Utshovঅধ্যায় 9
9.1
বৈশংপায়ন উবাচ
প্রবিশন্নর্জুনো রাজন্নাশ্রমং সত্যবাদিনঃ
দদর্শাসীনমেকান্তে মুনিং সত্যবতীসুতম্
9.2
স তমাসাদ্য ধর্মজ্ঞমুপতস্থে মহাব্রতম্
অর্জুনোঽস্মীতি নামাস্মৈ নিবেদ্যাভ্যবদত্ততঃ
9.3
স্বাগতং তেঽস্ত্বিতি প্রাহ মুনিঃ সত্যবতীসুতঃ
আস্যতামিতি চোবাচ প্রসন্নাত্মা মহামুনিঃ
9.4
তমপ্রতীতমনসং নিঃশ্বসন্তং পুনঃ পুনঃ
নির্বিণ্ণমনসং দৃষ্ট্বা পার্থং ব্যাসোঽব্রবীদিদম্
9.5
অবীরজোঽভিঘাতস্তে ব্রাহ্মণো বা হতস্ত্বয়া
যুদ্ধে পরাজিতো বাসি গতশ্রীরিব লক্ষ্যসে
9.6
ন ত্বা প্রত্যভিজানামি কিমিদং ভরতর্ষভ
শ্রোতব্যং চেন্ময়া পার্থ ক্ষিপ্রমাখ্যাতুমর্হসি
9.7
অর্জুন উবাচ
যঃ স মেঘবপুঃ শ্রীমান্বৃহত্পঙ্কজলোচনঃ
স কৃষ্ণঃ সহ রামেণ ত্যক্ত্বা দেহং দিবং গতঃ
9.8
মৌসলে বৃষ্ণিবীরাণাং বিনাশো ব্রহ্মশাপজঃ
বভূব বীরান্তকরঃ প্রভাসে রোমহর্ষণঃ
9.9
যে তে শূরা মহাত্মানঃ সিংহদর্পা মহাবলাঃ
ভোজবৃষ্ণ্যন্ধকা ব্রহ্মন্নন্যোন্যং তৈর্হতং যুধি
9.10
গদাপরিঘশক্তীনাং সহাঃ পরিঘবাহবঃ
ত এরকাভির্নিহতাঃ পশ্য কালস্য পর্যয়ম্
9.11
হতং পঞ্চশতং তেষাং সহস্রং বাহুশালিনাম্
নিধনং সমনুপ্রাপ্তং সমাসাদ্যেতরেতরম্
9.12
পুনঃ পুনর্ন মৃষ্যামি বিনাশমমিতৌজসাম্
চিন্তয়ানো যদূনাং চ কৃষ্ণস্য চ যশস্বিনঃ
9.13
শোষণং সাগরস্যেব পর্বতস্যেব চালনম্
নভসঃ পতনং চৈব শৈত্যমগ্নেস্তথৈব চ
9.14
অশ্রদ্ধেয়মহং মন্যে বিনাশং শার্ঙ্গধন্বনঃ
ন চেহ স্থাতুমিচ্ছামি লোকে কৃষ্ণবিনাকৃতঃ
9.15
ইতঃ কষ্টতরং চান্যচ্ছৃণু তদ্বৈ তপোধন
মনো মে দীর্যতে যেন চিন্তয়ানস্য বৈ মুহুঃ
9.16
পশ্যতো বৃষ্ণিদারাশ্চ মম ব্রহ্মন্সহস্রশঃ
আভীরৈরনুসৃত্যাজৌ হৃতাঃ পঞ্চনদালয়ৈঃ
9.17
ধনুরাদায় তত্রাহং নাশকং তস্য পূরণে
যথা পুরা চ মে বীর্যং ভুজয়োর্ন তথাভবৎ
9.18
অস্ত্রাণি মে প্রনষ্টানি বিবিধানি মহামুনে
শরাশ্চ ক্ষয়মাপন্নাঃ ক্ষণেনৈব সমন্ততঃ
9.19
পুরুষশ্চাপ্রমেয়াত্মা শঙ্খচক্রগদাধরঃ
চতুর্ভুজঃ পীতবাসা শ্যামঃ পদ্মায়তেক্ষণঃ
9.20
যঃ স যাতি পুরস্তান্মে রথস্য সুমহাদ্যুতিঃ
প্রদহন্রিপুসৈন্যানি ন পশ্যাম্যহমদ্য তম্
9.21
যেন পূর্বং প্রদগ্ধানি শত্রুসৈন্যানি তেজসা
শরৈর্গাণ্ডীবনির্মুক্তৈরহং পশ্চাদ্ব্যনাশয়ম্
9.22
তমপশ্যন্বিষীদামি ঘূর্ণামীব চ সত্তম
পরিনির্বিণ্ণচেতাশ্চ শান্তিং নোপলভেঽপি চ
9.23
বিনা জনার্দনং বীরং নাহং জীবিতুমুত্সহে
শ্রুত্বৈব হি গতং বিষ্ণুং মমাপি মুমুহুর্দিশঃ
9.24
প্রনষ্টজ্ঞাতিবীর্যস্য শূন্যস্য পরিধাবতঃ
উপদেষ্টুং মম শ্রেয়ো ভবানর্হতি সত্তম
9.25
ব্যাস উবাচ
ব্রহ্মশাপবিনির্দগ্ধা বৃষ্ণ্যন্ধকমহারথাঃ
বিনষ্টাঃ কুরুশার্দূল ন তাঞ্শোচিতুমর্হসি
9.26
ভবিতব্যং তথা তদ্ধি দিষ্টমেতন্মহাত্মনাম্
উপেক্ষিতং চ কৃষ্ণেন শক্তেনাপি ব্যপোহিতুম্
9.27
ত্রৈলোক্যমপি কৃষ্ণো হি কৃত্স্নং স্থাবরজঙ্গমম্
প্রসহেদন্যথা কর্তুং কিমু শাপং মনীষিণাম্
9.28
রথস্য পুরতো যাতি যঃ স চক্রগদাধরঃ
তব স্নেহাত্পুরাণর্ষির্বাসুদেবশ্চতুর্ভুজঃ
9.29
কৃত্বা ভারাবতরণং পৃথিব্যাঃ পৃথুলোচনঃ
মোক্ষয়িত্বা জগত্সর্বং গতঃ স্বস্থানমুত্তমম্
9.30
ত্বয়া ত্বিহ মহত্কর্ম দেবানাং পুরুষর্ষভ
কৃতং ভীমসহায়েন যমাভ্যাং চ মহাভুজ
9.31
কৃতকৃত্যাংশ্চ বো মন্যে সংসিদ্ধান্কুরুপুংগব
গমনং প্রাপ্তকালং চ তদ্ধি শ্রেয়ো মতং মম
9.32
বলং বুদ্ধিশ্চ তেজশ্চ প্রতিপত্তিশ্চ ভারত
ভবন্তি ভবকালেষু বিপদ্যন্তে বিপর্যয়ে
9.33
কালমূলমিদং সর্বং জগদ্বীজং ধনংজয়
কাল এব সমাদত্তে পুনরেব যদৃচ্ছয়া
9.34
স এব বলবান্ভূত্বা পুনর্ভবতি দুর্বলঃ
স এবেশশ্চ ভূত্বেহ পরৈরাজ্ঞাপ্যতে পুনঃ
9.35
কৃতকৃত্যানি চাস্ত্রাণি গতান্যদ্য যথাগতম্
পুনরেষ্যন্তি তে হস্তং যদা কালো ভবিষ্যতি
9.36
কালো গন্তুং গতিং মুখ্যাং ভবতামপি ভারত
এতচ্ছ্রেয়ো হি বো মন্যে পরমং ভরতর্ষভ
9.37
এতদ্বচনমাজ্ঞায় ব্যাসস্যামিততেজসঃ
অনুজ্ঞাতো যয়ৌ পার্থো নগরং নাগসাহ্বয়ম্
9.38
প্রবিশ্য চ পুরীং বীরঃ সমাসাদ্য যুধিষ্ঠিরম্
আচষ্ট তদ্যথাবৃত্তং বৃষ্ণ্যন্ধকজনং প্রতি