Utshovঅধ্যায় 8
8.1
বৈশংপায়ন উবাচ
এবমুক্তঃ স বীভত্সুর্মাতুলেন পরংতপঃ
দুর্মনা দীনমনসং বসুদেবমুবাচ হ
8.2
নাহং বৃষ্ণিপ্রবীরেণ মধুভিশ্চৈব মাতুল
বিহীনাং পৃথিবীং দ্রষ্টুং শক্তশ্চিরমিহ প্রভো
8.3
রাজা চ ভীমসেনশ্চ সহদেবশ্চ পাণ্ডবঃ
নকুলো যাজ্ঞসেনী চ ষডেকমনসো বয়ম্
8.4
রাজ্ঞঃ সংক্রমণে চাপি কালোঽয়ং বর্ততে ধ্রুবম্
তমিমং বিদ্ধি সংপ্রাপ্তং কালং কালবিদাং বর
8.5
সর্বথা বৃষ্ণিদারাংস্তু বালবৃদ্ধাংস্তথৈব চ
নয়িষ্যে পরিগৃহ্যাহমিন্দ্রপ্রস্থমরিংদম
8.6
ইত্যুক্ত্বা দারুকমিদং বাক্যমাহ ধনংজয়ঃ
অমাত্যান্বৃষ্ণিবীরাণাং দ্রষ্টুমিচ্ছামি মাচিরম্
8.7
ইত্যেবমুক্ত্বা বচনং সুধর্মাং যাদবীং সভাম্
প্রবিবেশার্জুনঃ শূরঃ শোচমানো মহারথান্
8.8
তমাসনগতং তত্র সর্বাঃ প্রকৃতয়স্তথা
ব্রাহ্মণা নৈগমাশ্চৈব পরিবার্যোপতস্থিরে
8.9
তান্দীনমনসঃ সর্বান্নিভৃতান্গতচেতসঃ
উবাচেদং বচঃ পার্থঃ স্বয়ং দীনতরস্তদা
8.10
শক্রপ্রস্থমহং নেষ্যে বৃষ্ণ্যন্ধকজনং স্বয়ম্
ইদং তু নগরং সর্বং সমুদ্রঃ প্লাবয়িষ্যতি
8.11
সজ্জীকুরুত যানানি রত্নানি বিবিধানি চ
বজ্রোঽয়ং ভবতাং রাজা শক্রপ্রস্থে ভবিষ্যতি
8.12
সপ্তমে দিবসে চৈব রবৌ বিমল উদ্গতে
বহির্বত্স্যামহে সর্বে সজ্জীভবত মাচিরম্
8.13
ইত্যুক্তাস্তেন তে পৌরাঃ পার্থেনাক্লিষ্টকর্মণা
সজ্জমাশু ততশ্চক্রুঃ স্বসিদ্ধ্যর্থং সমুত্সুকাঃ
8.14
তাং রাত্রিমবসত্পার্থঃ কেশবস্য নিবেশনে
মহতা শোকমোহেন সহসাভিপরিপ্লুতঃ
8.15
শ্বোভূতেঽথ ততঃ শৌরির্বসুদেবঃ প্রতাপবান্
যুক্ত্বাত্মানং মহাতেজা জগাম গতিমুত্তমাম্
8.16
ততঃ শব্দো মহানাসীদ্বসুদেবস্য বেশ্মনি
দারুণঃ ক্রোশতীনাং চ রুদতীনাং চ যোষিতাম্
8.17
প্রকীর্ণমূর্ধজাঃ সর্বা বিমুক্তাভরণস্রজঃ
উরাংসি পাণিভির্ঘ্নন্ত্যো ব্যলপন্করুণং স্ত্রিয়ঃ
8.18
তং দেবকী চ ভদ্রা চ রোহিণী মদিরা তথা
অন্বারোঢুং ব্যবসিতা ভর্তারং যোষিতাং বরাঃ
8.19
ততঃ শৌরিং নৃয়ুক্তেন বহুমাল্যেন ভারত
যানেন মহতা পার্থো বহির্নিষ্ক্রাময়ত্তদা
8.20
তমন্বয়ুস্তত্র তত্র দুঃখশোকসমাহতাঃ
দ্বারকাবাসিনঃ পৌরাঃ সর্ব এব নরর্ষভ
8.21
তস্যাশ্বমেধিকং ছত্রং দীপ্যমানাশ্চ পাবকাঃ
পুরস্তাত্তস্য যানস্য যাজকাশ্চ ততো যয়ুঃ
8.22
অনুজগ্মুশ্চ তং বীরং দেব্যস্তা বৈ স্বলংকৃতাঃ
স্ত্রীসহস্রৈঃ পরিবৃতা বধূভিশ্চ সহস্রশঃ
8.23
যস্তু দেশঃ প্রিয়স্তস্য জীবতোঽভূন্মহাত্মনঃ
তত্রৈনমুপসংকল্প্য পিতৃমেধং প্রচক্রিরে
8.24
তং চিতাগ্নিগতং বীরং শূরপুত্রং বরাঙ্গনাঃ
ততোঽন্বারুরুহুঃ পত্ন্যশ্চতস্রঃ পতিলোকগাঃ
8.25
তং বৈ চতসৃভিঃ স্ত্রীভিরন্বিতং পাণ্ডুনন্দনঃ
অদাহয়চ্চন্দনৈশ্চ গন্ধৈরুচ্চাবচৈরপি
8.26
ততঃ প্রাদুরভূচ্ছব্দঃ সমিদ্ধস্য বিভাবসোঃ
সামগানাং চ নির্ঘোষো নরাণাং রুদতামপি
8.27
ততো বজ্রপ্রধানাস্তে বৃষ্ণিবীরকুমারকাঃ
সর্ব এবোদকং চক্রুঃ স্ত্রিয়শ্চৈব মহাত্মনঃ
8.28
অলুপ্তধর্মস্তং ধর্মং কারয়িত্বা স ফল্গুনঃ
জগাম বৃষ্ণয়ো যত্র বিনষ্টা ভরতর্ষভ
8.29
স তান্দৃষ্ট্বা নিপতিতান্কদনে ভৃশদুঃখিতঃ
বভূবাতীব কৌরব্যঃ প্রাপ্তকালং চকার চ
8.30
যথাপ্রধানতশ্চৈব চক্রে সর্বাঃ ক্রিয়াস্তদা
যে হতা ব্রহ্মশাপেন মুসলৈরেরকোদ্ভবৈঃ
8.31
ততঃ শরীরে রামস্য বাসুদেবস্য চোভয়োঃ
অন্বিষ্য দাহয়ামাস পুরুষৈরাপ্তকারিভিঃ
8.32
স তেষাং বিধিবত্কৃত্বা প্রেতকার্যাণি পাণ্ডবঃ
সপ্তমে দিবসে প্রায়াদ্রথমারুহ্য সত্বরঃ
অশ্বয়ুক্তৈ রথৈশ্চাপি গোখরোষ্ট্রয়ুতৈরপি
8.33
স্ত্রিয়স্তা বৃষ্ণিবীরাণাং রুদত্যঃ শোককর্শিতাঃ
অনুজগ্মুর্মহাত্মানং পাণ্ডুপুত্রং ধনংজয়ম্
8.34
ভৃত্যাস্ত্বন্ধকবৃষ্ণীনাং সাদিনো রথিনশ্চ যে
বীরহীনং বৃদ্ধবালং পৌরজানপদাস্তথা
যয়ুস্তে পরিবার্যাথ কলত্রং পার্থশাসনাৎ
8.35
কুঞ্জরৈশ্চ গজারোহা যয়ুঃ শৈলনিভৈস্তথা
সপাদরক্ষৈঃ সংয়ুক্তাঃ সোত্তরায়ুধিকা যয়ুঃ
8.36
পুত্রাশ্চান্ধকবৃষ্ণীনাং সর্বে পার্থমনুব্রতাঃ
ব্রাহ্মণাঃ ক্ষত্রিয়া বৈশ্যাঃ শূদ্রাশ্চৈব মহাধনাঃ
8.37
দশ ষট্চ সহস্রাণি বাসুদেবাবরোধনম্
পুরস্কৃত্য যয়ুর্বজ্রং পৌত্রং কৃষ্ণস্য ধীমতঃ
8.38
বহূনি চ সহস্রাণি প্রয়ুতান্যর্বুদানি চ
ভোজবৃষ্ণ্যন্ধকস্ত্রীণাং হতনাথানি নির্যয়ুঃ
8.39
তত্সাগরসমপ্রখ্যং বৃষ্ণিচক্রং মহর্দ্ধিমৎ
উবাহ রথিনাং শ্রেষ্ঠঃ পার্থঃ পরপুরংজয়ঃ
8.40
নির্যাতে তু জনে তস্মিন্সাগরো মকরালয়ঃ
দ্বারকাং রত্নসংপূর্ণাং জলেনাপ্লাবয়ত্তদা
8.41
তদদ্ভুতমভিপ্রেক্ষ্য দ্বারকাবাসিনো জনাঃ
তূর্ণাত্তূর্ণতরং জগ্মুরহো দৈবমিতি ব্রুবন্
8.42
কাননেষু চ রম্যেষু পর্বতেষু নদীষু চ
নিবসন্নানয়ামাস বৃষ্ণিদারান্ধনংজয়ঃ
8.43
স পঞ্চনদমাসাদ্য ধীমানতিসমৃদ্ধিমৎ
দেশে গোপশুধান্যাঢ্যে নিবাসমকরোত্প্রভুঃ
8.44
ততো লোভঃ সমভবদ্দস্যূনাং নিহতেশ্বরাঃ
দৃষ্ট্বা স্ত্রিয়ো নীয়মানাঃ পার্থেনৈকেন ভারত
8.45
ততস্তে পাপকর্মাণো লোভোপহতচেতসঃ
আভীরা মন্ত্রয়ামাসুঃ সমেত্যাশুভদর্শনাঃ
8.46
অয়মেকোঽর্জুনো যোদ্ধা বৃদ্ধবালং হতেশ্বরম্
নয়ত্যস্মানতিক্রম্য যোধাশ্চেমে হতৌজসঃ
8.47
ততো যষ্টিপ্রহরণা দস্যবস্তে সহস্রশঃ
অভ্যধাবন্ত বৃষ্ণীনাং তং জনং লোপ্ত্রহারিণঃ
8.48
মহতা সিংহনাদেন দ্রাবয়ন্তঃ পৃথগ্জনম্
অভিপেতুর্ধনার্থং তে কালপর্যায়চোদিতাঃ
8.49
ততো নিবৃত্তঃ কৌন্তেয়ঃ সহসা সপদানুগঃ
উবাচ তান্মহাবাহুরর্জুনঃ প্রহসন্নিব
8.50
নিবর্তধ্বমধর্মজ্ঞা যদি স্থ ন মুমূর্ষবঃ
নেদানীং শরনির্ভিন্নাঃ শোচধ্বং নিহতা ময়া
8.51
তথোক্তাস্তেন বীরেণ কদর্থীকৃত্য তদ্বচঃ
অভিপেতুর্জনং মূঢা বার্যমাণাঃ পুনঃ পুনঃ
8.52
ততোঽর্জুনো ধনুর্দিব্যং গাণ্ডীবমজরং মহৎ
আরোপয়িতুমারেভে যত্নাদিব কথংচন
8.53
চকার সজ্যং কৃচ্ছ্রেণ সংভ্রমে তুমুলে সতি
চিন্তয়ামাস চাস্ত্রাণি ন চ সস্মার তান্যপি
8.54
বৈকৃত্যং তন্মহদ্দৃষ্ট্বা ভুজবীর্যে তথা যুধি
দিব্যানাং চ মহাস্ত্রাণাং বিনাশাদ্ব্রীডিতোঽভবৎ
8.55
বৃষ্ণিয়োধাশ্চ তে সর্বে গজাশ্বরথয়ায়িনঃ
ন শেকুরাবর্তয়িতুং হ্রিয়মাণং চ তং জনম্
8.56
কলত্রস্য বহুত্বাত্তু সংপতত্সু ততস্ততঃ
প্রয়ত্নমকরোত্পার্থো জনস্য পরিরক্ষণে
8.57
মিষতাং সর্বয়োধানাং ততস্তাঃ প্রমদোত্তমাঃ
সমন্ততোঽবকৃষ্যন্ত কামাচ্চান্যাঃ প্রবব্রজুঃ
8.58
ততো গাণ্ডীবনির্মুক্তৈঃ শরৈঃ পার্থো ধনংজয়ঃ
জঘান দস্যূন্সোদ্বেগো বৃষ্ণিভৃত্যৈঃ সহ প্রভুঃ
8.59
ক্ষণেন তস্য তে রাজন্ক্ষয়ং জগ্মুরজিহ্মগাঃ
অক্ষয়া হি পুরা ভূত্বা ক্ষীণাঃ ক্ষতজভোজনাঃ
8.60
স শরক্ষয়মাসাদ্য দুঃখশোকসমাহতঃ
ধনুষ্কোট্যা তদা দস্যূনবধীত্পাকশাসনিঃ
8.61
প্রেক্ষতস্ত্বেব পার্থস্য বৃষ্ণ্যন্ধকবরস্ত্রিয়ঃ
জগ্মুরাদায় তে ম্লেচ্ছাঃ সমন্তাজ্জনমেজয়
8.62
ধনংজয়স্তু দৈবং তন্মনসাচিন্তয়ত্প্রভুঃ
দুঃখশোকসমাবিষ্টো নিঃশ্বাসপরমোঽভবৎ
8.63
অস্ত্রাণাং চ প্রণাশেন বাহুবীর্যস্য সংক্ষয়াৎ
ধনুষশ্চাবিধেয়ত্বাচ্ছরাণাং সংক্ষয়েণ চ
8.64
বভূব বিমনাঃ পার্থো দৈবমিত্যনুচিন্তয়ন্
ন্যবর্তত ততো রাজন্নেদমস্তীতি চাব্রবীৎ
8.65
ততঃ স শেষমাদায় কলত্রস্য মহামতিঃ
হৃতভূয়িষ্ঠরত্নস্য কুরুক্ষেত্রমবাতরৎ
8.66
এবং কলত্রমানীয় বৃষ্ণীনাং হৃতশেষিতম্
ন্যবেশয়ত কৌরব্যস্তত্র তত্র ধনংজয়ঃ
8.67
হার্দিক্যতনয়ং পার্থো নগরং মার্তিকাবতম্
ভোজরাজকলত্রং চ হৃতশেষং নরোত্তমঃ
8.68
ততো বৃদ্ধাংশ্চ বালাংশ্চ স্ত্রিয়শ্চাদায় পাণ্ডবঃ
বীরৈর্বিহীনান্সর্বাংস্তাঞ্শক্রপ্রস্থে ন্যবেশয়ৎ
8.69
যৌয়ুধানিং সরস্বত্যাং পুত্রং সাত্যকিনঃ প্রিয়ম্
ন্যবেশয়ত ধর্মাত্মা বৃদ্ধবালপুরস্কৃতম্
8.70
ইন্দ্রপ্রস্থে দদৌ রাজ্যং বজ্রায় পরবীরহা
বজ্রেণাক্রূরদারাস্তু বার্যমাণাঃ প্রবব্রজুঃ
8.71
রুক্মিণী ত্বথ গান্ধারী শৈব্যা হৈমবতীত্যপি
দেবী জাম্ববতী চৈব বিবিশুর্জাতবেদসম্
8.72
সত্যভামা তথৈবান্যা দেব্যঃ কৃষ্ণস্য সংমতাঃ
বনং প্রবিবিশূ রাজংস্তাপস্যে কৃতনিশ্চয়াঃ
8.73
দ্বারকাবাসিনো যে তু পুরুষাঃ পার্থমন্বয়ুঃ
যথার্হং সংবিভজ্যৈনান্বজ্রে পর্যদদজ্জয়ঃ
8.74
স তত্কৃত্বা প্রাপ্তকালং বাষ্পেণাপিহিতোঽর্জুনঃ
কৃষ্ণদ্বৈপায়নং রাজন্দদর্শাসীনমাশ্রমে