অধ্যায় 7

7.1

বৈশংপায়ন উবাচ
তং শয়ানং মহাত্মানং বীরমানকদুন্দুভিম্
পুত্রশোকাভিসংতপ্তং দদর্শ কুরুপুংগবঃ

তস্যাশ্রুপরিপূর্ণাক্ষো ব্যূঢোরস্কো মহাভুজঃ
আর্তস্যার্ততরঃ পার্থঃ পাদৌ জগ্রাহ ভারত

সমালিঙ্গ্যার্জুনং বৃদ্ধঃ স ভুজাভ্যাং মহাভুজঃ
রুদন্পুত্রান্স্মরন্সর্বান্বিললাপ সুবিহ্বলঃ
ভ্রাতৄন্পুত্রাংশ্চ পৌত্রাংশ্চ দৌহিত্রাংশ্চ সখীনপি

বসুদেব উবাচ
যৈর্জিতা ভূমিপালাশ্চ দৈত্যাশ্চ শতশোঽর্জুন
তান্দৃষ্ট্বা নেহ পশ্যামি জীবাম্যর্জুন দুর্মরঃ

যৌ তাবর্জুন শিষ্যৌ তে প্রিয়ৌ বহুমতৌ সদা
তয়োরপনয়াত্পার্থ বৃষ্ণয়ো নিধনং গতাঃ

যৌ তৌ বৃষ্ণিপ্রবীরাণাং দ্বাবেবাতিরথৌ মতৌ
প্রদ্যুম্নো যুয়ুধানশ্চ কথয়ন্কত্থসে চ যৌ

নিত্যং ত্বং কুরুশার্দূল কৃষ্ণশ্চ মম পুত্রকঃ
তাবুভৌ বৃষ্ণিনাশস্য মুখমাস্তাং ধনংজয়

ন তু গর্হামি শৈনেয়ং হার্দিক্যং চাহমর্জুন
অক্রূরং রৌক্মিণেয়ং চ শাপো হ্যেবাত্র কারণম্

কেশিনং যস্তু কংসং চ বিক্রম্য জগতঃ প্রভুঃ
বিদেহাবকরোত্পার্থ চৈদ্যং চ বলগর্বিতম্

নৈষাদিমেকলব্যং চ চক্রে কালিঙ্গমাগধান্
গান্ধারান্কাশিরাজং চ মরুভূমৌ চ পার্থিবান্

প্রাচ্যাংশ্চ দাক্ষিণাত্যাংশ্চ পার্বতীয়াংস্তথা নৃপান্
সোঽভ্যুপেক্ষিতবানেতমনয়ং মধুসূদনঃ

ততঃ পুত্রাংশ্চ পৌত্রাংশ্চ ভ্রাতৄনথ সখীনপি
শয়ানান্নিহতান্দৃষ্ট্বা ততো মামব্রবীদিদম্

সংপ্রাপ্তোঽদ্যায়মস্যান্তঃ কুলস্য পুরুষর্ষভ
আগমিষ্যতি বীভত্সুরিমাং দ্বারবতীং পুরীম্

আখ্যেয়ং তস্য যদ্বৃত্তং বৃষ্ণীনাং বৈশসং মহৎ
স তু শ্রুত্বা মহাতেজা যদূনামনয়ং প্রভো
আগন্তা ক্ষিপ্রমেবেহ ন মেঽত্রাস্তি বিচারণা

যোঽহং তমর্জুনং বিদ্ধি যোঽর্জুনঃ সোঽহমেব তু
যদ্ব্রূয়াত্তত্তথা কার্যমিতি বুধ্যস্ব মাধব

স স্ত্রীষু প্রাপ্তকালং বঃ পাণ্ডবো বালকেষু চ
প্রতিপত্স্যতি বীভত্সুর্ভবতশ্চৌর্ধ্বদেহিকম্

ইমাং চ নগরীং সদ্যঃ প্রতিয়াতে ধনংজয়ে
প্রাকারাট্টালকোপেতাং সমুদ্রঃ প্লাবয়িষ্যতি

অহং হি দেশে কস্মিংশ্চিত্পুণ্যে নিয়মমাস্থিতঃ
কালং কর্তা সদ্য এব রামেণ সহ ধীমতা

এবমুক্ত্বা হৃষীকেশো মামচিন্ত্যপরাক্রমঃ
হিত্বা মাং বালকৈঃ সার্ধং দিশং কামপ্যগাত্প্রভুঃ

সোঽহং তৌ চ মহাত্মানৌ চিন্তয়ন্ভ্রাতরৌ তব
ঘোরং জ্ঞাতিবধং চৈব ন ভুঞ্জে শোককর্শিতঃ

ন চ ভোক্ষ্যে ন জীবিষ্যে দিষ্ট্যা প্রাপ্তোঽসি পাণ্ডব
যদুক্তং পার্থ কৃষ্ণেন তত্সর্বমখিলং কুরু

এতত্তে পার্থ রাজ্যং চ স্ত্রিয়ো রত্নানি চৈব হ
ইষ্টান্প্রাণানহং হীমাংস্ত্যক্ষ্যামি রিপুসূদন