞ্চ কৃষ্ণা চ ষষ্ঠী শ্বা চৈব সপ্তমঃ
আত্মনা সপ্তমো রাজা নির্যয়ৌ গজসাহ্বয়াৎ
পৌরৈরনুগতো দূরং সর্বৈরন্তঃপুরৈস্তথা
1.24
ন চৈনমশকত্কশ্চিন্নিবর্তস্বেতি ভাষিতুম্
ন্যবর্তন্ত ততঃ সর্বে নরা নগরবাসিনঃ
1.25
কৃপপ্রভৃতয়শ্চৈব যুয়ুত্সুং পর্যবারয়ন্
বিবেশ গঙ্গাং কৌরব্য উলূপী ভুজগাত্মজা
1.26
চিত্রাঙ্গদা যয়ৌ চাপি মণিপূরপুরং প্রতি
শিষ্টাঃ পরিক্ষিতং ত্বন্যা মাতরঃ পর্যবারয়ন্
1.27
পাণ্ডবাশ্চ মহাত্মানো দ্রৌপদী চ যশস্বিনী
কৃতোপবাসাঃ কৌরব্য প্রয়য়ুঃ প্রাঙ্মুখাস্ততঃ
1.28
যোগয়ুক্তা মহাত্মানস্ত্যাগধর্মমুপেয়ুষঃ
অভিজগ্মুর্বহূন্দেশান্সরিতঃ পর্বতাংস্তথা
1.29
যুধিষ্ঠিরো যয়াবগ্রে ভীমস্তু তদনন্তরম্
অর্জুনস্তস্য চান্বেব যমৌ চৈব যথাক্রমম্
1.30
পৃষ্ঠতস্তু বরারোহা শ্যামা পদ্মদলেক্ষণা
দ্রৌপদী যোষিতাং শ্রেষ্ঠা যয়ৌ ভরতসত্তম
1.31
শ্বা চৈবানুয়য়াবেকঃ পাণ্ডবান্প্রস্থিতান্বনে
ক্রমেণ তে যয়ুর্বীরা লৌহিত্যং সলিলার্ণবম্
1.32
গাণ্ডীবং চ ধনুর্দিব্যং ন মুমোচ ধনংজয়ঃ
রত্নলোভান্মহারাজ তৌ চাক্ষয্যৌ মহেষুধী
1.33
অগ্নিং তে দদৃশুস্তত্র স্থিতং শৈলমিবাগ্রতঃ
মার্গমাবৃত্য তিষ্ঠন্তং সাক্ষাত্পুরুষবিগ্রহম্
1.34
ততো দেবঃ স সপ্তার্চিঃ পাণ্ডবানিদমব্রবীৎ
ভো ভো পাণ্ডুসুতা বীরাঃ পাবকং মাং বিবোধত
1.35
যুধিষ্ঠির মহাবাহো ভীমসেন পরংতপ
অর্জুনাশ্বিসুতৌ বীরৌ নিবোধত বচো মম
1.36
অহমগ্নিঃ কুরুশ্রেষ্ঠা ময়া দগ্ধং চ খাণ্ডবম্
অর্জুনস্য প্রভাবেণ তথা নারায়ণস্য চ
1.37
অয়ং বঃ ফল্গুনো ভ্রাতা গাণ্ডীবং পরমায়ুধম্
পরিত্যজ্য বনং যাতু নানেনার্থোঽস্তি কশ্চন
1.38
চক্ররত্নং তু যত্কৃষ্ণে স্থিতমাসীন্মহাত্মনি
গতং তচ্চ পুনর্হস্তে কালেনৈষ্যতি তস্য হ
1.39
বরুণাদাহৃতং পূর্বং ময়ৈতত্পার্থকারণাৎ
গাণ্ডীবং কার্মুকশ্রেষ্ঠং বরুণায়ৈব দীয়তাম্
1.40
ততস্তে ভ্রাতরঃ সর্বে ধনংজয়মচোদয়ন্
স জলে প্রাক্ষিপত্তত্তু তথাক্ষয্যৌ মহেষুধী
1.41
ততোঽগ্নির্ভরতশ্রেষ্ঠ তত্রৈবান্তরধীয়ত
যয়ুশ্চ পাণ্ডবা বীরাস্ততস্তে দক্ষিণামুখাঃ
1.42
ততস্তে তূত্তরেণৈব তীরেণ লবণাম্ভসঃ
জগ্মুর্ভরতশার্দূল দিশং দক্ষিণপশ্চিমম্
1.43
ততঃ পুনঃ সমাবৃত্তাঃ পশ্চিমাং দিশমেব তে
দদৃশুর্দ্বারকাং চাপি সাগরেণ পরিপ্লুতাম্
1.44
উদীচীং পুনরাবৃত্ত্য যয়ুর্ভরতসত্তমাঃ
প্রাদক্ষিণ্যং চিকীর্ষন্তঃ পৃথিব্যা যোগধর্মিণঃ